ބެންގަލޫރް އަދި ކޮޗިންގައި ތިބި 152 ދިވެހިން ގެންނަނީ
14 އެޕްރީލު 2020 | އަންގާރަ 03:42ބަންގްލަދޭޝްގައި ތިބި ދިވެހިން ގެނައުމުގެ މަޝްވަރާތައް ދަނީ ކުރެވެމުން
މަބްރޫކް ނޫސްވެެރިންނާއެކު
ސަރުކާރުގެ ޚަރަދުގައި ބޭސްފަރުވާ އަށް އިންޑިއާގެ ކޮޗިން އަދި ބެންގަލޫރަށް ގޮސް ތިބި 152 ދިވެއްސަކު އަންގާރަ ދުވަހު ރާއްޖެ ގެނައުމުގެ މަސައްކަތް ކުރަމުންދާ ކަމަށް ސަރުކާރުން ބުނެފި އެވެ.
ހޯމަ ދުވަހުގެރޭ ނޭޝަނަލް އެމެޖެންސީ ސެންޓަރ (އެންއީއޯސީ) ގައިި ބޭއްވީ ނޫސްވެރިންގެ ބައްދަލުވުމުގައި ކޮވިޑް-19 ޓާސްކް ފޯހުގެ ތަރުޖަމާނު މަބްރޫކް އަޒީޒް ވިދާޅުވީ، އަންގާރަ ދުވަހު ރާއްޖެ ގެނައުމަށް ހަމަޖެހިފައިވަނީ އާސަންދަ މެދުވެރިކޮށް ބޭސްފަރުވާއަށް އިންޑިއާގެ ބެންގަލޫރްގެ އަދި ކޮޗިން އަށް ގޮސްތިބި މީހުން ކަމަށެވެ.
މަބްރޫކް ވިދާޅުވީ، ބަންގްލަދޭޝްގައި ތިބި ދިވެހިންގެ ރާއްޖެ ގެނައުމުގެ މަޝްވަރާތަކެއްވެސް ކުރިޔަށްދާ ކަމަށެވެ. ނަމަވެސް ކަނޑައެޅިގެން ސީދާ ދުވަހެއް ދަންނަވަން ދަތިކަމަށް ވިދާޅުވިއެވެ.
ކޮރޯނާވައިރަހުގެ ބިރާ ހެދި ރާއްޖެއަށް އަންނަ ހުރިހާ އެންމެން ކަރަންޓީނު ކުރަމުންދާއިރު، މަބްރޫކް ވިދާޅުވި ގޮތުގައި، ބޭރުގައި ތިބި ދިވެހިން ގެނެވޭނީ ކަރަންޓީނު ފެސިލިޓީގައި ޖާގަހުރި މިންވަރުންނެވެ.
އޭނާ ވިދާޅުވީ، ކުރިޔަށް އޮތް ތަނުގައިވެސް އާސަންދައާ އެންސްޕާ މެދުވެރިކޮށް ބޭސްކުރަން ބޭރުގެ ޤައުމުތަކަށް ގޮސްތިބި ފަރާތްތަކަށް ސަރުކާރުގެ އެހީ ލިބެމުންދާނެ ކަމަށެވެ.
ކޮވިޑް-19 އާ ގުޅިގެން ރާއްޖެއިން ބޭރުގައި ތިބި ދިވެހިންގެ ތެރެއިން 1500 މީހުން ވަނީ ގެނެސްފައެވެ.
