އީމެއިލް މެދުވެރިކޮށް، އާދިއްތަ ދުވަހުން ފެށިގެން ޕާސްޕޯޓަށް އެދެވޭ ގޮތް އިމިގްރޭޝަނުން ހަދައިފިއެވެ.
ޕާސްޕޯޓަށް އެދި ހުށަހަޅާ ލިޔުންތައް ފޮނުވަން ޖެހޭނީ އީމެއިލްގެ ސަބްޖެކްޓްގައި، ޕާސްޕޯޓަށް އެދޭ ފަރާތުގެ ފުރިހަމަ ނަމާއި އައިޑީކާޑު ނަމްބަރާއި ގުޅޭނެ ނަމްބަރު ހިމެނޭ ގޮތަށެވެ.
އީމެއިލް މެދުވެރިކޮށް ޕާސްޕޯޓަށް އެދޭއިރު ޕާސްޕޯޓަށް އެދޭ ފޯމާއި އައިޑީކާޑުގެ ކޮޕީ އާއި 10 ރުފިޔާގެ އިތުރުން އެންމެ ފަހުން ހަދާފައިވާ ޕާސްޕޯޓްގެ ޑޭޓާ ޕެކޭޖްގެ ކޮޕީ އާއި ޕާސްޕޯޓް ސައިޒްގައި އެއް މަސް ހަމަނުވާ ފޮޓޯއެއް ހުށަހަޅަން ޖެހޭނެ ކަމަށް އެ އިއުލާނުގައިވެ އެވެ.
އިމިގްރޭޝަން ކޮންޓްރޯލާ މުހައްމަދު އަހުމަދު ހުސައިން (ހަނަފީ) ރާއްޖެއެމްވީއަށް ދެއްވި އިންޓަވިއުއެއްގައި ވިދާޅުވީ އޮންލައިންކޮށް ޕާސްޕޯޓަށް އެދެވުނުކަމުގައި ވިއަސް ޕާސްޕޯޓް ދޫކުރާނީ މާލެއާއި އައްޑޫސިޓީ، ފުވައްމުލަކު ސިޓީ އަދި ކުޅުދުއްފުށިން ކަމަށެވެ. ޕާސްޕޯޓް ދޫކުރުމުގެ ހިދުމަތްދޭ ކޮންމެ މަރުކަޒަކުން ޕާސްޕޯޓް ނަގަން ވެސް އެދެވޭނެ ކަމަށް އޭނާ ވިދާޅުވިއެވެ.
"އަޅުގަނޑުމެންނަށް ޕާސްޕޯޓު ކަންކަމަށް އީމެއިލް މެދުވެރިކޮށް ރައްޔިތުންނަށް މި ހުޅުވާލީ ވަރަށްގިނަ ދަތިތަކާއި ކުރިމަތިލާ ދެއްތޯ މިހާރު އޮންނަ ގޮތުން ވެއްޖިއްޔާ. އެއީ އެބޭފުޅަކު ވަޑައިގަންނަވާ ޕާސްޕޯޓު ހެދެންދެން އެބޭފުޅާ މާލޭގައި ހުރުމާއި މިހުރިހާ ކަންކަން. މި ހުޅުވާލުމުން ފަސޭހަވެގެންދާނެ ޕާސްޕޯޓަށް އެޕްލައި ކުރެވޭނެ އީމެއިލުން. އީމެއިލުން އެޕްލައިކުރުމަށްފަހު މިކޮޅުން ރިޕްލައިކުރައްވާނެ މިވެނި ދުވަހެއްގައި ވަޑައިގެން މިވެނި ދުވަހެއްގައި ފައިސާ ދައްކާލުމަށް." މުހައްމަދު އަހުމަދު ހުސައިން ވިދާޅުވިއެވެ.
ޕާސްޕޯޓު ހެއްދުމަށް އޮންލައިންކޮށް އެދުނު ކަމުގައި ވިއަސް ފައިސާ ދެއްކުމާއި ރެވެނިއު ސްޓޭމްޕް ހަވާލުކުރަންޖެހޭނީ އިމިގްރޭޝަނަށެވެ. ސްޓޭމްޕާއި ފައިސާ އެހެން މީހަކަށް ވެސް ހަވާލު ކުރެވިދާނެވެ. އަދި އޮންލައިންކޮށް އެދުނުކަމުގައި ވިއަސް ޕާސްޕޯޓް ބަލާ ދާންޖެހޭނީ އޭގެ ވެރިފަރާތެވެ.
"ކޮންމެހެން އެޕްލައިކުރާ ބޭފުޅާ ވަޑައިގަންނަވާކަށް ނުޖެހޭނެ ފައިސާ ދައްކަން ވިއަސް. ރައްޓެއްސެއް ނުވަތަ ތިމާގެ މީހެއް ވިއަސް ހަމަ ފޮނުވާލައިގެން އެކަން ހަމަޖެހޭނެ. ސެކިއުރިޓީ ކޮންސާން އިޝޫއަކާހެދި ޕާސްޕޯޓް ކަހަލަ އެއްޗެހި ނަގަން މިޖެހެނީ ވެރިފަރާތް އައިސްގެން. ބަލާ އަންނަން ޖެހޭއިރު ވެރިފަރާތް އަންނަން ޖެހޭނެ. އައިސްސަ ބައޮމެޓްރިކްސްއާއި ސްކޭންކޮށް އެއަށްފަހު ޕާސްޕޯޓް ހަވާލުކުރެވޭނީ" މުހައްމަދު އަހުމަދު ހުސައިން ވިދާޅުވިއެވެ.
ޕާސްޕޯޓަށް އެދެވުން އިތުރަށް ފަސޭހަ ކުރުމަށްޓަކައި އޮންލައިން ޕޯޓަލް މެދުވެރިކޮށް ޕާސްޕޯޓު ހެދޭ ނިޒާމެއް މި އަހަރު ނިމުމުގެ ކުރިން ގާއިމުކުރަން މަސައްކަތް ކުރަމުން އަންނަ ކަމަށް ވެސް މުހައްމަދު އަހުމަދު ހުސައިން ވިދާޅުވިއެވެ.
އޭނާ ވިދާޅުވީ އޮންލައިންކޮށް ޕާސްޕޯޓަށް އެދެވޭ ގޮތަށް ހެދުމުން އާންމުންގެ ތަރުހީބު ބޮޑު ކަމަށެވެ. އެގޮތުން ސޯޝަލްމީޑިއާގައި ވެސް އެކަމަށް "ޕޮޒިޓިވް" ކޮމެންޓް ލިބެމުންދާ ކަމަށް ވިދާޅުވިއެވެ.
