ބުރާސްފަތި ދުވަހު ޕޮޒިޓިވްވި ދެވަނަ ފަރާތަކީ މާލެއިން ޕޮޒިޓިވްވި ފުރަތަމަ މީހާގެ ދަރިފުޅުކަމަށް އެޗްޕީއޭ އިން ބުނެފިއެވެ.

އެޗްޕީއޭ އިން ބުނީ މާލެއިން ދެވަނަ އަށް ކޮވިޑް-19 އަށް ޕޮޒިޓިވް ވެފައިވަނީ ކުޑަކުއްޖެއް ކަމަށެވެ. އަދި ފުރަތަމަ ކޭސްއާއި ޑައިރެކްޓް ކޮންޓެކްޓްވި 11 މީހުންގެ ތެރެއިން 10 މީހުންގެ ނަތީޖާ ނެގެޓިވް ކަމަށް އެޗްޕީއޭއިން ބުންޏެވެ.

ކޮވިޑް-19 އަށް ޕޮޒިޓިވްވި ކުއްޖާ މިހާރު ހުރީ އައިސޮލޭޝަން ފެސިލިޓީއެއްގައި ކަމަށް އެޗްޕީއޭއިން މައުލޫމާތުދެއެވެ.

މާލެއިން ފުރަތަމަ ޕޮޒިޓިވްވި މީހާ އަކީ މ. ޖަރީމާގޭގައި ދިރިއުޅެމުންދާ މީހެކެވެ. އެ މީހާއަށް ވައިރަސް ޖެހުނު ގޮތް އަދި މިހާތަނަށް އެނގިފައިނުވާއިރު، އޭނާގެ ކޮންޓެކްޓް ޓްރޭސިންގެ ހެދުމުގެ މަސައްކަތް އެޗްޕީއޭއިން ދަނީ ކުރަމުންނެވެ.

މި ދެ ދިވެހިންނާއެކު ރާއްޖެގައި ކޮވިޑް-19 އަށް ޕޮޒިޓިވްވި މީހުންގެ އަދަދު ވަނީ 22 އަށް އަރާފައެވެ. ބަލި ޖެހުނު މީހުންގެ ތެރެއިން، މިހާތަނަށް 16 މީހަކު ވަނީ ބަލިން ފަސޭހަވެފައެވެ.