ކޮންމެހެން ރާއްޖެއަށް އަންނަން ނުޖެހޭނަމަ އެ ފުރުސަތު ހާލުގައި ހުރި މީހަކަށް ދޫކޮށްލައްވާ: މަބްރޫކް
ތިމާއަށް ވުރެ ހާލުގައި ހުރި މީހާއަށް އެފުރުސަތު ދިނުމަކީ ވަރަށް މުހިއްމުކަމެއް ކަން ފާހަގަކުރެއްވި
ކޮވިޑް-19 އާ ގުޅިގެން އުފައްދާފައިވާ ޓާސްކްފޯހުގެ ތަރުޖަމާނު މަބްރޫކް އަޒީޒު
ރާއްޖެއަށް ކޮންމެހެން އަންނަން ނުޖެހޭ ފަރާތެއް ނަމަ މި ދަނޑިވަޅުގައި ރާއްޖެ ނައިސް މަޑުކޮށްލައްވައި، އެ ފުރުޞަތު ހާލުބޮޑު ނުވަތަ އެކަމަށް ބޭނުން ޖެހިފައިވާ މީހަކަށް ދޫކޮށްލުމަށް ކޮވިޑް-19 އާ ގުޅިގެން އުފައްދާފައިވާ ޓާސްކްފޯހުގެ ތަރުޖަމާނު މަބްރޫކް އަޒީޒު އެދިވަޑައިގެންފިއެވެ.
ކޮވިޑް-19 އާ ގުޅޭ އެންމެ ފަހުގެ މަޢުލޫމާތު ހިއްސާކުރުމަށް ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ މި ދަނޑިވަޅަކީ ހުރިހާ ފަރާތްތަކަށްވެސް ދަތި އުނދަގޫ ދަނޑިވަޅެއް ނަމަވެސް ތިމާއަށް ވުރެ ހާލުގައި ހުރި މީހާއަށް އެފުރުޞަތު ދިނުމަކީ ވަރަށް މުހިއްމުކަމެއް ކަމަށެވެ. އަދި ސަރުކާރުން އެފަދަ ފަރާތްތަކަށްވެސް ދޭންޖެހޭ ހުރިހާ އެއްބާރުލުމެއް ދޭނެ ކަމަށް މަބްރޫކް ވިދާޅުވިއެވެ.
މަބްރޫކް ވަނީ ރާއްޖެ އަށް ކޮންމެހެން އަންނަން ޖެހޭ މީހާ ނޫން މީހުން މިވަގުތު ރާއްޖެ އައުމަށް ނުވިސްނުމަށް އެދިވަޑައިގެންފައެވެ. އަދި އެއަރޕޯޓަކަށް އައުމަށްވުރެ ބިރުވެރިކަމެއް މިވަގުތު ނެތް ކަމަށް ޑޮކްޓަރުންވެސް ވިދާޅުވަމުން ގެންދަވާކަން ވެސް އޭނާ ވަނީ ފާހަގަ ކުރައްވާފައެވެ.
މަބްރޫކް ވިދާޅުވީ މިވަގުތައް އެންމެ ރަނގަޅު ގޮތަކީ އެބަޔަކު ތިބި ތަނެއްގައި މަޑުކުރެވޭކަމުގައި ވަނީ ނަމަ އެތަނެއްގައި މަޑުކޮށްގެން ތިބުން ކަމަށެވެ. އަދި ސަރުކާރުގެ ފަރާތުން ދެވެން އޮތް ހުރިހާ އެހީތެރިކަމެއް އެފަރާތްތަކަށް ވެދެމުންދާނެ ކަމަށް މަބްރޫކް ވިދާޅުވިއެވެ.
ސަރުކާރުގެ ނިންމުމަކީ ގެނެވޭ އެންމެ ގިނަ މީހުން ވީ އެންމެ އަވަހަކަށް ރާއްޖެ ގެނައުން ކަމަށާއި ކޮންމެ ދެހަފުތާއަކުން 1140 މީހުން ގެނެވޭނެ ކަމަށް ބުނި ނަމަވެސް ވިސްނުމަކީ އެ ޢަދަދު އިތުރުކުރެވޭނެ އިންތިޒާމުތައް ރޭވުން ކަމަށް މަބްރޫކް ވިދާޅުވިއެވެ.
