އެޕޯލޯ ހޯލްޑިންގްސްގެ އޮފީސް ފަޅާލައި 1.7 މިލިއަނަށްވުރެ ގިނަ ރުފިޔާ ވަގަށް ނަގައިފި
13 އެޕްރީލު 2020 | ހޯމަ 17:35ފުލުހުންނަށް މި މައްސަލަ ރިޕޯޓްކޮށްފައިވަނީ ހޯމަ ދުވަހުގެ ވަގުތެއްގައި
މޯލްޑިވްސް ޕޮލިސް ސަރވިސްގެ ހެޑްކުއާޓަރސް
ރާއްޖޭގެ ވިޔަފާރި ކުންފުންޏެއްކަމަށްވާ އެޕޯލޯ ހޯލްޑިންގްސް ޕްރައިވެޓް ލިމިޓެޑްގެ އޮފީސް ފަޅާލައި 1.7 މިލިއަނަށްވުރެ ގިނަ ރުފިޔާ ވަގަށް ނަގައިފިއެވެ.
އެކަމާ ގުޅޭގޮތުން ފުލުހުންގެ މީޑިއާ އޮފިޝަލު ވިދާޅުވީ، ފުލުހުންނަށް މި މައްސަލަ ރިޕޯޓްކޮށްފައިވަނީ ހޯމަ ދުވަހުގެ ވަގުތެއްގައި ކަަމަށެވެ. އެގޮތުން އެޕޯލޯ ހޯލްޑިންގްސްގެ އޮފީސް ފަޅާލައި، އޮފީހުގައި ހުރި ތިޖޫރީން 1.7 މިލިއަން ރުފިޔާއާއި، 2200 އެމެރިކާ ޑޮލަރު ވަގަށް ނަގާފައިވާކަމަށް ރިޕޯޓްތައް ބުނެއެވެ.
ފުލުހުން ބުނީ މި މައްސަލައާއި ގުޅިގެން މިހާތަނަށް އެއްވެސް މީހަކު ހައްޔަރުކޮށްފައި ނުވާ ކަމަށެވެ.
މި މައްސަލަ ފުލުހުން ދަނީ އިތުރަށް ތަޙުޤީޤު ކުރަމުންނެވެ.
ފުލުހުންގެ ތަފާސްހިސާބުތައް ދައްކާގޮތުން މިއަހަރުގެ މިހާތަނަށް 1236 ވައްކަމުގެ މައްސަލަ ފުލުހުންނަށް ރިޕޯޓް ކުރެވިފައިވެއެވެ.
