މިއަހަރު އަންނާނެކަމަށް މިހާރު ލަފާކުރެވެނީ 845،000 ފަތުރުވެރިން: މިނިސްޓަރު އަމީރު
15 އެޕްރީލު 2020 | ބުދަ 13:09މިއީ ފަތުރުވެރިން ރާއްޖެއަށް މިއަހަރު ޒިޔާރާތްކުރަނެކަމަށް ކުރިން އަންދާޒާކުރި މިންވަރަށްވުރެ 50 ޕަސެންޓް ދަށް އަދަދެއް
ފިނޭންސް މިނިސްޓަރު އިބްރާހީމް އަމީރު
މިއަހަރު ރާއްޖެއަށް ފަތުރުވެރިން ޒިޔާރާތްކުރާނެކަމަށް ކުރިން އަންދާޒާކުރި އަދަދަށް ވުރެ ދެގުނަ ދަށަށްދާނެ ކަމަށް ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެ އެވެ.
ރައްޔިތުންގެ މަޖިލީހުގެ އިގްތިޞާދީ ކޮމެޓީއަށް މައުލޫމާތު ހިއްސާކުރައްވަމުން ފިނޭންސް މިނިސްޓަރު އަމީރު ވިދާޅުވީ، މިއަހަރު ރާއްޖެއަށް ޒިޔާރާތްކުރާނެ ކަމަށް މިހާރު އަންދާޒާކުރެވެނީ 845،000 ފަތުރުވެރިން ކަމަށެވެ.
މިއަދަކީ، މިދިއަ 2019 އަވަނަ އަހަރު ފަރުވެރިން ރާއްޖެއަށް ޒިޔާރާތްކުރި އަދަދަށްވުރެ ދެ ގުނަ މަދު އަދަދެކެވެ. މިދިއަ އަހަރު ރާއްޖެއަށް 1.7 މިލިއަނަށްވުރެ ގިނަ ފަތުރުވެރިން ރާއްޖެއަށް ޒިޔާރަތް ކޮށްފައި ވެއެވެ. އެގޮތުން މިއަހަރު ރާއްޖެއަށް ފަތުރުވެރިން ޒިޔާރާތްކުރާނެ ކަމަށް ކުރިން އަންދާޒާކޮށްފައިވަނީ 1.7 ފަތުރުވެރިންނަށްވުރެ މަދުނުވާނެ ކަމަށެވެ. އަދި ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ މިއަހަރުގެ ރިޔާސީ ބަޔާނުގައި ވެސް ވިދާޅުވެފައިވަނީ އެމަނިކުފާނުގެ ފަސް އަހަރުގެ ވެރިކަން ނިމޭއިރު، ރާއްޖެއަށް ޒިޔާރަތްކުރާ ފަތުރުވެރިންގެ އަދަދު 2.5 މިލިއަނަށްވުރެ އިތުރުވެގެންދިއުމަކީ އެމަނިކުފާނުގެ އަމާޒުފުޅެއް ކަމަށެވެ.
ފިނޭންސް މިނިސްޓަރު އަމީރު ވިދާޅުވީ، ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 އާ ގުޅިގެން، 27 މާރޗްގައި އޮން އެރައިވަލް ވިސާ ދޫކުރުން ހުއްޓާލުމާއެކު ފަތުރުވެރިންކަން އެއްކޮށް ހުއްޓުމަކަށް އައިސްފައިވާކަމަށެވެ. ދަތުރުފަތުރު އަލުން ހުޅުވާލެވޭނެ ދުވަސް އަންދާޒާކުރަން އުނދަގޫވުމާއިއެކު މިއަހަރުގެ ތެރޭގައި ފަތުރުވެރިން ޒިޔާރަތްކުރާނެ މިންވަރު ދެނެގަތުމަށް ފިނޭންސް މިނިސްޓްރީ އާއި އިކޮނޮމިކް މިނިސްޓްރީ އަދި އެކިއެކި މުޢައްސަސާތައް ގުޅިގެން ކުރިމަތިވެދާނެ ހާލަތްތަކެއް ތައްޔާރުކޮށްފައިވާކަމަށް އަމީރު ވިދާޅުވި އެވެ.
މިނިސްޓަރ އަމީރު ވިދާޅުވީ މިއަހަރުގެ މާރޗްމަހު ރާއްޖެއަށް ޒިޔާރަތްކުރި ފަތުރުވެރިންގެ ނިސްބަތް 60 އިންސައްތަ ދަށްވެފައިވާކަމަށެވެ. އަދި މިހާތަނަށް ރާއްޖެ ޒިޔާރަތްކުރި ފަތުރުވެރިންގެ ޖުމްލަ އަދަދަކީ 382،000 ކަމަށް މިނިސްޓަރު ވިދާޅުވިއެވެ.
ރާއްޖެ ޒިޔާރަތްކުރާ ފަތުރުވެރިންގެ އަދަދު ދަށްވުމާއެކު ރިއަލް ޖީޑީޕީ 11.5 އިންސައްތަ ދައްވާނެކަމަށް ފިނޭންސް މިނިސްޓްރީން އަންދާޒާކުރެއެވެ.
ރާއްޖެއަށް ލިބޭ ބޭރުފައިސާގެ ބޮޑުބައެއް އަދި ދައުލަތަށް ލިބޭ އާމްދަނީގެ ބޮޑު ބައެއް ހިއްސާކުރަނީ ފަތުރުވެރިކަމުގެ ދާއިރާއިން ނެވެ. އެގޮތުން ރާއްޖެއަށް ލިބޭ އާމްދަނީގެ 80 ޕަސެންޓް ހިއްސާކުރަނީ ފަތުރުވެރިކަމުގެ ދައިރާއިން ނެވެ.
