އިނގިރޭސި ކްލަބު ޗެލްސީގެ ލެޖެންޑަރީ ގޯލްކީޕަރު ޕީޓާ ބޮނެޓީ މަރުވެއްޖެއެވެ.

އިނގިރޭސި ގައުމީ ޓީމަށްވެސް ކުޅެފައިވާ ބޮނެޓީ މަރުވީ އުމުރުން 78 އަހަރުގައެވެ. އާދީއްތަ ދުވަހުގެ ވަގުތެއްގައި ބޮނެޓީ މަރުވިއިރު، އޭނާ މަރުވެފައިވަނީ ގިނަ ދުވަސްތަކެއް ވަންދެން ބަލިވެ އުޅުމަށްފަހު ކަމަށް ރިޕޯޓުތައް ބުނެއެވެ.

1960 އާއި 1970 ގެ އަހަރުތަކުގައި ބޮނެޓީއަކީ ދުނިޔޭގައި އެންމެ ފާހަގަކޮށްލެވުނު އެއް ގޯލްކީޕަރެވެ. އެގޮތުން ޗެލްސީއަށް މިހާތަނަށް ކުޅުނު އެންމެ މޮޅެތި ކުޅުންތެރިންގެ ލިސްޓުގައި އޭނާ ހިމެނެއެވެ. އެގޮތުން ޗެލްސީއަށް 729 މެޗު ބޮނެޓީ ކުޅެދީފައިވާއިރު، އޭނާއަކީ ދެވަނައަށް ޗެލްސީއަށް އެންމެ ގިނަ މެޗު ކުޅެދީފައިވާ ކުޅުންތެރިޔާއެވެ. އަދި 2014 ވަނަ އަހަރާ ހަމައަށް ބޮނެޓީ ވަނީ ޗެލްސީއަށް އެންމެ ގިނަ ކްލީން ޝީޓް ހޯދައިދިން ކުޅުންތެރިޔާގެ ރެކޯޑް ދަމަހައްޓާފައެވެ. 2014 ވަނަ އަހަރު މި ރެކޯޑް މުގުރާލީ ޕީޓާ ޗެކެވެ.

މީގެ އިތުރުން ބޮނެޓީ ވަނީ 1996 ވަނަ އަހަރުގެ ފީފާ ވޯލްޑް ކަޕް އިންގްލެންޑުން ކާމިޔާބުކުރި ސްކޮޑުގައިވެސް ހިމެނިފައެވެ. އެކަމަކު އެ ފަހަރު އޭނާ އެއްވެސް މެޗެއް ކުޅެފައެއް ނުވެއެވެ.

"ދަ ކެޓް" ގެ ނަމުން މަޝްހޫރުކަން ހޯދި ބޮނެޓީ ވަނީ ޗެލްސީ އާއެކު 1964-1965 ވަނަ އަހަރުގެ ލީގު ކަޕާއި، 1969-1970 ވަނަ އަހަރުގެ އެފްއޭ ކަޕްގެ އިތުރުން 1971 ވަނަ އަހަރުގެ ޔުއެފާ ކަޕް ވިނާސް ކަޕް ކާމިޔާބުކޮށްފައެވެ.