ބިޒް މޮބައިލް ފިހާރަ ފަޅާލާ ވައްކަން ކުރި މައްސަލައިގައި 2 މީހަކު ހައްޔަރުކޮށްފި
މި މައްސަލައިގައި ހައްޔަރު ކުރެވުނު އެކަކީ ކަރެކްޝަންސްގެ ބެލުމުގެ ދަށުން ފަރުވާ ފުރިހަމަ ކުރުމަށް މުޖުތަމައުއަށް ދޫކޮށްލާފައި ހުރި މީހެއް
ބިޒް މޮބައިލްއިން ވަގަށް ނެގި ބައެއް ސާމާނު
ބިޒް މޮބައިލް ފިހާރަ ފަޅާލާ ގިނަ އަދަދެއްގެ ތަކެތި ވަގަށް ނެގި މައްސަލައިގައި 2 މީހަކު ހައްޔަރުކޮށްފިއެވެ.
ފުލުހުން ބުނީ މާޗް މަހުގެ 23 ވަނަ ދުވަހާއި 30 ވަނަ ދުވަހާ ދެމެދު ބިޒް މޮބައިލް ފިހާރަ ފަޅާލާ ވައްކަން ކޮށްފައިވާ މައްސަލަ ފުލުހުންނަށް ހުށަހަޅާފައި ކަމަށެވެ. އަދި މި މައްސަލައާއި ގުޅިގެން ފުލުހުން މިހާތަނަށް ބެލި ބެލުމުން 75،000 ދިވެހި ރުފިޔާއަށްވުރެ ގިނަ ފައިސާގެ ތަކެތި ވަގަށް ނަގާފައިވާކަމަށެވެ. އަދި އެ ތަކެތި ހޯދުމަށް ފުލުހުން މިހާތަނަށް ކުރި މަސައްކަތުން އޭގެ ތެރެއިން 62،000 އަށްވުރެ ގިނަ ފައިސާގެ ތަކެތި ހޯދާ ވެރިފަރާތާއި ހަވާލުކޮށްފައިވާ ކަމަށް ފުލުހުން ބުނެއެވެ. އަދި ބާކީ ހުރި ތަކެތި ހޯދުމުގެ މަސައްކަތް ކުރަމުންދާކަމަށް ފުލުހުން ބުނެއެވެ.
ފުލުހުން ބުނީ މި މައްސަލައާއި ގުޅިގެން މާޗް 30 ވަނަ ދުވަހު 36 އަހަރުގެ ދިވެހި ފިރިހެނަކު ފުލުހުންގެ ބެލުމުގެ ދަށަށް ގެނެސްފައިވާ އިރު، މާޗް 31 ވަނަ ދުވަހު 39 އަހަރުގެ ދިވެހި ފިރިހެނެއް ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ.
ފުލުހުން ބުނީ އެ ފިހާރައިން ވައްކަން ކުރި ކަމަށް އެ ދެމީހުން ވެސް އިއުތިރާފްވެފައިވާ ކަމަށެވެ. އަދި އެ ދެމީހުންގެ ތެރެއިން 39 އަހަރުގެ ދިވެހި ފިރިހެން މީހާއަކީ ކަރެކްޝަންސްގެ ބެލުމުގެ ދަށުން ފަރުވާ ފުރިހަމަ ކުރުމަށް މުޖުތަމައުއަށް ދޫކޮށްލާފައި ހުރި މީހަކަށް ވާތީ، އެ ފުރުސަތުގެ ބޭނުން ރަނގަޅުގޮތުގައި އޭނައަށް ނުހިފުނީކަމަށް ބަލާ، މާޗް 31 ވަނަ ދުވަހު އޭނާ ކަރެކްޝަނާއި ހަވާލުކޮށްފައިވާ ކަމަށެވެ.
މި މައްސަލަ ފުލުހުން އަންނަނީ ތަހުގީގު ކުރަމުންނެވެ.
