ކޮވިޑް-19: ޕޮޒިޓިވްވި މިހާއާ ގުޅުންހުރި 54 މީހަކު އައިސޮލޭޝަނަށް
15 އެޕްރީލު 2020 | ބުދަ 14:25މާލެ ވަނީ 24 ގަޑިއިރަށް ލޮކްޑައުންކޮށްފައި
ބުދަ ދުވަހު އެންއީއޯސީން ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ ވާހަކަ ދައްކަވަނީ
ބުދަ ދުވަހު މާލެއިން ކޮވިޑް-19 އަށް ޕޮޒިޓިވްވި މީހާއާ ގުޅުން ހުރި 54 މީހަކު އެކަހެރިކޮށް ކޮށްފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
މާލެއިން ފުރަތަމަ ފަހަރަށް މީހަކު ޕޮޒިޓިވްވިކަން އެޗްޕީއޭ އިން ހާމަކޮށްފައިވަނީ ބުދަ ދުވަހުގެ ހެނދުނުގެ ވަގުތެއްގައެވެ. އެމީހާ ވަނީ މިހާރު އައިސޮލޭޝަނަށް ގެންގޮސްފައެވެ.
ދަރުބާރުގޭގައި ގާއިމްކޮށްފައިވާ ނެޝަނަލް އެމެޖެންސީ ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެޗްޕީއޭގެ މެޑިކަލްް އޮފިސަރު ޑރ. ނަޒްލާ ރަފީގް ވިދާޅުވީ، މާލެއިން މީހަކު ޕޮޒިޓިވްވުމާއި ގުޅިގެން ސަރވައިލެން އަދި ކޮންޓެކްޓް ޓްރޭސިންގެ ދަށުން މައިގަނޑު ދެކަމެއް ކުރެވެމުންދާ ކަމަށެވެ. އެގޮތުން ބަލި ޖެހުނު މީހާ އަށް އަލާމާތްތައް ފެނުމުގެ ދެ ދުވަސް ކުރިން ބައްދަލުވި މީހުން ހޯދުމުގެ މަސައްކަތް ކުރިޔަށްދާ ކަމަށް ވިދާޅުވިއެވެ. ޑރ. ނަޒްލާ ވިދާޅުވީ، މިހާތަނަށް ސީދާ ބަލި މީހާއާ ބައްދަލުވި 54 މީހަކު އައިސޮލޭޓް ކުރެވިފައިވާ ކަމަށެވެ.
ޑރ. ވިދާޅުވީ، ރައްކާތެރިކަމުގެ ފިޔަވަޅެއްގެ ގޮތުން ބަލިމީހާއާ އެންމެ ގާތްކޮށް އުޅުނު މީހުންނާ ކޮންޓެކްޓްވި މީހުން ލިސްޓު ހޯދަމުންދާ ކަމަށާއި، އެ ފަރާތްތައްވެސް ގޭގައި މަޑުކުރަން އަންގާފައިވާ ކަމަށެވެ. އޭނާ ވިދާޅުވީ، މާލޭގެ ހަތަރު ގެއަކާއި އެކި ގޮތް ގޮތުން ބަލިމީހާއާ ދިމާވީ މިހުންގެ މަސައްކަތާއި، ބަލި އަރާފައިވާ ގޮތްވެސް ހޯދުމުގެ މަސައްކަތް ވަރަށް ބާރު މިނެއްގައި އެޗްޕީއޭ އިން ކުރަމުންދާ ކަމަށެވެ.
ޑރ. ނަޒްލާ ވިދާޅުވީ، އަތޮޅުގެ ތެރެއިންވެސް އެ ކޭސްއާ ގުޅިގެން އައްޑޫ ސިޓީގެ ދެ މީހެއްގެ އިތުރުން ގދ. ވާދޫގެ ދެ މީހަކު ގާތުން ބަލަމުންދާ ކަމަށެވެ.
މާލެއިން ޕޮޒިޓިވްވި މީހާއާ ގުޅުން ހުރި މީހާގެ ޒާތީ މައުލޫމާތު ބައެއް މީހުން ގެންދަނީ ޝޯޝަލް މީޑިއާގައި ދައުުރު ކުރުވަމުންނެވެ. އެކަމާއި މެދު ކަންބޮޑުވުން ފާޅުކުރައްވަމުން ޑރ. ނަޒްލާ ވިދާޅުވީ، ބަލި މީހާގެ ނަން އެނގުމުން މީހަކު ރައްކާތެރިވެދާނެ ކަމަށް ހީކުރުމަކީ އެއީ އެންމެ ރަނގަޅު ވިސްނުމެއް ނޫން ކަމަށެވެ.
