ދައުލަތުގެ އޮފީސްތަކުން ރޯދަ އިނާޔަތް ދޭން ހަމަޖެހިފައިވާ އެންމެ ފަހު ތާރީހަކީ 20 އޭޕްރިލް: ފިނޭންސް މިނިސްޓްރީ
ކޮންމެ މުސްލިމު މުވައްޒަފަކަށް ރޯދަ އިނާޔަތުގެ ގޮތުގައި ދޭނީ 3000 ރުފިޔާ
ވެލާނާ ބިލްޑިންގް
ދައުލަތުގެ އޮފީސްތަކުން މުވައްޒަފުންނަށް ރޯދަ އިނާޔަތް ދޭން ހަމަޖެހިފައިވާ އެންމެ ފަހު ތާރީޚަކީ މި މަހުގެ 20 ވަނަ ދުވަސް ކަމަށް ފިނޭންސް މިނިސްޓްރީން ބުނެފިއެވެ.
އެ މިނިސްޓްރީން ނެރުނު ދެންނެވުމެއްގައި ބުނެފައިވަނީ ވަޒީފާ އަދާކުރާ ކޮންމެ މުސްލިމު މުވައްޒަފަކަށް ރޯދަ އިނާޔަތުގެ ގޮތުގައި ދޭނީ 3000 ރުފިޔާ ކަމަށެވެ. އަދި މުސާރަ ލިބޭ ގޮތަށް އެއް ވަޒީފާއަށް ވުރެ ގިނަ ވަޒީފާ އަދާ ކުރާ މުވައްޒަފުންނަށް އިނާޔަތުގެ ފައިސާ ދޭ އިރު ހަމައެކަނި އެ މުވައްޒަފުގެ އަސާސީ ވަޒީފާ އޮންނަ އޮފީހަކުން އިނާޔަތުގެ ފައިސާ ދިނުމަށާއި އަދި އިތުރު ވަޒީފާ އަދާ ކުރާ އޮފީހުން އިނާޔަތުގެ ފައިސާ ނުދިނުމަށް ވެސް ފިނޭންސް މިނިސްޓްރީން ވަނީ އެދިފައެވެ.
މީގެ އިތުރުން އިނާޔަތުގެ ފައިސާ ދީފައިވާ މުވައްޒަފަކު، ރަމަޟާން މަހުގެ ތިންބައިކުޅަ އެއްބައި ފާއިތުނުވަނީސް ވަޒީފާ އިން ވަކިވެއްޖެނަމަ، ވަކިވާ ދުވަހާ ހަމައަށްވާ ފައިސާ ފިޔަވައި އިތުރުވާ ފައިސާ އެ މުވައްޒަފެއްގެ އަތުން ހޯދައި، އެ ފައިސާ އަނބުރާ ޖަމާކުރަންވާނެ ކަމަށް ވެސް ދެންނެވުމުގައިވެއެވެ.
ފިނޭންސް މިނިސްޓްރީން ބުނީ ދައުލަތުގެ އެކައުންޓިންގް ސޮފްޓްވެއަރ އެޗްއާރް މޮޑިއުލް ބޭނުންކޮށްގެން އޮފީސްތަކުން ރޯދަ އިނާޔަތުގެ ފައިސާ 17 އޭޕްރިލްގެ ކުރިން ސިސްޓަމަށް އަޕްލޯޑްކޮށް، އިނާޔަތުގެ ފައިސާ ޕޯސްޓް ކުރުމަށް އެދޭ ކަމަށެވެ.
ކޮވިޑް-19 އާ ގުޅިގެން ސަރުކާރުގެ އޮފީސްތައް ވަނީ ބަންދުކުރެވިފައެވެ. އަދި ގައިދުރުކަން ދެމެހެއްޓުމުގެ ގޮތުން ގިނަ އޮފީސްތަކުން އަންނަނީ އޮންލައިންކޮށް ޚިދުމަތް ދެމުންނެވެ.
ސަރުކާރުން ވެސް އިލްތިމާސް ކުރަމުން ގެންދަނީ ކޮންމެހެން ޒަރޫރީ ބޭނުމެއްގައި ނޫނީ ގެއިން ބޭރަށް ނުދިޔުމަށެވެ.
