އެއް ކިލޯ ކެނެބިސް އެތެރެކުރި ލަންކާ މީހަކު އުމުރަށް ޖަލަށް ހުކުމްކޮށްފި

އެއް ކިލޯ ގެ ކެނެބިސް އެތެރެކުރި ސްރީ ލަންކާ ރައްޔިތަކު އުމުރަށް ޖަލަށް ލާން ކްރިމިނަލް ކޯޓުން ޙުކުމްކޮށްފި އެވެ.

މުހައްމަދު ނަސްމިން މުހައްމަދު މުބީން ނަމަކަށް ކިޔާ މި މީހާއަކީ 2017 ވަނަ އަހަރުގެ ޖެނުއަރީ މަހުގެ 12 ވަނަ ދުވަހު ހައްޔަރުކުރި މީހެކެވެ. އޭނާގެ މައްޗަށް ސާބިތުވެފައި ވަނީ ޖަދުވަލު 1 ގައިވާ މަސްތުވާ އެއްޗެއް ދިވެހިރާއްޖެއަށް އެތެރެކުރުމުގެ ކުށުގު ދަޢުވާއެވެ.

އެމީހާ ރާއްޖެއަށް އައިސްފައިވަނީ ކޮލޮމްބޯ މަގުން ރާއްޖެއަށް އައި ޗައިނާ އީސްޓަރންގެ ފްލައިޓެއްގައެވެ. އޭނާއާ މެދު ޝައްކުކުރެވިގެން އޭނާގެ ލަގެޖު ބަލައިފާސްކުރިއިރު، އޭނާގެ ލަޖެޖުގެ ތެރޭގައި އޮތް ޕްލާސްޓިކު ފުޅިއެއްގެ ތެރެއިން ވަނީ 812.6 ގްރާމް ކެނެބިސް ފެނިފަ އެވެ. އަދި އިތުރު ދަޅެއްގައި 198.1 ގްރާމް ކެނެބިސް ފެނިފައިވެއެވެ.

ކްރިމިނަލް ކޯޓުން ކޮށްފައިވާ ޙުކުމުގައި ބުނެފައިވަނީ، ފުލުހުންގެ ހެކި ބަހުންނާއި، ހުށައަޅާފައިވާ އެހެނިހެން ހެކިތަކަށް ބަލާއިރު ޝައްކެއް ނެތް މިންވަރަށް އޭނާގެ މައްޗަށް ދަޢުވާ ސާބިތުވާ ކަމަށެވެ. އުމުރަށް ޖަލަށް ލުމާއެކު މަސްތުވާތަކެއްޗާ ބެހޭ ޤާނޫނުގައިވާ ގޮތުގެ މަތިން އޭނާ ވަނީ 100،000 ރުފިޔާ އިން ޖޫރިމަނާކޮށް، އެ ފައިސާ ހަ މަސް ދުވަހުގެ ތެރޭގައި މީރާއަށް ދެއްކުމަށް ޢަމުރުކޮށްފައެވެ.