ވީޑިއޯ ކޮންފަރެންސް މެދުވެރިކޮށް ޝަރީޢަތްތައް ކުރިއަށް ގެންދިއުމަށް ބޭނުންވާ 4 ސިސްޓަމް ޕްރޮސެކިއުޓަރ ޖެނެރަލް އޮފީސް (ޕީޖީ) އޮފީހުގައި ޤާއިމުކޮށްފިއެވެ.

އެކަމާ ގުޅޭގޮތުން ޕީޖީ އޮފީހުން ބުނީ، ވީޑިއޯ ކޮންފަރެންސް މެދުވެރިކޮށް ޝަރީޢަތްތައް ކުރިއަށް ގެންދިއުމަށް ބޭނުންވާ 4 ސިސްޓަމް ޕީޖީ އޮފީހުގައި މިހާރު ޤާއިމު ކުރެވިފައިވާ ކަމަށާއި، ބޭނުން ޖެހުނު މިންވަރަކުން އިތުރު 6 ސިސްޓަމް ގެނައުމުގެ މަސައްކަތް ކުރާނެ ކަމަށެވެ. އެގޮތުން އަންގާރަ ދުވަހުވެސް ބައެއް އަޑުއެހުންތައް ވީޑިއޯ ކޮންފަރެންސް މެދުވެރިކޮށް ކުރިއަށް ގެންގޮސްފައިވާ ކަމަށް ޕީޖީ އޮފީހުން ބުނެއެވެ.

އެކަމާ ގުޅޭގޮތުން އަންގާރަ ދުވަހު ޕްރޮސެކިއުޓަރ ޖެނެރަލް ޙުސައިން ޝަމީމް ކުރެއްވި ޓްވީޓެއްގައި ވިދާޅުވީ، ކޮވިޑް-19 އާއެކު "ދިރިއުޅުމަށް" ހޭނުމުގެ ގޮތުން ކުރަމުންދާ މަސައްކަތުގެ ތެރެއިން 4 ސިސްޓަމް ޕީޖީ އޮފީހުގައި ޤާއިމުކޮށްފައިވާއިރު، ޖިނާއީ ޢަދުލުގެ ނިޒާމުގެ މަސައްކަތްތައް ކުރިއަށް ގެންދިއުމުގައި ކަމާބެހޭ ފަރާތްތަކާއި ގުޅިގެން މަސައްކަތްތައް ކުރިއަށް ގެންދިއުމަށް ތައްޔާރުވެ ތިއްބެވި ކަމަށެވެ.

އަދި އެކުގައި މަސައްކަތް ކޮށްގެން މި ދަނޑިވަޅުގައި ރައްކާތެރި ވެވިދާނެކަންވެސް ޕީޖީގެ ޓްވީޓުގައި ފާހަގަކުރައްވާފައިވެއެވެ.

ކޮވިޑް-19 އާއި ގުޅިގެން ސުޕްރީމް ކޯޓުން އެކުލަވާލި ޚާއްޞަ ޤަވާއިދެއްގެ ދަށުން، ވީޑިއޯ ކޮންފަރެންސް މެދުވެރިކޮށް ޝަރީޢަތް ކުރުމުގެ ނިޒާމަކީ ޢަދުލުގެ ނިޒާމަށް ލިބިގެންދާނެ ބޮޑު ކުރިއެރުމެއް ގޮތުގައި ޕީޖީ ވަނީ މީގެ ކުރިންވެސް ސިފަ ކުރައްވާފައެވެ. އަދި މިއަހަރުގެ ތެރޭގައި ޕީޖީ އޮފީހުގައި ވީޑިއޯ ކޮންފަރަންސް 10 ސިސްޓަމް ޤާއިމު ކުރުމަށް ނިންމަވާފައިވާއިރު، އެއީ ޚަރަދު ކުޑަވާނެ ކަމެއްކަމަށާއި ވަގުތު ސަލާމަތްކުރުމުގެ ގޮތުންވެސް ކުރަން ރަނގަޅު ކަމެއް ކަމަށް ޕީޖީ ވިދާޅުވެފައިވެއެވެ.