ބިދޭސީ މަސައްކަތްތެރިންނަށް އެކަމަޑޭޝަން ހަމަޖައްސައިދިނުމަށް އެކުލަވާލާފައިވާ އުސޫލަށް އަމަލުކުރަން ފަށާނީ އޮކްޓޯބަރު 13 ގައި ކަމަށް މިނިސްޓްރީ އޮފް އިކޮނަމިކުން ބުނެފިއެވެ.

މީގެ ކުރިން އިކޮނަމިކް މިނިސްޓްރީން ބުނެފައިވަނީ މި އުސޫލަށް އަމަލުކުރާނީ 11 އޮކްޓޯބަރުގައި ކަމަށެވެ. ނަމަވެސް އިއުލާނުގައި ކުށެއް އޮތުމުން އަލުން އިސްލާހުކޮށް އަންގާރަ ދުވަހު ވަނީ އަލުން މި އުސޫލު އާންމުކޮށްފައެވެ. މި އުސޫލު އާންމު ކުރުމާއެކު މިއަށް އަމަލުކުރުމަށް ނިންމަފައިވަނީ އުސޫލު އާންމު ކުރާ ތާރީހުން ފެށިގެން 6 މަސް ދުވަސް ފަހުންނެވެ.

މި އުޞޫލުގައިވާ މިންގަނޑުތަކާ އެއްގޮތަށް ނުހުންނަ އެކަމަޑޭޝަން ފެސިލިޓީތަކުގައި ބައިތިއްބާ ފަރާތްތަކާމެދު މި އުޞޫލުގައިވާ ގޮތުގެ މަތިން ފިޔަވަޅު އެޅޭނެކަމަށް ވެސް އިކޮނަމިކް މިނިސްޓްރީން ބުނެއެވެ.

މި އުޞޫލުގައިވާ ގޮތުން، ރާއްޖޭގައި ވަޒީފާ އަދާކުރާ ފަރާތްތައް ދިރިއުޅުމަށް ހަމަޖައްސައިދޭންޖެހޭ ތަންތަން ރަޖިސްޓްރީކުރަން ޖެހެއެވެ. އެގޮތުން ދިވެހިރާއްޖޭގައި ވަޒީފާ އަދާކުރާ ފަރާތްތައް ދިރިއުޅުމަށް ވަޒީފާދޭ ފަރާތުން ހަމަޖައްސައިދޭތަންތަން، ބިދޭސީ ފަރާތް ރާއްޖެ ގެނައުމަށް އެމްޕްލޯއިމަންޓް އެޕްރޫވަލްއަށް އެދުމުގެ ކުރިން، ބިދޭސީ ފަރާތަށް ހަމަޖައްސައިދެވޭ 'އެކަމަޑޭޝަން' އެކްސްޕެޓް ސިސްޓަމްގައި ރަޖިސްޓަރީ ކުރަންޖެހޭނެ ކަމަށް ބުނެފައިވެއެވެ. އަދި 'އެކަމަޑޭޝަން ރަޖިސްޓްރީ ކުރެވޭނީ ވަޒީފާ ދޭފަރާތުން އެކްސްޕޯޓް ސިސްޓަމުން 'އެކަމަޑޭޝަން ރަޖިސްޓްރޭޝަން ރިކުއެސްޓް' ގައި ވަޒީފާ އަދާކުރާ ފަރާތްތައް ދިރިއުޅުމަށް ހަމަޖައްސައިދޭ ތަނަކީ ވަޒީފާ ދޭފަރާތުގެ އަމިއްލަ ތަނެއްނަމަ ގޯތީގެ ރަޖިސްޓްރީގެ ކޮޕީ އާއި މި އިމާރާތުގައި ބިދޭސީ ފަރާތްތަކަށް އެކޮމަޑޭޝަން ހަމަޖައްސައިދޭކަން ބަޔާންކުރާ ލިޔުމެއް ހުށަހަޅަން ޖެހެއެވެ. އަދި ވަޒީފާ އަދާކުރާ ފަރާތްތައް ދިރިއުޅުމަށް ހަމަޖައްސައިދޭ ތަނަކީ ވަޒީފާ ދޭފަރާތުން ކުއްޔަށް ހިފާފައިވާ ތަނެއްނަމަ، ވަޒީފާ ދޭފަރާތުގެ ނަމުގައި ކުއްޔަށް ހިފާފައިވާ ރެންޓް އެގްރީމަންޓްގެ ކޮޕީ އަދި ފްލޯ ޕްލޭންގެ ކޮޕީ ހުށަހަޅަން ޖެހެއެވެ. މީގެ އިތުރުން އެތަނެއްގައި ހުރި ކޮޓަރީގެ ޢަދަދާއި އެނދުގެ ޢަދަދު އަދި ހުރި ވަޞީލަތްތަކުގެ މަޢުލޫމާތު ވެސް ހިމަނަން ޖެހެއެވެ.

މި އުޞޫލުގައި އެކަމަޑޭޝަން ދޭ ތަންތަނުގައި ހުންނަންޖެހޭ މިންގަނޑުތަކެއް ވެސް ވަނީ ހިމަނާފައެވެ. އެގޮތުން އެތަނެއްގައި އަލި ހުންނަންޖެހޭ ވަރާއި، ވައި ބޭރުވާނެ ގޮތަކާއި، ތަނުގެ ބޮޑު ކުޑަމިން އަދި ތިބެންޖެހޭ މީހުންގެ ޢަދަދު ވެސް ވަނީ ކަނޑައަޅާފައެވެ. މީގެ އިތުރުން ފާހާނާ، ފެނާއި ނަރުދަމާ، ކައްކާނެ އިންތިޒާމާއި، ސަލާމާތާއި ރައްކާތެރިކަން ހުންނަންޖެހޭ ގޮތް ވެސް މި އުޞޫލުގައި ވަނީ ހިމަނާފައެވެ.