ގއ. އަތޮޅުން ފެށިގެން އައްޑޫސިޓީއަށް ވައިޓް އެލަރޓް ނެރެފި
16 އެޕްރީލު 2020 | ބުރާސްފަތި 04:19ވައިޓް އެލަރޓް ނެރެފައިވަނީ މެންދުރު 12:30 އާ ހަމައަށް
ރާއްޖޭގެ ހުރިހާ ހިސާބެއްގައި ވެސް ކަނޑު މަޑުވެފައި، ވައި ވެސް މަޑުވާނެ
ގއ. އަތޮޅުން ފެށިގެން އައްޑޫސިޓީއަށް ވައިޓް އެލަރޓް ނެރެފިއެވެ.
މޫސުމާ ބެހޭ ޤައުމީ އިދާރާއިން ބުނީ ގއ. އަތޮޅުން އައްޑޫސިޓީއަށް ބޯކޮށް ވާރޭ ވެހި ގުގުރުން އެކަށީގެންވާ ކަމަށެވެ. މި ހިސާބަށް ވައިޓް އެލަރޓް ނެރެފައިވަނީ ބުރާސްފަތި ދުވަހުގެ ހެނދުނު 08:30 އިން މެންދުރު 12:30 އަކަށެވެ.
ރާއްޖެއެމްވީއަށް މައުލޫމާތު ދެމުން އެ އިދާރާ އިން ބުނީ ކުރިއަތް އޮތް 24 ގަޑިއިރު ރާއްޖޭގެ ދެކުނަކަށް ވިއްސާރަ ކުރާނެ ކަމަށާއި ގުގުރުމާއެކު ބައެއް ރަށްތަކަށް ބޯކޮށް ވާރޭ ވެހުން ވެސް އެކަށީގެންވާ ކަމަށެވެ.
އަދި ރާއްޖޭގެ އެހެން ހިސާބުތަކަށް މޫސުން ގޯސް ނުވިނަމަވެސް ގުގުރުމާއެކު ކެރީގެ އަސަރު ފޯރާނެ ކަމަށް އެ އިދާރާ އިން ބުނެއެވެ.
ރާއްޖޭގެ ހުރިހާ ހިސާބެއްގައި ވެސް ކަނޑު މަޑުވެފައި، ވައި ވެސް މަޑުވާނެ ކަމަށް މޫސުމާއި ބެހޭ ޤައުމީ އިދާރާ އިން ބުނެއެވެ.
