ރާއްޖޭގެ އާއްމުންގެ ތެރޭގައި ކޮވިޑް-19 އަށް ފެތުރިއްޖެނަަމަ، ބަލި ޖެހޭ މީހުންނަށް ފޯރުކޮށްދޭ ވަރަށް އޮކްސިޖަންގެ ކެޕޭސިޓީ ހުރިތޯ ބެލުން އެއީ މުހިއްމު ކަމެއް ކަމަށް ދެކިވަޑައިގަންނަވާ ކަމަށް އިނިގރޭސިވިލާތުގެ ނޯތު ވެސްޓް އިންގްލެންޑްގައި މަސައްކަތް ކުރައްވާ ދިވެހި ޑރ. ޝައްފާނާ ހަމީދު ވިދާޅުވެއްޖެ އެވެ.

ކޮވިޑް-19 އަށް ޕޮޒިޓިވްވެ އެ ބަލިން ރަނގަޅުވި ނޭވާލާ ނިޒާމުގެ ބަލިތަކަށް ހާއްސަ ޑރ. ޝައްފާނާ ވިދާޅުވީ، ރާއްޖޭގެ އާއްމުން ތެރޭގައި ކޮވިޑް-19 ފެތުރިއްޖެނަމަ ހަލުވިކަމާއި އެކު ބަލި ފެތުރިދާނެތީވެ އެކަމާއި މެދު ހާސްވާ ކަމަށެވެ. އެފަދަ ހާލަތެއްގައި ހޮސްޕިޓަލުތަކުގައި އެކަށީގެންވާ ވަރަށް ވެންޓިލޭޓަރާއި، އެކަށީގެންވާ ވަރަށް އޮކްސިޖަން ސަޕްލައި ހުރިތޯ ޔަގީންކުރުން މުހިއްމު ކަމެއް ކަމަށް ވިދާޅުވިއެވެ. އިނިގިރޭސިވިލާތުގެ ހަތް އަހަރު ވަންދެން ދިރިއުޅުއްވަމުން ގެންދަވާ ޝައްފާނާ ވިދާޅުވީ، ބަލިޖެހޭ މީހުންނަށް ފޯރުކޮށްދޭ މިންވަރަށް އޮކްސިޖަން ސަޕްލައި ހުރިތޯ އެއީ އޭނާ މަސައްކަތްކުރާ ހޮސްޕިޓަލަށްވެސް ކުރިން ނުބެލުނު ކަމެއް ކަމަށާއި، އެހެން ކަމުން އެކަމަކީ ރާއްޖެއިން އިސްކަންދޭން ޖެހޭ މުހިއްމު ކަމެއް ކަމަށް ވިދާޅުވިއެވެ.

ކޮވިޑް-19 އަކީ ނޭވާލާ ނިޒާމުގެ ބައްޔަކަށްވާއިރު، އެހެން ބަލިތައް ޖެހޭ މީހުންނަށް ވުރެ މި ބަލިޖެހޭ މީހުންނަށް އޮކްސިޖަން ފޯރުކޮށްދޭން ޖެހޭ މިންވަރު އިތުރެވެ. އެގޮތުން ކޮވިޑް-19 ގެ ބަލި މީހުންގެ ތެރެެއިން ގިނަ މީހުންނަށް މިނިޓެއްގެ ތެރޭގައި 15 ލީޓަރާއި 30 ލީޓަރުގެ އޮކްސިޖަން ފޯރުކޮށްދޭން ޖެހެއެވެ. ރާއްޖޭގެ ސިއްހީ މަރުކަޒުތަކާއި ހޮސްޕިޓަލުގައި ބޭނުންކުރަނީ އޮކްސިޖަން ސިލިންޑަރެެވެ. ކޮވިޑް-19 އަށް ފަރުވާދޭ ހަތަރު ހޮސްޕިޓަލް ކަމަށްވާ، އިންދިރާގާންދީ މެމޯރިއަލް ހޮސްޕިޓަލް (އައިޖީއެމްއެޗް)، ދަރުމަވަންތަ، އޭޑީކޭގެ އިތުރުން ޓްރީޓޮޕް ހޮސްޕިޓަލުގައި ދެމުންދާ އޮކްސިޖަން އަކީ، އޮކްސްިޖަން އުފައްދާ މެޝިން ބޭނުންކޮށްގެން އުފައްދާ އޮކްސިޖަންއެވެ.

ކޮވިޑް-19 އަށް ފަރުވާ ދެއްވުމުގައި އިސްކޮށް އުޅުއްވާ ޝައްފާނާ ވިދާޅުވި ގޮތުގައި، އޭނާ މަސައްކަތް ކުރައްވާ ހޮސްޕިޓަލުގައި ކޮވިޑް-19 ޖެހިގެން އަންނަ ބަލި މީހުންނަށް ފަރުވާދިނުމުގެ ގޮތުން ތައްޔާރިތައް ދެމުން ދިޔައިރު އެންމެ ބޮޑު އިސްކަމެއް ދިނީ އިންޓެންސިވް ކެއަރ ޔުނިޓް ނުވަތަ (އައިސީޔޫ) ބޮޑު ކުރުމުގެ މަސައްކަތް ކަމަށެވެ. އަދި އެއާއި އެކު މުވައްޒަފުންނަށް ރައްކާތެރި ކަމުގެ ގޮތުން ބޭނުންކުރާ ޕާސަނަލް ޕްރޮޓެކްޓިވް އިކުއުޕްމެންޓް (ޕީޕީއީ) ފަސޭހައިން ލިބޭ ގޮތް ހަމަޖެއްސި ކަމަށް އޭނާ ފާހަގަ ކުރެއްވިއެވެ.