ރޯދައަށް އެސްޓީއޯއިން ކާޑުގެ ބާވަތްތަކާއި، ފިޔާ އަދި ބިސް ރާއްޖެ ގެނެސްފި

ކުރިއަށް އޮތް ރަމަޞާން މަހަށް، ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ކާޑުގެ ބާވަތްތަކާއި ފިޔާ އަދި ބިހުގެ ޝިޕްމަންޓެއް ރާއްޖެ ގެނެސްފިއެވެ.

އެސްޓީއޯ އިން ބުނީ މި ޝިޕްމަންޓް ގެނެސްފައިވަނީ "އެމްވީ ބޮންތި" ނަމަކަށް ކިޔާ ކާގޯ ބޯޓެއްގައި ކަމަށެވެ. އަދި ގެނެސްފައިވަނީ 5،000 ބަސްތާ ފިޔާ، 2،000 ކޭސް ބިސް، 990 މެޓްރިކް ޓަނުގެ ހަނޑޫ އަދި 830 މެޓްރިކް ޓަނުގެ ހަކުރު ކަމަށް އެސްޓީއޯ އިން ބުންޏެވެ. ރާއްޖެއެމްވީއަށް މައުލޫމާތު ދެއްވަމުން އެސްޓީއޯގެ މީޑިއާ އޮފިޝަލް އަބްދުﷲ މުޙައްމަދު ވިދާޅުވީ މި މަހުގެ 23 ވަނަ ދުވަހު ވެސް އެސްޓީއޯގެ ޕެރިޝަބަލް ޝިޕްމަންޓެއް ރާއްޖެ އަންނާނެ ކަމަށެވެ.

އެސްޓީއޯ ބުނާ ގޮތުގައި އެކުންފުނިން މަސައްކަތް ކުރަމުން އަންނަނީ ކާޑުގެ ބާވަތްތައް ކުރިއަށް އޮތް 10 މަސް ދުވަހަށް ހުސްނުވެ ލިބޭނެ ވަރަށް ރާއްޖެ ގެނެސް ރައްކާކުރުމަށެވެ.

އެސްޓީއޯ އިން ރޯދަމަހާއި ދިމާކޮށް ކާޑުގެ ބާވަތްތަކާއި ފިޔާ އަދި ބިހުގެ ޝިޕްމަންޓެއް ރާއްޖެ ގެނެސްފައިވާއިރު އެސްޓީއޯއިން ވިއްކަމުން އަންނަ ފިޔާ އަދި ބިހުގެ އަގު ބޮޑުތަނުން ވަނީ ހެޔޮކޮށްފައެވެ. އެގޮތުން ކުރިން 15 ރުފިޔާއަށް ވިއްކަމުން އައި ފިޔާ ކިލޯއެއް ދެން ވިއްކާނީ 11 ރުފިޔާއަށް ކަމަށް އެސްޓީއޯއިން ބުނެއެވެ. އަދި 325 ރުފިޔާއަށް ވިއްކަމުން އައި ފިޔާ ބަސްތާއެއް ދެން ވިއްކާނީ 255 ރުފިޔާއަށް ކަމަށް އެސްޓީއޯއިން ބުނެއެވެ.

މީގެއިތުރުން ބިސް ކުރިންވެސް ވިއްކަމުން އައިގޮތަށް ބިހެއް ވިއްކާނީ 1 ރުފިޔާ 50 ލާރިއަށް ކަމަށް އެސްޓީއޯއިން ބުނެއެވެ. ނަމަވެސް ބިސް ކޭހެއް ކުރިން ވިއްކަމުން އައި 290 ރުފިޔާގެ ބަދަލުގައި ދެން ވިއްކާނީ 260 ރުފިޔާއަށް ކަމަށް އެސްޓީއޯއިން ބުނެއެވެ.

އެސްޓީއޯއިން އަލުވި މިހާރު ވިއްކަމުން އަންނަނީ އަލުވި ކިލޯއެއް 12 ރުފިޔާއަށެވެ. އަދި އަލުވި ބަސްތާއެއް 250 ރުފިޔާއަށެވެ.

އެސްޓީއޯއިން ބުނެފައިވަނީ ރައްޔިތުންނަށް ބޭނުންވާވަރަށް މިތަކެތި ލިބެން ހުންނާނެ ކަމަށެވެ. އަދި އެސްޓީއޯއިން ވަނީ ފިޔާ އަލުވި ބިސް އީސްޓޯރ.އެމްވީ މެދުވެރިކޮށް ގޭގެ ތިބެގެން ފޯރުކޮށްދިނުމުގެ އިންތިޒާމުވެސް ހަމަޖައްސާފައެވެ.