ސިއްހީ ދާއިރާގައި މަސައްކަތް ކުރާ މީހުންނަށް ހާއްސަ އެލަވަންސެއް ހަމަޖައްސެމުގެ މަސައްކަތް ދަނީ ކުރަމުން: މަބްރޫކް
ސިއްހީ ދާއިރާގައި މަސައްކަތްކުރާ މީހުންނަކީ މިކަމުގައި ބުރަކޮށް މަސައްކަތްކުރާ އަދި މުހިންމު މަސައްކަތްތަކެއްކުރާ ބައެއްކަމަށް މަބްރޫކް ވިދާޅުވި
ކޮވިޑް-19 އާއި ގުޅިގެން އެންމެ ބުރަކޮށް މަސައްކަތްކުރާ އެއްބަޔަކީ ސިއްހީ ދާއިރާގެ މީހުން
ސިއްހީ ދާއިރާގައި މަސައްކަތް ކުރާ މީހުންނަށް ހާއްސަ އެލަވަންސް ޕޮލިސީއެއް އެކުލަވާލުމުގެ މަސައްކަތް ފަށައިގެން ކުރިޔަށްދާ ކަމަށް ނޭޝަނަލް އިމަޖެންސީ އޮޕަރޭޝަން ސެންޓަރު (އެންއީއޯސީ) ތަރުޖަމާން މުހައްމަދު މަބްރޫކް އަޒީޒް ވިދާޅުވެއްޖެއެވެ.
ސޯޝަލް މީޑިޔާގައި ސިއްހީ ދާއިރާގައި މަސައްކަތްކުރާ މީހުންގެ މުސާރަ ކުޑަކުރިކަމަށް ދެކެވޭ ވާހަކައަށް ރައްދުދެއްވަމުން މަބްރޫކް ވިދާޅުވީ ކޮވިޑް-19 އާއި ގުޅިގެން ސަރުކާރު އޮފީސްތައް މިވަގުތު ބަންދުކޮށްފައި ހުރުމުން ސަރުކާރު އޮފީސްތަކުގައި މަސައްކަތްކުރާ ގިނަ މީހުން މަސައްކަތްކުރަމުން އަންނަނީ ގޭގައި ތިބެގެންކަމަށެވެ. އަދި ވަކި ދާއިރާތަކުގައި މަސައްކަތްކުރާ މީހުން ވަކިން ޚާއްސަކޮށް މުހިންމު ޚިދުމަތްތައް ދޭ ފަރާތްތަކުން އޮފީހަށް ނިކުމެ މަސައްކަތްކުރަމުންދާ ކަމަށް މަބްރޫކް ވިދާޅުވިއެވެ.
އަދި ސިއްހީ ދާއިރާގައި މަސައްކަތްކުރާ މީހުންނަކީ މިކަމުގައި ބުރަކޮށް މަސައްކަތްކުރާ އަދި މުހިންމު މަސައްކަތްތަކެއްކުރާ ބައެއްކަމަށް މަބްރޫކް ވިދާޅުވިއެވެ.
ސަރުކާރުން މިފަދަ އެލަވަންސެއް ތައާރަފުކުރުމުގެ މަސައްކަތް ކުރަމުން އަންނަ ކަމަށް މަބްރޫކް ވިދާޅުވެފައިވާއިރު މި ދަނޑިވަޅުގައި ސިއްހީ ދާއިރާގައި މަސައްކަތްކުރާ ބޭފުޅުންނަށް ރަނގަޅު އެހީއެއް ވެދެއްވާނެ ކަމަށް ރައީސް އިބްރާހިމް މުހައްމަދު ޞާލިޙުވެސް ވަނީ އެމަނިކުފާނު އެންމެ ފަހުން ނޫސްވެރިންނާ ބައްދަލުކުރައްވާ ވާހަކަދެއްކެވި ދުވަހު ވިދާޅުވެފައެވެ.
ސިއްހީ ދާއިރާގައި މަސައްކަތްކުރާ ފަރާތްތަކަށް ދެވޭ މުސާރަ ކުޑަވެފައިވާކަމަށް ވާހަކަ ދެކެވިފައިވަނީ އިންދިރާ ގާންދީ މެމޯރިއަލް ހޮސްޕިޓަލުން ނެރެފައިވާ އިންޓަރނަލް މެމޯއެއްގައި ކޮވިޑް-19 އާއި ގުޅިގެން މާރޗް 19 އިން ފެށިގެން ސަރުކާރުގެ އޮފީސްތައް ބަންދުކުރުމަށް ރައީސުލްޖުމްހޫރިއްޔާ ނިންމާފައި ވީނަމަވެސް، ނަރުހުންނަށް މުސާރަ ދިނުމަށް ނިންމާފައިވަނީ ރަސްމީ ދުވަސް ދުވަހުވެސް ޢަމަލުކުރާ ފަދައިން އެމުވައްޒަފެއްގެ ޑިއުޓީ ގަޑީގެ މަސައްކަތް ކޮށްފައިވާ ގަޑިތަކަށްކަމުގައިވާ މެމޯ އަކާ ގުޅިގެންނެވެ. އެއީ ދުވާލަކު 8 ގަޑިއިރަށްވުރެން އިތުރަށް މަސައްކަތްކޮށްފައިވާ ވަގުތުތަކަށް އަދި އެހެނިހެން މުވަޒަފުންނަށް ދުވާލަކު 6 ގަޑިއިރަށްވުރެން އިތުރަށް މަސައްކަތްކުރާ ނަމަ އެވަގުތަށް އިތުރުގަޑި ދެވޭނެކަމަށެވެ.
މިމެމޯ އާ ގުޅިގެން ސިއްހީ ދާއިރާގައި މަސައްކަތްކުރާ ފަރާތްތަކުން ވަނީ އެކަމުގެ ނުރުހުން ސޯޝަލް މީޑިޔާގައި ފާޅުކޮށްފައެވެ.
