މާލޭ ސަރަހައްދުގައި ގާއިމްކޮށްފައިވާ އައިސޮލޭޝަން ފެސިލިޓީތަކަށް އެޗްއާރްސީއެމުން ޒިޔާރަތްކޮށްފި
13 އެޕްރީލު 2020 | ހޯމަ 05:35އެޗްއާރްސީއެމް އިން ވަނީ ފަރުކޮޅުފުށި އަދި އެޗްއައިއެޗްއަށް ޒިޔާރަތްކޮށްފައި
ފަރުކޮޅުފުށީގައި ގާއިމްކޮށްފައިވާ އައިސޮލޭޝަން ފެސިލިޓީ
ފަރުކޮޅުފުށި އަދި ހުޅުލޭ އައިލެންޑް ހޮޓަލުގައި ޤާއިމު ކޮށްފައިވާ އައިސޮލޭޝަން/ކަރަންޓީނު ފެސިލިޓީތަކަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ޒިޔާރަތްކޮށްފިއެވެ.
މީޑިއާއަށް މަޢުލޫމާތު ދެމުން އެޗްއާރްސީއެމް އިން ބުނެފައިވަނީ، އިންތިޒާމުތައް ހަމަޖައްސާފައިވާ ގޮތް ބެލިއިރު، ކޮވިޑް-19 އާ ގުޅިގެން އިތުރަށް ކުރިމަތިވެދާނެ ޙާލަތަކަށް މި މަރުކަޒުތައް ތައްޔާރުވެފައިވާކަން ފާހަގަކުރެވުނު ކަމަށެވެ.
އޭގެ އިތުރުން، އެ މަރުކަޒުތަކުގައި ބައިތިއްބާ ފަރާތްތަކަށް ޞިއްޙީ ޚިދުމަތް ދިނުމަށްޓަކައި ބޭނުންވާ އާލާތްތަކާ، އެފަދަ މަރުކަޒެއްގައި ފޯރުކޮށްދޭންޖެހޭ ޒަރޫރީ ކަންކަން ހަމަޖެއްސުމުގެ އިންތިޒާމުތަކާ އަދި އެ ފަރާތްތަކުގެ ސަލާމަތާއި ރައްކާތެރިކަން ކަށަވަރުކުރުމަށް ބޭނުންވާ އިންތިޒާމުތައް ހަމަޖައްސާފައިވާކަން އެޗްއާރްސީއެމަށް ފާހަގަކުރެވުނު ކަމަށް މަޢުލޫމާތު ދީފައިވެ އެވެ. އަދި އެ ތަންތަނުގައި މަސައްކަތްކުރާ މުވައްޒަފުންގެ ސަލާމާތާއި ރައްކާތެރިކަން ކަށަވަރުކުރުމަށާއި، އެ ފަރާތްތަކުގެ ނަފްސާނީ ދުޅަހެޔޮކަން ކަށަވަރު ކުރުމަށް ފިޔަވަޅުތަކެއް އެޅިފައިވާ ކަމަށް އެޗްއާރްސީއެމުން ބުނެފައިވެއެވެ.
އެޗްއާރްސީއެމުން އިތުރަށް ބުނެފައިވަނީ، ކަރަންޓީނު ފެސިލިޓީތަކުގައި މިވަގުތު މީހުން ބައިތިއްބާފައިތިބި ތަންތަނަށް ކޮމިޝަނުން ޒިޔާރަތްކުރުމުގައި ގޮންޖެހުންތަކެއް ހުރިކަމުގައިވިޔަސް ގުޅުންހުރި އިދާރާތަކާ މަޝްވަރާކޮށް އެ ތަންތަން މި ކޮމިޝަނުން މޮނިޓަރކުރަމުންދާނެ ކަމަށެވެ.
