ފުވައްމުލަކު ސިޓީގައި އިމާރާތްކޮށްފައިވާ 200 ފްލެޓްގެ ތެރެއިން ބާކީ ހުރި ފްލެޓްތަކަށް އެދި ފޯމް ހުށަހެޅި ފަރާތްތަކުގެ ތެރެއިން ޝަރުތުހަމަވި ކެޓަގަރީ އޭ އަދި ބީ ކެޓަގަރީގެ ފޯމްތަކަށް ޕޮއިންޓް ދެވުނު ގޮތުގެ ދާއިމީ ލިސްޓް އާންމުކޮށްފިއެވެ.

ސަރުކާރުގެ ''ގެދޮރުވެރިކުރުން'' ޕްރޮގްރާމްގެ ދަށުން، ފުވައްމުލަކުގައި ޢިމާރާތްކޮށްފައިވާ 200 ފްލެޓްގެ ތެރެއިން، 2019 ވަނަ އަހަރު 140 ފްލެޓް ވަނީ ދޫކޮށްފައެވެ.

ފުވައްމުލަކު ސިޓީ ކައުންސިލުން ބުނީ ފުވައްމުލަކުގައި ޢިމާރާތްކޮށްފައިވާ 200 ފްލެޓްގެ ތެރެއިން، ބާކީ ހުރި ފްލެޓްތަކަށް އެދި ފޯމް ހުށަހަޅާފައިވާ ފަރާތްތަކުގެ ތެރެއިން، ޝަރުޠު ހަމަވެފައިވާ ފަރާތްތަކަށް ޕޮއިންޓް ދެވިފައިވާ ގޮތުގެ ވަގުތީ ލިސްޓް ޢާންމުކޮށް ކައުންސިލަށް ލިބިފައިވާ ޝަކުވާތަކަށް ބަލައި ޕޮއިންޓް ލިސްޓް އިސްލާޙް ކުރުމަށްފަހު ދާއިމީ ލިސްޓް އިއުލާންކޮށްފައިވާ ކަމަށެވެ. އަދި އެލިސްޓް މިއިދާރާގެ ނޯޓިސް ބޯޑުގައި ބެހެއްޓިފައިވާކަން ވެސް އެއިދާރާއިން ހާމަކުރެއެވެ.

ރައީސް ސޯލިހު ސަރުކާރުގެ ބޯހިޔާވަކަމުގެ ޕްރޮގްރާމްގެ ދަށުން ފުވައްމުލަކުގައި އިތުރު 800 ހައުސިން ޔުނިޓް އަޅަން ވެސް ވަނީ ނިންމައިފައެވެ.