ދުނިޔޭގެ އެންމެ ބާރުބޮޑު ވައިގެ ބަނދަރުތަކުގެ ތެރޭގައި ހިމެނޭ، އިނގިރޭސިވިލާތުގެ ލަންޑަން ހީތްރޯ އެއަރޕޯޓަށް އަންނަ ދަތުރުވެރިންގެ ޢަދަދު އެޕްރީލް މަހުގެތެރޭގައި 90 އިންސައްތަ ދަށަށް ދާނެކަމަށް އަންދާޒާ ކޮށްފިއެވެ.

ކޮވިޑް-19 އާ ގުޅިގެން އެއް ޤައުމުން އަނެއް ޤައުމަށް ދަތުރުކުރުން ވަނީ ގާތްގަނޑަކަށް އެއްކޮށް ކަހަލަ ގޮތަކަށް ހުއްޓުމަކަށް އައިސްފައެވެ. އަދި މި ޙާލަތާއި ގުޅިގެން ދަތުރުފަތުރުގެ ސިނާޢަތަށް އަންނަނީ ހީވެސް ނުކުރާވަރުގެ ބޮޑެތި ގެއްލުންތަކެއް ވަމުންނެވެ.

ނިމިދިޔަ މަރޗް މަހުގެ ޢަދަދުތައް ހާމަކުރަމުން ހީތްރޯ އިން ބުނެފައިވަނީ، މިދިޔަ އަހަރުގެ އެ މުއްދަތާ އަޅާ ބަލާއިރު، ފަސިންޖަރުންގެ ޢަދަދު 52 އިންސައްތަ ދަށަށް ގޮސްފައިވާ ކަމަށެވެ. މިހާރު އަންނަ ފަސިންޖަރުންގެ ތެރޭގައި ގިނައީ ޤައުމަށް އަނބުރާ އަންނަ އިނގިރޭސި ރައްޔިތުންނެވެ.

ދަތުރުފަތުރުގެ ޑިމާންޑު ދަށަށް ދިއުމާއި ގުޅިގެން މި ވަގުތު ބޭނުންކުރަމުން ގެންދަނީ އެންމެ ރަންވޭއެކެވެ. އަދި ގިނައިން މިހާރު ހީތްރޯއަށް ޖައްސަނީ ކާގޯ ފްލައިޓްތަކެވެ. އަޔާޓާއިން އަންދާޒާކުރާ ގޮތުން، ދަތުރުފަތުރުގެ ސިނާޢަތައް 100 ބިލިއަން ޑޮލަރަށް ވުރެ ބޮޑު ގެއްލުމެއް ވާނެ އެވެ.