ސަރުކާރުގެ އެހީ ލިބޭ ކްރައިޓީރިއާއަށް ބަދަލުތަކެއް ގެންނަން ޖެހޭ: އެންބީއޭއެމް

ކޮވިޑް-19 އާ ގުޅިގެން މާލީ އިދާރާތައް މެދުވެރިކޮށް ވިޔަފާރިވެރިންނަށް ސަރުކާރުން ފޯރުކޮށްދޭ އެހީގެ ކްރައިޓީރިއާ ލުއިކޮށްދިނުމަށް ނެޝަނަލް ބޯޓިންގ އެސޯސިއޭޝަން އޮފް މޯލްޑިވްސް (އެންބީއޭއެމް) އިން ގޮވާލައިފިއެވެ.

ރާއްޖެޓީވީ ގެ ރާސްތާ ޕްރޮގުރާމުގައި ވާހަކަ ދައްކަވަމުން މިކަމަށް ގޮވާލެއްވީ އެންބީއޭއެމް ގެ ރައީސް އަޙްމަދު އަފްރާހެވެ. އޭނާ ވިދާޅުވީ، މިހާރު އޮތް އޮނިގަނޑުގެ ތެރެއިން ބައެއް ވިޔަފާރިތަކަށް އެހީ ލިބޭނެ މަގެއް ނެތް ކަމަށާއި، އެހެންކަމުން އެ ވިޔަފާރިތަކަށް ބޭނުންވާ މާލީ އެހީ ދިނުމަށް އެހީ ލިބޭ އޮނިގަނޑު (ކްރައިޓީރިއާ) އަށް ބަދަލުތަކެއް ގެންނަން ޖެހޭ ކަމަށް ޤަބޫލުކުރައްވާ ކަމަށެވެ.

މާލީ އެހީ ނުލިބޭ ވިޔަފާރިތަކުގެ މިސާލެއް ދެއްވަމުން އަފްރާހު ވިދާޅުވީ، މިދިޔަ އަހަރުގެ ފަހު ހަ މަހުގެ ތެރޭގައި ވަރަށް ރަނގަޅު ވިޔަފާރީގެ ޕްލޭނަކާއެކު ވިޔަފާރި ފެށި ވިޔަފާރިތަކެއް އުޅެދާނެ ކަމަށެވެ. އަދި މިހެން ފަށައިގަންނަ ވިޔަފާރިތަކުން ފުރަތަމަ ދުވަސްކޮޅު ގެއްލުމުގައި ހިންގަން ޖެހިދާނެ ކަމަށާއ، އެހެން ކަމުން މިހާރު އޮތް އޮނިގަނޑުގެ ތެރެއިން އެ ވިޔަފާރިތަކަށް އެހީއެއް ލިބޭނެ ގޮތެއް ނެތްކަމަށެވެ.

ޖުމުލަ ގޮތެއްގައި ސަރުކާރުން އަޅާފައިވާ ފިޔަވަޅުތައް ހަރުދަނާކަމަށް އެ ޖަމިއްޔާގެ ފަރާތުން ބައިވެރިވެލެއްވި ފަރާތްތަކުން ވަނީ ވިދާޅުވެފައެވެ. އަފްރާހުގެ އިތުރުން އެންބީއޭއެމްގެ ފަރާތުން އެ ޕްރޮގުރާމުގައި ބައިވެރިވެލެއްވީ އެންބީއޭއެމްގެ ނައިބު ރައީސް އިސްމާއިލް ޙަމީދު އަދި ޚަޒާންދާރު ޢަބްދުﷲ އިބްރާހީމެވެ.