އުސޫލާ ހިލާފަށް ދަރަވަންދޫ ކޯޓުގެ އިސް މެޖިސްޓްރޭޓް ލަތީފް ސަލާމް ބުނާތީ ނަސޭހަތް ދިނުމަށް ނިންމައިފި
13 އެޕްރީލު 2020 | ހޯމަ 08:38ޖޭއެސްސީން ނިންމާފައިވަނީ ލަތީފަށް ނަސޭހަތްދިނުމާއެކު، އެ ކޮމިޝަނުން ކަނޑައަޅާ ތަމްރީން ޕްރޮގްރާމެއް ފުރިހަމަކުރުމަށް
ޖޭއެސްސީގެ ބައެއް މެމްބަރުން
އުސޫލާ ޚިލާފަށް ބ. ދަރަވަންދޫ ކޯޓުގެ އިސްމެޖިސްޓްރޭޓް އަހުމަދު ލަތީފް ސަލާމް ބުނާތީ ނަސޭހަތް ދިނުމަށް ޖުޑީޝަލް ސަރވިސް ކޮމިޝަން (ޖޭއެސްސީ)އިން ނިންމައިފި އެވެ.
ޖޭއެސްސީއިން އާންމުކޮށްފައިވާ ބަޔާނެއްގައި ބުނެފައިވަނީ، ދަރަވަންދޫ ކޯޓުގެ އިސްމެޖިސްޓްރޭޓް އަހުމަދު ލަތީފް، ސަލާމް ބުނުމުގެ އުސޫލާ ހިލާފަށް ސަލާމްބުނާކަމަށް އެކޮމިޝަނަށް ހުށަހެޅުނު ޝަކުވާ ބެލުބެލުމުން، ފަނޑިޔާރުކަމުގެ މަސްއޫލިއްޔަތާއި ވާޖިބުތައް އަދާކުރުމުގައި، ޤާނޫނުއަސާސީގެ 151 ވަނަ މާއްދާއާއި ފަނޑިޔާރުންގެ ޤާނޫނުގެ ދެ ވަނަ މާއްދާގެ (ށ) އާއި 32 ވަނަ މާއްދާގެ (ހ) އާއި ހަމަ އެޤާނޫނުގެ 65 ވަނަ މާއްދާއާއި، ވަޒީފާއާބެހޭ ޤާނޫނުގެ 42 ވަނަ މާއްދާގެ (ށ)އާ ލަތީފް ޚިލާފު ވެފައިވާ ކަމަށެވެ.
މީގެއިތުރުން، ފަނޑިޔާރުންގެ ސުލޫކީ މިންގަޑުގެ 2.2 އާއި 3.2 އައި 6.5 ވަނަ ނަންބަރާ ކަނޑައެޅިގެން ލަތީފް ޚިލާފުވެފައިވާ ކަމަށެވެ. އެހެންކަމުން، ޖޭއެސްސީގެ ޤާނޫނުގެ ދަށުން ދަރަވަންދޫ ކޯޓުގެ އިސްމެޖިސްޓްރޭޓް ލަތީފަށް ނަސޭހަތް ދިނުމާއެކު، ކޮމިޝަނުން ކަނޑައަޅާ ތަމްރީން ޕްރޮގުރާމެއް ފުރިހަމަކުރުމަށް ލަތީފަށް އެންގުމަށް ޖޭއެސްސީން ވަނީ ނިންމާފައެވެ.
އާދިއްތަ ދުވަހު ޖޭއެސްސީއިން ބޭއްވި މިބައްދަލުވުން ބާއްވާފައިވަނީ، ވީޑިއޯ ކޮންފަރެންސް މެދުވެރިކޮށެވެ. ޖޭއެސްސީއަށް ގިނަ ފަނޑިޔާރުންތަކެއްގެ ސުލޫކީ މައްސަލަތަކެއް ހުށަހެޅިފައިވާއިރު، އެކޮމިޝަނުން ދަނީ އެމައްސަލަތައް ބަލާ ފިޔަވަޅުއަޅަމުން ނެވެ.
