ފިޔަވަތިހިޔާ އަށް އެހީވާން "އެންޓަބެކްސްގެ" ބިޔަ ކެމްޕޭނެއް ފަށައިފި

"ގިވް ހޯޕް، ރިސީވް ހޯޕް" ގެ ނަމުގައި ލޮޓަސްއިން އިސްނަގައިގެން ރާއްޖޭގެ ފެންވަރުގައި ކުރިއަށްދާ ބޮޑު ކެމްޕޭނެއް ފަށައިފި އެވެ.

މާބްލް ހޮޓެލްގައި މިއަދު ބޭއްވި ރަސްމިއްޔާތެގައި ލޮޓަސް ފިހާރައިގެ މެނޭޖިން ޑިރެކްޓަރު އިބްރާހިމް ޒައިނަލް ވިދާޅުވީ މިއީ މެލޭޝިއާގެ ލަމް ސޫން ކުންފުނީގެ އެންޓަބެކްސް އާއި ރާއްޖޭގެ ލޮޓަސް ފިހާރައާއި ޖެންޑާ މިނިސްޓްރީ ގުޅިގެން ހުޅުމާލޭގައި ހުންނަ ފިޔަވަތި ހިޔާ އަށް އެހީވުމުގެ ގޮތުން ފެށި ކެމްޕޭނެއް ކަމަށެވެ.

މިއީ ފަންޑް ރެއިޒިން ކެމްޕޭނެއް ކަމަށާއި މި ކެމްޕޭނުގެ ދަށުން ގަންނަ ކޮންމެ އެންޓަބެކްސް ޝަވާ ޖެލް ފުޅިއަކުން ދެ ރުފިޔާ ފިޔަވަތިހިޔާ އަށް އެހީވާން ހުޅުވާފައިވާ ފަންޑަށް ލިބޭނެ ކަމަށެވެ.

މިރަސްމިއްޔާތުގައި ވާހަކަ ދައްކަވަމުން ލަމް ސޫން އެޑިބަލް އޮއިލްގެ އެކްސްޕޯޓް ޑިވިޝަންގެ ޖެނެރަލް މެނޭޖަރ ސިއު ޔުއެންގ ހޭންގ ވިދާޅުވީ މި ކެމްޕޭނު ކުރިއަށް ގެންދަނީ މާދަމާއިން ފެށިގެން އޮގަސްޓް މަހުގެ 15 އާ ހަމައަށް ކަމަށާއި މިކެމްޕެއިންއިން ދެ ލައްކަ ރުފިޔާ ފަންޑްރައިޒް ކުރުމަށް ބޭނުންވާ ކަމަށެވެ. އަދި މިފަންޑްރައިޒްއިން ލިބޭ ހުރިހާ ފައިސާއެއް ޖަމާ ކުރާނީ ފިޔަވަތި ޗައިލްޑް ކެއާ އިންސްޓިޓިއުޝަނަށް ކަމަށްވެސް ސިއު ވިދާޅުވި އެވެ.

މި ކެމްޕޭނު ފެށުމުންވެސް އެންޓަބެކްސްގެ އަގަކަށް ވަކި ބަދަލެއް ނާންނާނެ ކަމަށް ލޮޓަސްއިން ބުންޏެވެ.

މި ރަސްމިއްޔާތުގައި ޖެންޑާ މިނިސްޓްރީގެ އިންސްޓިޓިއުޝަން މެނޭޖްމަންޓް އެންޑް ކޯޑިނޭޝަންގެ ހެޑް މުންޒިރު އިބްރާހިމް ވިދާޅުވީ އެންޓަބެކްސްގެ ކެމްޕޭނުގެ ސަބަބުން ފިޔަވަތި ހިޔާގައި މިހާރު ގާއިމް ކުރަން ފަށާފައިވާ އާލީ ޗައިލްޑްހުޑް އިންސްޓިޓިއުޝަން ބިނާ ކުރުމަށް ވަރަށް ބޮޑު އެހީތެރިކަމެއް ލިބިގެންދާނެ ކަމަށެވެ.

މިކަމުގައި ހުރިހާ ފަރާތްތަކުގެ އެހީތެރިކަން ފޯރުކޮށްދިނުމަށް މުންޒިރު އެދިވަޑައިގެންނެވި އެވެ.