މި ދަނޑިވަޅުގައި ނުފޫޒް ބޭނުންކޮށްގެން ޓިކެޓު ހޯދުމަކީ ހަޑި މުޑުދާރު ޢަމަލެއް ކަމަށް ޓާސްކް ފޯހުގެ ތަރުޖަމާނު މަބްރޫކް އަޒީޒު ވިދާޅުވެއްޖެއެވެ.
ނުފޫޒް ބޭނުންކޮށްގެން ޓިކެޓު ހޯދުމަކީ ހަޑި މުޑުދާރު ޢަމަލެއް ކަމަށް މަބްރޫކް ވިދާޅުވެފައިމިވަނީ ހޯމް މިނިސްޓަރު ޝައިޚް އިމްރާން ޢަބްދުﷲ ޢާއިލީ ބޭފުޅުންނަށް މޯލްޑިވިއަނުން ޓިކެޓް ހޯދިންކަމަށް ބުނާ މައްސަލައެއް ފެންމަތިވެފައިވަނިކޮށްނެވެ.
އާދިއްތަ ދުވަހުގެ ރޭ ކޮވިޑް-19ގެ އެންމެފަހުގެ މަޢުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން މަބްރޫކް ވިދާޅުވީ ޤައުމުތަކުން ރާއްޖެއަށް ދިވެހިން ގެންނައިރު ޓިކެޓް ދޫކުރާނެ އުޞޫލު ޢާންމުކޮށްފައިވާކަމަށެވެ. އަދި އެކަމުގައި ޢަމަލުކުރާނެގޮތްތައް މޯލްޑިވިއަނުން ވެސް ހާމަކޮށްފައިިވާއިރު، ވަކި މީހަކު ނުފޫޒް ބޭނުންކޮށްގެން ވަކި މީހަކަށް ޓިކެޓު ހޯދައިދިނުމަށް މަސައްކަތްކުރުމަކީ ހަޑިމުޑުދާރު ޢަމަލެއް ކަމަށް މަބްރޫކް ވިދާޅުވިއެވެ.
މަބްރޫކް ވިދާޅުވީ ނުފޫޒް ބޭނުންކޮށްގެން މި ދަނޑިވަޅުގައި ޓިކެޓުތަކެއް ހޯދުމަށް މަސައްކަތްކުރާނަމަ އެކަމެއްގެ މަޢުލޫމާތު ސަރުކާރާއި ހިއްސާކުރުމަށް އެދޭކަމަށެވެ. އަދި އެފަދަ މައްސަލަތައް ވެސް ސަރުކާރުން ބަލާނެކަމަށް މަބްރޫކް ވިދާޅުވިއެވެ.
އަޅުގަނޑުމެން ދެކޭ ގޮތުގައި އަދި ވަކިން މިކަހަލަ ހާލަތެއްގައި ނުފޫޒެއް ބާރެއް ބޭނުންކޮށްގެން އެއީ ސަރުކާރުގެ ތެރެއިން އޮތް ނުފޫޒެއްކަމުގައި ވިޔަސް އަމިއްލަ ވިޔަފާރިއެއް ކުރައްވާ ބޭފުޅެއް ކަމުގައި ވިޔަސް ނުފޫޒެއް ބޭނުންކޮށްގެން މިވަގުތު މިކަހަލަ ހައްސާސްވަގުތެއްގައި ވަކި ގޮތަކަށް ތިމާ ދަންނަ މީހަކަށް ޓިކެޓެއް ހޯދަން އުޅުމަކީ މުޑުދާރު ހަޑިއަމަލެއް. ހަމައެއްގޮތަކަށް ވެސް ކޮށްގެންވާނެ ކަމެއް ނޫން.ޓާސްކް ފޯހުގެ ތަރުޖަމާނު މަބްރޫކް އަޒީޒު
މަބްރޫކް ވިދާޅުވީ ޞައްޙަ މަޢުލޫމާތު ހޯދުމަށްފަހު މައްސަލަ ހުށައަޅަންޖެހޭ އިދާރާތަކަށް ހުށައެޅުމުން ސަރުކާރުން އެކަމަށް މަރުޙަބާ ކިޔާނެ ކަމަށެވެ. އަދި ވިދާޅުވީ ވަކި މީހަކަށް ވަކި ނުފޫޒެއް ބޭނުން ކޮށްގެން ފުރުޞަތު ލިބުމަކީ ބޭނުންވާ ގޮތެއް ނޫން ކަމަށެވެ.
