ބޭރަށް ނުކުމެ އުޅެންޏާ ކަރަންޓީނު ކުރާނެ!
14 ދުވަހުގެ މުއްދަތަށް ކަރަންޓީނު ފެސިލީޓީއަކަށް ގެންދެވޭނެ
ފުލުހުން މަގުމަތީގައި ހަރަކާތްތެރިވަނީ
ލޮކްޑައުން ގަޑީގައި ގަވާއިދާ ޚިލާފަށް ބޭރަށް ނުކުމެ އުޅޭނަމަ ކަރަންޓީނު ފެސިލިޓީއަކަށް ގެންދާނެ ކަމުގެ އިންޒާރު އެސިސްޓެންޓް ކޮމިޝަނަރ އޮފް ޕޮލިސް އިސްމާއިލް ނަވީން ދެއްވައިފިއެވެ.
ނޫސްވެރިއަކު ކުރި ސުވާލަކަށް ޖަވާބުދެއްވަމުން ނަވީން ވިދާޅުވީ ކުރިއަށް ވުރެ މިހާރު އެޅޭ ފިޔަވަޅުތައް ވަރަށް ބޮޑަށް ހަރުކަށި ކުރެވޭނެ ކަމަށެވެ. އެގޮތުން ލޮކްޑައުން ގަޑީގައި އެއްވެސް ބޭނުމަކާއި ނުލާ ބޭރަށް ނުކުމެ އުޅޭނަމަ 14 ދުވަސް ވަންދެން ކަރަންޓީނު ފެސިލިޓީއަކަށް ގެންދާނެ ކަމަށް ވެސް ވިދާޅުވިއެވެ.
ނަވީން ވިދާޅުވީ ލޮކްޑައުން ކުރެވިފައިވާ މުއްދަތުގައި ޒަރޫރީ އެކިއެކި ކަންކަމުގައި ބޭރަށް ދާންޖެހިއްޖެނަމަ ކަން ކުރާނެ އުސޫލަކާއި އަދި ގުޅަންޖެހޭނެ ނަންބަރުތަކެއް ވަރަށް އަވަަހަށް އާންމު ކުރައްވާނެ ކަމަށެވެ. ގޭސް އަދި ފެން ޑެލިވަރީ ކުރުމާއި ގުޅިގެން ފުލުހުން ބުނީ ކުންފުނިތަކާއި ވާހަކަ ދެއްކިގެން ކަންކަން ކުރެވޭނެ އިންތިޒާމްތައް ރާވަމުންދާ ކަމަށެވެ. އަދި ޒަރޫރީ ބޭނުމެއްގައި ނޫނީ މާލެ ނައުމަށާއި، އެދެވިގެންވާނަމަ އެންމެ ކައިރި ރަށަކަށް އުޅަނދުތައް ބަނދަރު ކުރުމަށް ފުލުހުން ވަނީ އިލްތިމާސްކޮށްފައެވެ.
މާލެއިން ކޮވިޑް-19 ގެ ކޭސްއެއްފެނުމާއި ގުޅިގެން މާލެ ސަރަހައްދު 24 ގަޑިއިރަށް ލޮކްޑައުން ކޮށްފައިވާއިރު މީގެ ކުރިން، މާލެ، ހުޅުމާލެ، އަދި ވިލިމާލޭގައި 3 ގަޑިއިރުގެ ކަރފިއުއެއް ހިންގާފައިވެއެވެ. ކަރފިއު ހިންގިއިރު އެޅުނު ފިޔަވަޅުތަކަށް ވުރެ މިހާރު އަޅާ ފިޔަވަޅުތައް ހަރުކަށިވާނެ ކަމަށް ފުލުހުން ވަނީ ބުނެފައެވެ.
