އެރިޔަދޫއިން ދޫކޮށްލަން ނިންމާފައި ތިބި އެންމެންގެ ކަރަންޓީން މުއްދަތު އިތުރުކުރަނީ

އެރިޔަދޫއިން ދޫކޮށްލަން ނިންމާފައި ތިބި އެންމެންގެ ކަރަންޓީން މުއްދަތު އިތުރުކޮށްފައިވާ ކަމަށް ޓާސްކް ފޯހުގެ ތަރުޖަމާނު މަބްރޫކް އަޒީޒު ވިދާޅުވެއްޖެއެވެ.

ކޮވިޑް-19ގެ އެންމެފަހުގެ މައުލޫމާތު ހިއްސާކުރުމަށް ހޯމަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ ފިލިޕީންސްއިން އައި ދަރިވަރެއް ޕޮޒިޓިވްވުމާ ގުޅިގެން އެރިޔަދޫއިން ބަޔަކު ކަރަންޓީން ކުރެވިފައިވާ ކަމަށެވެ.

Advertisement

މަބްރޫކް ވިދާޅުވީ އެރިޔަދޫއިން ދޫކޮށްލަން ނިންމާފައި ތިބި އެންމެންގެ ކަރަންޓީގެ މުއްދަތު އިތުރުކުރުމަށް ނިންމާފައިވާ ކަމަށެވެ. އަދި އިތުރު ފިޔަވަޅުތައް އެޅުމާމެދު މަޝްވަރާ ކުރެވެމުންދާކަން ވެސް މަބްރޫކް ފާހަގަކުރެއްވިއެވެ.

އެރިޔަދޫގައި ކަރަންޓީންކޮށްފައިވާ ދިވެހި ދަރިވަރެއްގެ ކޮވިޑް-19އަށް ޕޮޒިޓިވްވެފައިވާތީ، އިތުރަށް ބަލަންޖެހޭ ކަންކަން ބަލަމުންދާ ކަމަށެވެ. އަދި ކަރަންޓީންގައި ތިބިއިރު އެކަކު އަނެކަކާ ބައްދަލުވެ، ދީފައިވާ އިރުޝާދުތަކާއި ހިލާފުވެފައިވޭތޯ ބަލަން ބޭނުންވާ ކަމަށާއި، ޓެގްއިން އިތުރު އިންވެސްޓިގޭޝަނެއް ކުރިއަށް ގެންދަން ބޭނުންވާ ކަމަށް މަބްރޫކް ވިދާޅުވިއެވެ.

މަބްރޫކް ވިދާޅުވީ އެރިޔަދޫގައި ތިބި އިތުރު ބައެއްގެ ގައިން ކޮވިޑް-19އަށް ޝައްކުކުރެވޭ އަލާމަތްތައް ފެނިފައިވާ ކަމަށެވެ. އެގޮތުން 17 މީހެއްގެ ސާންޕަލް ނަގާފައިވާކަން މަބްރޫކް ވިދާޅިވިއެވެ. މީގެ އިތުރުން މަބްރޫކް ވިދާޅުވީ ކޮއްދިއްޕަރުން ބަލަމުން ދިޔަ މީހާގެ 2 ވަނަ ސާމްޕަލްވެސް ނެގެޓިވް ވެފައިވާކަމަށެވެ.

ރާއްޖޭގެ ހާލަތަށް ބާލައިރު، މިހާތަނަށް 2710 ސާމްޕަލް ނެގިފައިވާ ކަމަށާއި، 20 ސާންޕަލް ޕޮޒިޓިވް ކަމަށެވެ. މީގެ ތެރެއިން 2772 ސާންޕަލް ނެގެޓިވްވެފައިވާއިރު، ނަތިޖާ ނުލިބި 18 ސާންޕަލްއެއް ހިމެނެވެ. 14 ފަރާތެއްގެ ބަލިން ފަރުވާދީ ރަނގަޅުވެފައިވާއިރު، އައިސޮލޭޝަންގައި 11 އަދި ކަރަންޓީންގައި 817 މީހަކުވެއެވެ.