ރާއްޖެއިން ޕޮޒިޓިވްވި މީހާ ފްލޫ ކްލިނިކަށް ދެއްކީ ރޭގައި: އެޗްޕީއޭ
މިކަން ކަށަވަރުވުމާއިއެކު ރެޕިޑް ރެސްޕޮންސް ޓީމުން ޙަރަކާތްތެރިވާން ފެށި
މާލެއިން ޕޮޒިޓިވްވި މީހަކު ފެނުމާ ގުޅިގެން ރެޕިޑް ރެސްޕޮންސް ޓީމުން ކޮންޓެކްޓް ޓްރޭސިންގގައި ހަރަކާތްތެރިވަނީ
ކޮވިޑް-19 އަށް ރާއްޖެއިން ޕޮޒިޓިވްވި މީހާ ބަލިވެގެން ފްލޫ ކްލިނިކަށް ދައްކާފައިވަނީ އަންގާރަ ދުވަހުގެރޭގެ ވަގުތެއްގައި ކަމަށް އެޗްޕީއޭއިން ބުނެފިއެވެ.
ބުދަ ދުވަހު އެޗްޕީއޭއިން ނެރުނު ބަޔާނެއްގައި ބުނީ، ކޮވިޑް-19 އަށް ޕޮޒިޓިވް މީހަކު މާލެއިން 15 އެޕްރީލް 2020 (ބުދަ ދުވަހު) ފެނިފައިވާއިރު، މިކަން ކަށަވަރުވެފައިވަނީ ރޯގާގެ އަލާމާތްތައްފެނިގެން މިމަހު 14 ވަނަ ދުވަހު މާލެހިޔާ ކައިރީ ހުންނަ ފުލޫ ކްލިނިކަށް ދެއްކި ދިވެއްސެއް ކޯވިޑް-19 އަށް ޓެސްޓުކުރުމުން ކަމަށެވެ.
އެގޮތުން މިކަން ކަށަވަރުވުމާއިއެކު ރެޕިޑް ރެސްޕޮންސް ޓީމުން ޙަރަކާތްތެރިވާން ފަށާފައިވާ ކަމަށާއި، މިމަޢުލޫމާތު އެމީހާއަށް އެންގުމަށްފަހު ވަގުތީގޮތުން ސަރަޙައްދު ބަންދުކޮށް އޭނާ ދިރިއުޅޭ ގެ ކަރަންޓީނުކޮށްފައިވާ ކަމަށް އެޗްޕީއޭއިން ބުނެއެވެ.
އަދި ކޮންޓެކްޓް ޓްރޭސިންގ ހެދުމުގެ މަސައްކަތްތައް ކުރަމުންދާ ކަމަށާއި، ޕޮޒިޓިވް ވި ފަރާތް މިހާރު ވަނީ އައިސޮލޭޝަން ފެސިލިޓީގައި އެކަހެރިކުރެވިފައި ކަމަށް އެޗްޕީއޭގެ ބަޔާނުގައި ބުނެފައިވެއެވެ.
އެޗްޕީއޭއިން އިތުރަށް ބުނީ، މިހާތަނަށް ބެލިބެލުމުގައި ރާއްޖެއިން ބޭރަށް އެމީހާ ދަތުރުކޮށްފައި ނުވާކަން ފާހަގަކުރެވިފައިވާ ކަމަށެވެ. އަދި ކޮވިޑް-19 އާއި ގުޅިގެން ހެލްތު ޕްރޮޓެކްޝަން އެޖެންސީން ދެމުންދާ އިރުޝާދުތަކާއި އެއްގޮތަށް ޢަމަލުތައް ބެހެއްޓުމަށް އިލްތިމާސްކުރާ ކަމަށާއި، މިގޮތުން ކޮންމެހެން ބޭނުންވެއްޖެ ޙާލަތެއްގައި ނޫނީ ބޭރަށް ނުނިކުތުމާއި، އިޖުތިމާޢީ ގައިދުރުކަން ދެމެހެއްޓުމަށް އިތުރަށް ސާމާލުވުމަށް ވަނީ އެދިފައެވެ.
