ކޮވިޑް-19: އާސަންދައިން އޮންލައިން ކްލިނިކްތަކެއް ގާއިމްކޮށްފި
15 އެޕްރީލު 2020 | ބުދަ 19:56އޮންލައިން ކްލިނިކްތަކެއް ގާއިމްކުރީ ގޭގައި ތިބެގެން ޚިދުމަތްތައް ހޯދުމަށް މަގުފަހިކޮށްދިނުމަށް
އާސަންދަ އޮފީސް
ކޮވިޑް-19އާ ގުޅިގެން އާސަންދައިން އޮންލައިން ކްލިނިކްތަކެއް ގާއިމްކޮށްފިއެވެ.
އާސަންދައިން ބުނީ މާލެއިން ކޮވިޑް19 އަށް މީހަކު ޕޮޒިޓިވްވެ، ކޮންޓެކްޓް ޓްރޭސިންއަށް މާލެ ލޮކްޑައުން ކޮށްފައިވާ މިޙާލަތުގައި އާސަންދައާއި ޚިދުމަތްދޭ މަރުކަޒުތަކާއި ގުޅިގެންވަނީ އޮންލައިން ކްލިނިކްތަކެއްގެ އިންތިޒާމު ހަމަޖައްސާފައިވާ ކަމަށެވެ.
އޮންލައިންކޮށް ޚިދުމަތްދޭން ހުޅުވާލި ކްލިނިކްތަކުގެ ތެރޭގައި އޭޑީކޭ، ކުލުނު މެޑިކަލްސް، ޕްރައިމެކްސް މެޑިކެއާ، ފެމެލީ ކެއާ، އިމޭޖް ސެންޓަރު، އެއިމްސް ޑައިގްނޯސްޓިކް ސެންޓަރު، އިންސްޓްޓިއުޓް އޮފް މެންޓަލް ވެލް ބިން، އައިކެއާ ހޮސްޕިޓަލް، ފަސްޓް ކެއާ މެޑިކަލް ސެންޓަރު، ސެނެހިޔާ ހޮސްޕިޓަލް ހިމެނެއެވެ.
އާސަންދައިން ބުނީ ކްލިނިކްތަކުގެ މަގްސަދަކީ ހޮސްޕިޓަލްތަކަށް މީހުން ދިއުމުގެ ބަދަލުގައި ގޭގައި ތިބެގެން ހިދުމަތްތައް ހޯދުމަށް މަގުފަހިކޮށްދިނުން ކަމަށެވެ.
މިހާލަތުގައި ހުރިހާ މީހުން ވެސް އަމިއްލަ އަދި މުޖުތަމަޢުގެ ރައްކާތެރިކަމަށް އިސްކަންދީ، ކެތްތެރިކަމާއެކު ގޭގަ މަޑުކޮށް، އެޗްޕީއޭ އާއި ކަމާ ގުޅުންހުރި އިދާރާތަކުން ދޭ އިރުޝާދާ އެއްގޮތަށް އަމަލުކުރުމަށް އާސަންދައިން ވަނީ އިލްތިމާސްކޮށްފައެވެ.
