މާލީ ބަޔާންތަކުގައި ދޮގު މައުލޫމާތު ދީފައިވާތީ، ގާޒީ ނަޖީބު މުސާރަ ނުހިނގާ ގޮތަށް ސަސްޕެންޑްކޮށްފި
16 އެޕްރީލު 2020 | ބުރާސްފަތި 11:552013 ވަނަ އަހަރުން ފެށިގެން ޖޭއެސްސީއަށް ހުށަހެޅި މާލީ ބަޔާންތަކުގައި ދޮގު މައުލޫމާތު ދީފައިވޭ
ކްރިމިނަލް ކޯޓުގެ ގާޒީ ހަސަން ނަޖީބު (ކ)
މާލީ ބަޔާންތަކުގައި ދޮގު މައުލޫމާތު ދީފައިވާތީ، ކްރިމިނަލް ކޯޓުގެ ގާޒީ ހަސަން ނަޖީބު، މުސާރަ ނުހިނގާ ގޮތަށް ސަސްޕެންޑް ކޮށްފިއެވެ.
ޖުޑީޝަލް ސަރވިސް ކޮމިޝަން (ޖޭއެސްސީ) އިން ބުރާސްފަތި ދުވަހު ނެރެފައިވާ ނޫސްބަޔާނެއްގައި ބުނެފައިވަނީ، 2013، އިން ފެށިގެން ގާޒީ ހަސަން ނަޖީބު، ޖޭއެސްސީއަށް ހުށަހަޅާފައިވާ މާލީ ބަޔާންތަކުގައި ދޮގު މައުލޫމާތު ދީފައިވާކަން ސާބިތުވާތީ، މި އަމަލުތަކަކީ ފަނޑިޔާރުންގެ ގާނޫނުގެ 68 ވަނަ މާއްދާއާއި، އެ ގާނޫނުގެ 32 ވަނަ މާއްދާގެ (ހ)ގެ 5 އަދި 9 ވަނަ ނަމްބަރާއި، ފަނޑިޔާރުންގެ ސުލޫކީ މިންގަނޑުގެ 3.1 އަދި 2.2 އާ ކަނޑައެޅިގެން ހިލާފަށް ކޮށްފައިވާ އަމަލުތަކެއްކަމަށްވާތީ، ޖޭއެސްސީގެ ގާނޫނުގެ ދަށުން ގާޒީ ހަސަން ނަޖީބު، މުސާރައާއި އިނާޔަތްތައް ނުލިބޭ ގޮތަށް ވަޒީފާގެ މަސައްކަތަށް ނުކުތުން 3 މަސްދުވަހަށް މަނާކުރުމަށް ނިންމާފައިވާ ކަމަށެެވެ.
މީގެއިތުރުން، ޖޭއެސްސީން ބުނެފައިވަނީ، ގާޒީ ހަސަން ނަޖީބު ފަނޑިޔާރުކަމުގެ މަގާމުގައި ހުރެގެން ދައުލަތުގެ އިދާރާއަކަށް ދޮގު މައުލޫމާތު ދީފައިވާ މައްސަލަ ތަހުގީގުކުރުމަށް ފުލުހުންގެ އިދާރާއަށް ފޮނުވުމަށްވެސް ނިންމާފައިވާ ކަމަށެވެ.
ކްރިމިނަލް ކޯޓުގެ ގާޒީ ހަސަން ނަޖީބަކީ، ކުރީގެ ރައީސް އަބްދުﷲ ޔާމީންގެ ވެރިކަމުގައި މެޖިސްޓްރޭޓަކަށް ހުންނަވަނިކޮށް، ކްރިމިނަލް ކޯޓުގެ ގާޒީކަމަށް އައްޔަން ކުރެއްވި ގާޒީއެކެވެ.
އަދި ހަސަން ނަޖީބަކީ ހައިކޯޓުގެ އިސް ފަނޑިޔާރު ޝުޖާއު އުސްމާނުގެ ގާތް ބޭފުޅެކެވެ. ހައިކޯޓުގެ އިސްފަނޑިޔާރު ކަމަށް ޝުޖާއު އައްޔަން ކުރެއްވީވެސް ރައީސް ޔާމީންގެ ވެރިކަމުގައެވެ. ޝުޖާއު އުސްމާނަކީ ރައީސް ޔާމީންގެ ކެމްޕެއިން ހަރަކާތުގައާއި ޕީޕީއެމް ހަރަކާތްތަކުގައި ވެސް ބައިވެރިވެފައިވާ ކަމުގެ ތުހުމަތު ކުރެވޭ ފަނޑިޔާރެކެވެ.
