ނޭޝަނަލް އެމަޖެންސީ އޮޕަރޭޝަން ސެންޓަރުން ހުއްދަ ދީފައިވާ މީހުންނަށް ހުޅުމާލެއާއި ވިލިމާލެއަށް ދަތުރުކުރުރެވޭނެ އިންތިޒާމު ހަމަޖައްސައިފިއެވެ.

މާލެ ސިޓީ ކައުންސިލުން ކުރި ޓުވީޓެއްގައި ބުނެފައިވަނީ ދަތުރުތައް ކުރެވެނީ ހާއްސަ ހުއްދަ ދީފައިވާ މީހުންނަށް އެކަނި ކަމަށެވެ.

ސިޓީ ކައުންސިލުގެ ޓުވީޓުގައިވާ ގޮތުން ހުޅުމާލެއާއި މާލެއާ ދެމެދު ބަހުގެ ޚިދުމަތް ފަށާނީ ހެނދުނު 6:45 ގައި ހުޅުމާލެއިންނެވެ. މި ބަސް މާލެއިން މީހުން ގޮވައިގެން ހުޅުމާލެއަށްދާނީ ހެނދުނު 8:30 ގައެވެ. އަދި 9:00 ޖަހާއިރު ހުޅުމާލެއިން މީހުން ގޮވައިގެން މާލެއަށް ދަތުރުކުރާ ބަހާއެކު، އެހިސާބުން ބަސް ދަތުރުތައް ހެނދުނަށް މެދުކަނޑާލާނެއެވެ.

މެންދުރު ފަހު ބަސް ދަތުރުތައް ފަށާނީ 14:30 ގައި ހުޅުމާލެއިން މާލެއަށް ދަތުރުކުރާ ބަހާއެކުއެވެ. އަދި މި ބަހުގައި ހުޅުމާލެއިން މީހުން ގޮވައިގެން މާލެ އައުމަށްފަހު މާލެއިން މީހުން ގޮވައިގެން ހުޅުމާލެއަށް ދާނީ 16:30 ގައެވެ. އެއައްފަހު މާލެއިން މީހުން ގޮވައިގެން ހުޅުމާލެއަށް ބަސް ދަތުރުކުރާނީ ރޭގަނޑު 22:00 ގައެވެ. އަދި ހުޅުމާލެއިން މީހުން ގޮވައިގެން މާލެއަށް ބަސް ދަތުރުކުރާނީ 22:30 ގައެވެ. އަދި ރޭގަނޑު މާލެއިން ހުޅުމާލެއަށް ދަތުރުކުރާ ފަހު ބަސް އޮންނާނީ 00:30 ގައި ކަމަށް ސިޓީ ކައުންސިލުގެ ޓުވީޓުގައިވެއެވެ.

ވިލިމާލެއިން މާލެއަށް މެންދުރު ކުރިން ފެރީ ދަތުރުތައް އޮންނާނީ ހެނދުނު 07:00 އާއި 09.00 އަކަށެވެ. އަދި މެންދުރު ފަހު ފެރީ އޮންނާނީ 15:00 އާއި ރޭގަނޑު 23:00 ގައެވެ. އަދި މާލެއިން ވިލިމާލެއަށް މެންދުރު ކުރިން ފެރީ ދަތުރުތައް އޮންނާނީ ހެނދުނު 08:00 ގައެވެ. އަދި ހަވީރު ވިލިމާލެއިން ފެރީ އޮންނާނީ 16.30 ގައެވެ. ރޭގަނޑު ފެރީ ދަތުރުތައް އޮންނާނީ 22:00 އާއި 00:30 ގައެވެ.

ނޭޝަނަލް އެމަރޖެންސީ އޮޕަރޭޝަން ސެންޓަރުން ހުއްދަ ދީފައިވަނީ އެ ސެންޓަރުގައި މަސައްކަތްކުރާ މީހުންނާއި، ޒަރޫރީ ޚިދުމަތްދޭ މުއައްސަސާތަކާއި ކުންފުނިތަކާއި އަދި ކާބޯތަކެތި ޑެލިވަރީ ކުރާ މީހުންނަށެވެ.