ފޮރިންސިކް ރިޕޯޓާއިއެކު ރިލްވާންގެ މައްސަލައިގެ ތަހުގީގަށް އާ ހޯދުންތަކެއް!
ފޮރިންސިކް ރިޕޯޓު ފައިނަލް ކުރުމުގެ މަސައްކަތް ދަނީ ކުރިޔަށް
މަރާލާފައިވާ ނޫސްވެރިޔާ އަހުމަދު ރިލްވާން
އަނިޔާވެރިކޮށް މަރާލާފައިވާ މިނިވަން ނޫހުގެ ނޫސްވެރިޔާ އަހުމަދު ރިލްވާން އަބްދުﷲގެ މައްސަލައިގެ ފޮރިންސިކް އެނަލައިސިސް ރިޕޯޓުން ލިބިފައިވާ މައުލޫމާތާއެކު ތަހުގީގަށް އާ ހޯދުންތަކެއް ލިބިފައިވާކަމަށް މަރު ކޮމިޝަނުން ބުނެފިއެވެ.
މަރު ކޮމިޝަނުގެ މެމްބަރު ފަރީޝާ އަބްދުﷲ ރާއްޖެއެމްވީއަށް ދެއްވި ހާއްސަ ބަސްދީގަތުމެއްގައި ވިދާޅުވީ، ރިލްވާން މައްސަލައިގެ ފޮރިންސިކް އެނަލައިސިސް ރިޕޯޓުގެ މަސައްކަތް ކުރިޔަށްގެންދާކަމަށާއި އެ ރިޕޯޓުން އިތުރު މައުލޫމާތުތަކެ ލިބިފައިވާކަމަށެވެ. އަދި އައު ހޯދުންތަކާއެކު ތަހްގީގުކުރަންޖެހޭ ބައިވަރު ކަންތައްތަކެއް އެބަހުރިކަމަށާއި އެ މަސައްކަތުގައި ލަސްތަކެއް އުޅެނީ ސަރުކާރު ބަންދު ދުވަސްވަރަކަށް ވާތީކަމަށެވެ.
އިތުރަށް ވާހަކަ ދައްކަވަމުން ފަރީޝާ ވިދާޅުވީ، ރިލްވާންގެ މައްސަލައިގެ ފައިނަލް ރިޕޯޓު ވަރަށް އަވަސް މުއްދަތެއްގެ ތެރޭގައި ނިންމާނެކަމަށާއި ކޮމިޝަނުގެ ހުރިހާ މެމްބަރުންވެސް މި ދަނޑިވަޅުގައި ގޭގައި ތިބިގެން ކުރެވެން ހުރި ހުރިހާ މަސައްކަތެއް ކުރަމުންގެންދާކަމަށެވެ. ނަމަވެސް މިފަދަ ކްރިމިނަލް އިންވެސްޓިގޭޝަންތަކުގައި، މިހާރު ލިބިފައިވާ އައު ހޯދުންތަކަށް މީހުން ހާޒިރު ނުކެރެވެނީ އިއުލާންކޮށްފައިވާ ކުއްލި ނުރައްކަލުގެ ހާލަތުގެ ސަބަބުންކަމަށް ފަރީޝާ ވިދާޅުވިއެވެ. އަދި ވީޑިއޯ ކޮންފަރެންސް ނުވަތަ އޯޑީއޯ ކޮންފަރެންސް ކޮށް މިފަދަ އިންޓަވިއު ކުރިޔަށް ގެންދަން ބޭނުންނުވާކަމަށާއި މިފަދަ މައްސަލަތަކުގައި އެ މީހާއާއި ސުވާލުކުރަން ޖެހޭނީ "ފޭސް ޓު ފޭސް' ކޮށްކަމަށް ފަރީޝާ ވިދާޅުވިއެވެ.
ފޮރިންސިކް އެނަލައިސިސް ރިޕޯޓު އަދި ފައިނަލް ރިޕޯޓުވެސް ވަރަށް އަވަހަށް ނިންމާނެކަމަށް ފަރީޝާ ވިދާޅުވިއެވެ.
ރިލްވާން މަރާލި މައްސަލައިގައި މަރު ކޮމިޝަނުން މީގެކުރިން ބުނެފައިވަނީ، ރިލްވާން ރަހީނުކޮށް، ޑިންގީއަކަށް ލައިގެން ގެންގޮސް ދޯންޏަކަށް އެރުވުމަށް ފަހު ޝަހާދަތް ލައިދިނުމަށް ފަހު މަރާލާފައިވާކަން މިހާތަނަށް ހޯދުނު ހެކިތަކުން އެނގިފައިވާ ކަމަށެވެ.
ފައިނަލް ރިޕޯޓުން މަރާލުމަށް ފައިސާދިން ވިޔަފާރިތަކުގެ މައުލޫމާތާއި އެ މައްސަލައިގެ ޝާމިލްވާ ހުރިހާާ ފަރާތްތަކާއި ތުހުމަތު ކުރެވިފައިވާ ހުރިހާ މައުލޫމާތެއް އެނގިގެންދާނެއެވެ.
