މަހިބަދޫ ފަޅު ތެރޭގައި އަޅާފައިވާ 7 އުޅަނދެއްގައި ރޯވެ އަނދާހުލިވެއްޖެ

އދ މަހިބަދޫ ފަޅުތެރޭގައި އަޅާފައިވާ އުޅަނދުތަކުގައި ރޯވި އަލިފާންގަނޑު ނިއްވާލާފައިވާ ކަމަށް އެމްއެންޑީއެފުން ބުނެފިއެވެ.

އެމްއެންޑީއެފުން ބުނީ މި ޙާދިސާގެ ރިޕޯޓު ލިބުނީ ބުދަ ދުވަހުގެ ފަތިހު 05:45 ހާއިރު ކަމަށެވެ. މިޙާދިސާގައި މަހިބަދޫ ފަޅުތެރޭގައި އަޅާފައިވާ ފަސް ލޯންޗަކާއި، ދެ ޑިންގީއެއްގައި އަލިފާން ރޯވިކަމަށް އެމްއެންޑީއެފުން މަޢުލޫމާތުދެ އެވެ. ރޯވެފައިވަނީ ޕޮލިސް ލޯންޗަކާއި، އެއަތޮޅު ކައުންސިލް ލޯންޗާ،އި ސީ އެމްބިޔުލެންސް ލޯންޗް އަދި އެޗްއެމްއެޗް އައި ޓްރެވަލްސް ކިޔާ ދެ ލޯންޗެއްގެ އިތުރުން ދެ ޑިންގީއެއްގައި ކަމަށް އެމްއެންޑީއެފުން ބުނެއެވެ.

މިހާދިސާ އާ ގުޅޭގޮތުން "ރާއްޖެއެމްވީ" އަށް މަޢުލޫމާތު ދެއްވަމުން މަހިބަދޫ ކައުންސިލްގެ ރައީސް އަހުމަދު ޚަލީލު ވިދާޅުވީ އަލިފާނުގެ ޙާދިސާ ހިނގިކަން އެނގުނީ ފަތިހު 5:30 ހާއިރުކަމަށާއި އެހާދިސާ ހިނގިކަން އެނގުމާއެކު ރަށު ރައްޔިތުން ނިކުމެ އަލިފާން ނިއްވުމުގެ މަސައްކަތް ކޮށްފައިވާކަމަށެވެ. އަދި އެމްއެންޑީއެފުން އާއިރު އެއް ލޯންޗެއް ފިޔަވައި ހުރިހާ ލޯންޗެއްގައި ރޯވެފައިވާ އަލިފާންގަނޑު ނިއްވާލާފައިވާކަމަށް ޚަލީލު ވިދާޅުވިއެވެ.

ޚަލީލު އިތުރަށް ވިދާޅުވީ ރޯވެފައިވާ 7 ލޯންޗްވެސް އަނދާހުލިވެފައިވާ ކަމަށާއި ރޯވި އެޗްއެމްއެޗް އައި ޓްރެވަލްސް އަކީ މާލެ ދަތުރުކުރާ ދެ ލޯންޗުކަމަށެވެ. އޭގެތެރެއިން ބޮޑު ލޯންޗަކީ 45 މީހުންގެ ޖާގައިގެ ލޯންޗެއްކަމަށާއި ދެވަނަ ލޯންޗަކީ 38 މީހުންގެ ޖާގައިގެ ލޯންޗެއްކަމަށް އަހުމަދު ޚަލީލު ވިދާޅުވި އެވެ. އަދި އަލިފާން ރޯވި އެއް ޑިންގީގައި 20 ފޫޓް ހުންނާނެކަަމަށާއި އަނެއް ޑިންގީގައި 18 ފޫޓް ހުންނާނެކަމަށް ޚަލީލު ވިދާޅުވި އެވެ.

މިހާދިސާގައި އެއްވެސް މީހަކަށް އަނިޔާ ނުވާކަމަށް ޚަލީލު ވިދާޅުވިއެވެ. އަދި ޙާދިސާ ހިނގުމާއެކު އެޞަރަޙައްދުގައި އަޅާފައިވާ ލޯންޗުތައް އެހެން ޞަރަޙައްދަކަށް ގެންދިޔުމުގެ މަސައްކަތްކުރި ކަމަށް ޚަލީލު ވިދާޅުވިއެވެ.

ޚަލީލު ވިދާޅުވީ މިހާތަނަށް އާއިރު އަލިފާން ރޯވުމަށް ދިމާވި ސަބަބެއް ނޭންގޭކަމަށާއި އެކަން ކަމާބެހޭ ފަރާތްތަކުން ބަލަމުން އަންނަކަމަށެވެ. އަދި މިފަދަ ޙާދިސާއެއް ހިނގާފާނެކަމަށް ފުލުސް ސްޓޭޝަންގައި ލޯންޗުތައް އަޅާފައިހުންނަ ޞަަރަޙައްދަށްވާ ގޮތަށް ކެމެރާ ހަރުކޮށްފައި ހުންނާނެކަމަށް ޚަލީލު ވިދާޅުވިއެވެ.

ފަތިހު ރޯވި މިއަލިފާންގަނޑު ނިއްވާލެވުނީ ހެނދުނު 8:05 ހާއިރުކަމަށް އެމްއެންޑީއެފުން ބުނެއެވެ.