ކޮވިޑް-19 އަށް ބޭނުންކުރަނީ ރާއްޖޭގެ 55 އިންސައްތަ ޑޮކްޓަރުން، 45 އިންސައްތަ އެހެން ބަލިތަކަށް
އިތުރު ޑޮކްޓަރުންނާއި ނަރުހުން ގެނެސްގެން އެކަމަށް ހޭދަކުރަން ޖެހޭ ފައިސާވެސް ހޭދަ ކުރާނެ
އައިޖީއެމްއެޗް ލެބް - ރާއްޖެއަށް އިތުރު ސިއްޙީ އެހީތެރިން ގެނައުމަށް ސަރުކާރުން މަސައްކަތް ކުރާނެ
ކޮވިޑް-19 އަށް ފަރުވާ ދިނުމަށް ބޭނުންކުރަނީ ރާއްޖޭގައި ތިބި ޑޮކްޓަރުންނާއި ނަރުހުންގެ 55 އިންސައްތަ ކަމަށް ކޮވިޑް-19 ޓާސްކްފޯސްގެ ތަރުޖަމާނު މަބްރޫކު އަޒީޒް ވިދާޅުވެއްޖެއެވެ.
ހޯމަ ދުވަހުގެރޭ ނޭޝަނަލް އެމަރޖެންސީ އޮޕަރޭޝަންސް ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި މަބްރޫކު ވިދާޅުވީ، ކޮވިޑް-19 ގެ ބަލި މީހުންނަށް ފަރުވާ ދިނުމަށް މިހާރުވެސް ރާއްޖޭގެ 55 އިންސައްތަ ޑޮކްޓަރުން ބޭނުން ކުރަމުންދާ ކަމަށާއި، 45 އިންސައްތަ ޑޮކްޓަރުންނާއި ނަރުހުން ބޭނުންކުރަނީ އެހެނިހެން ބަލިތައް ތަޙައްމަލު ކުރަމުންދާ ފަރާތްތަކަށް ފަރުވާ ދިނުމަށް ކަމަށެވެ.
މަބްރޫކު ވިދާޅުވީ، އިތުރު ޑޮކްޓަރުންނާއި ނަރުހުން ގެނެސްގެން އެކަމަށް ހޭދަކުރަން ޖެހޭ ފައިސާވެސް ހޭދަ ކުރުމުގެ މަސައްކަތް ސަރުކާރުން ކުރާނެ ކަމަށާއި، ނަމަވެސް މިވަގުތު ދުނިޔޭގެ ޙާލަތަށް ބަލައި ދަތުރުފަތުރު ކުރުމުގައި ހުރި ދަތިތަކާއެކު އިތުރު ޑޮކްޓަރުންނާއި ނަރުހުން ހޯދުމުގައި ދަތިތަކެއް ހުރި ކަމަށެވެ. އަދި އެއާއެކު މިހާރު ތިބި ޑޮކްޓަރުންނާއި ނަރުހުންގެ އިތުރުން ޑޮކްޓަރުން ހޯދުމަށް އަދި މާ ބޮޑު ކުރިއެރުމެއް ލިބެމުން ނުދާކަން މަބްރޫކް ފާހަގަކުރެއްވިއެވެ. އެހެންނަމަވެސް ސަރުކާރުން އަދިވެސް މަސައްކަތް ކުރަނީ ޤައުމުތަކާއި ގުޅިގެން ރާއްޖެއަށް ބޭނުންވާ ސިއްޙީ އެހީތެރިންނާއި، ރާއްޖެއިން ބޭރުގައި ތިބި ދިވެހި ޑޮކްޓަރުންވެސް ގެނައުމަށް ކަމަށް މަބްރޫކު ވިދާޅުވިއެވެ.
މި ބައްދަލުވުމުގައި ރާއްޖޭގެ ކޮވިޑް-19 ގެ އިތުރު ތަފްސީލުތައް ހާމަކުރައްވާފައިވާއިރު، މަބްރޫކް ވިދާޅުވީ، މިހާތަނަށް ރާއްޖެއިން 2710 ސާމްޕަލް ނެގިފައިވާއިރު، އޭގެ ތެރެއިން ޕޮޒިޓިވްވެފައިވަނީ 20 ސާމްޕަލް ކަމަށެވެ. އަދި މިހާރުވެސް އައިސޮލޭޝަންގައި 11 މީހުން ތިބި ކަމަށާއި، ކަރަންޓީންގައި 817 މީހަކު އެބަތިބިކަމަށް މަބްރޫކު ވިދާޅުވިއެވެ.
