ބިމުގެ ކުއްޔާއި ގުޅިގެން ނިންމުންތަކެއް ނިންމާނެ، ކުޑަކުރަންޖެހޭ ނަމަ ކުޑަވެސް ކުރާނެ: އަލީ ވަހީދު
13 އެޕްރީލު 2020 | ހޯމަ 14:41ރާއްޖޭގައި ސޭފް ޓުއަރިޒަމް އެއް ފެށުމަށް ކުރަންޖެހޭ ދިރާސާތައް ދަނީ ކުރެވެމުން: އަލީ ވަހީދު
ޓުއަރިޒަމް މިނިސްޓަރ އަލީ ވަހީދު
ލޭންޑް ރެންޓް ނުވަތަ ބިމުގެ ކުއްޔާއި ގުޅިގެން ނިންމުންތަކެއް ނިންމާނެ ކަމަށް ޓުއަރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.
އޮންލައިންކޮށް ކުރިއަށް ގެންދިޔަ ރައްޔިތުންގެ މަޖިލީހުގެ އިގްތިސާދީ ކޮމިޓީގެ ބައްދަލުވުމުގައި މާވަށު ދާއިރާގެ މެމްބަރު މުހައްމަދު ސައީދު ކުރެއްވި ސުވާލަށް ޖަވާބުދެއްވަމުން މިނިސްޓަރ ވިދާޅުވީ ރިސޯޓުތަކުގެ ބިމުގެ ކުއްޔާއި ގުޅިގެން ނިންމުންތަކެއް ނިންމާނެ ކަމަށެވެ. އެގޮތުން އިކޮނޮމިކް މިނިސްޓްރީ، ޓުއަރިޒަމް މިނިސްޓްރީ، އަދި ފިނޭންސް މިނިސްޓްރީން މަސައްކަތް ކުރަމުންދަނީ އެމްއެމްއޭގެ ލަފާއާއި އިރުޝާދުގެ ދަށުން ކަމަށެވެ. އަދި ރިސޯޓުތަކުގެ ބިމުގެ ކުލި ކުޑަކުރަންޖެހޭ ކުއަރޓަރއެއް ނަމަ ކުޑަކުރައްވާނެކަމަށް މިނިސްޓަރ އަލީ ވަހީދު ވިދާޅުވިއެވެ.
ރިސޯޓުތަކުން ދިވެހިންނަށް ވަޒީފާއި ދިނުމާއި ގުޅިގެން ވާހަކަދައްކަވަމުން އަލީ ވަހީދު ވިދާޅުވީ މިއީ ދިވެހިން ވަޒީފާތަކަށް ނުކުންނަންވީ ވަގުތު ކަމަށެވެ. އަދި ކޮންމެ ކަހަލަ ވަޒީފާއެއް ނަމަވެސް ލަދު ނުގަނެ، ވަޒީފާތަކަށް ކުރިމަތިލާންޖެހޭ ކަމަށެވެ.
ރާއްޖެއަށް އެންމެ ބޮޑު އާމްދަނިއެއް ލިބެނީ ފަތުރުވެރިކަމުގެ ސިނާއަތުންކަން ފާހަގަކުރައްވާ މިނިސްޓަރ ވިދާޅުވީ ރައިސުލްޖުމްހޫރިއްޔާ އިބްރާހިމް މުހައްމަދު ސާލިހު ގެ ވިސްނުންފުޅަކީ އާއްމު ރައްޔިތުން އަތުން ދާމިންވަރު ކުޑަކޮށް، ރައްޔިތުން ނިކަމެތި ނުކުރުމަށް ކަމަށެވެ. އަދި ތިން މަސްދުވަސް ތެރޭގައި ރާއްޖެ ކޮވިޑް-19 ފްރީ ގައުމަކަށް ވެވޭނެ ކަމަށެވެ. އަދި ރާއްޖޭގައި ސޭފް ޓުއަރިޒަމް އެއް ފެށުމަށް ކުރަންޖެހޭ ދިރާސާތައް ކުރެވެމުންދާ ކަމަށް ވިދާޅުވިއެވެ.
