މާޗް މަހު މީރާ އަށް އާމްދަނީގެ ގޮތުގައި ލިބުނީ އަންދާޒާ ކުރިވަރަށް ވުރެ 20.3 އިންސައްތަ ދަށުން!
13 އެޕްރީލު 2020 | ހޯމަ 08:08ދައުލަތަށް އާމްދަނީގެ ގޮތުގައި ލިބިފައިވަނީ 1.11 ބިލިއަން ރުފިޔާ
މާލޭ ވިޔަފާރި ބަނދަރު
މި އަހަރުގެ މާޗް މަހު މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް އާމްދަނީގެ ގޮތުގައި ލިބިފައިވަނީ 1.11 ބިލިއަން ރުފިޔާ ކަމަށާއި، މިއީ އަންދާޒާ ކުރި ވަރަށް ވުރެ 20.3 އިންސައްތަ ދަށް ޢަދަދެއް ކަމަށް އެ އިދާރާއިން ހާމަކޮށްފިއެވެ.
މިއީ މިދިޔަ އަހަރުގެ މި މުއްދަތުގައި ލިބުނު ފައިސާ އަށް ވުރެ، 26.9 އިންސައްތަ ދަށް ޢަދަދެކެވެ. ޢާމްދަނީ ދަށްވީ ކޮވިޑް-19 އާ ގުޅިގެން ސަރުކާރު ބަންދުކުރުމާއި ގުޅިގެން ޓެކްސްގެ ސުންގަޑިތަކަށް ބަދަލު އައިސްފައި ވުމުންނާއި، ރާއްޖެއަށް ފަތުރުވެރިން ޒިޔާރަތްކުރި ޢަދަދު ދަށްވުމުގެ ސަބަބުން ކަމަށް މީރާ އިން ވަނީ ފާހަގަކޮށްފައެވެ.
އެގޮތުން، 2019 ވަނަ އަހަރުގެ ފެބްރުއަރީ މަހާ އަޅާބަލާއިރު މި އަހަރުގެ ފެބްރުއަރީ މަހުގެ ތެރޭގައި ރާއްޖެއަށް ޒިޔާރަތްކުރި ފަތުރުވެރިންގެ ޢަދަދު ވަނީ 11.1 އިންސައްތަ ދަށަށް ގޮސްފަ އެވެ.
މާޗް މަހު ލިބުނު ޢާމްދަނީގެ ތެރެއިން އެންމެ ބޮޑު އިންސައްތައެއް ހިއްސާކޮށްފައިވަނީ ޖީއެސްޓީގެ ގޮތުގައި ލިބުނު 637.67 މިލިއަން ރުފިޔާ އެވެ. ދެވަނައަށް އެންމެ ބޮޑު ޢާމްދަނީއެއް ލިބިފައިވަނީ، ޓޫރިޒަމް ލޭންޑް ރެންޓުގެ ގޮތުގައި ލިބުނު 131.64 މިލިއަން ރުފިޔާ އެވެ.
އިތުރަށް ލިބިފައިވާ ޢާމްދަނީގެ ޢަދަދުތަކަށް ބަލާއިރު، ބީޕީޓީގެ ގޮތުގައި ވަނީ 81.38 މިލިއަން ރުފިޔާ ލިބިފައެވެ. ގްރީން ޓެކްސްގެ ގޮތުގައި ލިބިފައިވަނީ 74.04 މިލިއަން ރުފިޔާއެވެ. އަދި އެއަރޕޯޓް ޑިވެލޮޕްމަންޓް ފީގެ ގޮތުގައި 59.17 މިލިއަން ރުފިޔާ ލިބިފައިވެއެވެ.
އެހެނިހެން ޓެކުހާއި ފީގެ ގޮތުގައި 128.68 މިލިއަން ރުފިޔާ ލިބިފައިވާ ކަމަށް މީރާއިން ވަނީ ހާމާކޮށްފައެވެ. ދައުލަތަށް ޢާމްދަނީގެ ގޮތުގައި ލިބުނު ފައިސާގެ ތެރޭގައި 49.2 މިލިއަން އެމެރިކާ ޑޮލަރު ހިމެނެއެވެ.
ކޮވިޑް-19 އާ ގުޅިގެން އައިސްފައިވާ އިޤުތިޞާދީ ހީނަރުކަމާއި ގުޅިގެން ދައުލަތުގެ ޢާމްދަނީ ވަރަށް ބޮޑަށް ދަށަށް ދާނެ ކަމަށް ވަނީ އަންދާޒާ ކުރެވިފައެވެ. އެގޮތުން މި އަހަރުގެ ބަޖެޓު 12 ބިލިއަން ރުފިޔާ ޑެފިސިޓް ވާނެ ކަމަށް ވަނީ އަންދާޒާކޮށްފައެވެ.
ރާއްޖޭގެ އިޤުތިޞާދު ދިރާސާކުރާ މާހިރުން ވަނީ އަދި ކުރިއަށް އޮތް ދުވަސްތަކުގެ ތެރޭގައި މިއަށް ވުރެ ވެސް ބޮޑު ގެއްލުމަކާ ކުރިމަތިލާން ޖެހިދާނެ ކަމަށް ތައްޔާރުވެ ތިބުމަށް އިލްތިމާސްކޮށްފަ އެވެ. އަދި ދުނިޔޭގެ ޙާލަތު ރަނގަޅު ވެގެން ނޫނީ، ރާއްޖޭގެ އިޤުތިޞާދަށް ހެޔޮ ބަދަލުތަކެއް ނާންނާނެ ކަމަށް ވަނީ ހާމަކޮށްފަ އެވެ.
