ކުޅުމާ ދުރުގައި ހުރުމަށް ފަހު އެނބުރި އަންނަން ޕޮގްބާ ކެތްމަދުވެފައި

ފުޓްބޯޅަ އަލުން ފަށާއިރު، އަނިޔާގެ ސަބަބުން ދިގު މުއްދަތެއްގައި ކުޅުމާ ދުރުގައި ހުރުމަށް ފަހު އެނބުރި އަންނަން ކެތްމަދުވެފައިވާ ކަމަށް މެންޗެސްޓާ ޔުނައިޓެޑްގެ ފްރާންސް މިޑްފީލްޑަރު ޕައުލް ޕޮގްބާ ބުނެފި އެވެ.

ކުޑަހުޅަށް ލިބުނު އަނިޔާއަކާ ގުޅިގެން މި ސީޒަނުގެ ބޮޑުބައި ޕޮގްބާ ހޭދަކޮށްފައިވަނީ ކުޅުމާ ދުރުގައެވެ. އެގޮތުން މި ސީޒަނުގައި ޕޮގްބާ ޔުނައިޓެޑަށް ކުޅެފައިވަނީ އެންމެ 8 މެޗެވެ. އަދި މިހާރުވެސް އޭނާ ކުޅުމުން ދުރުގައި ހުރިއިރު، އޭނާ ކުޅެން ނިކުންނާނެ ތާރީޚެއް އަދި ކަށަވަރެއް ނޫނެވެ.

މުޅި ދުނިޔޭގައި ހަލުވިކަމާއެކު ފެތުރެމުން އަންނަ ކޮރޯނާވައިރަސް (ކޮވިޑް-19) އާ ގުޅިގެން ދުނިޔޭގެ ފުޓްބޯޅަ ވަނީ ހުއްޓުމަކަށް އައިސްފައެވެ. އެގޮތުން އިނގިރޭސި ޕްރިމިއާ ލީގުވެސް ވަނީ މުއްދަތެއް ނެތް ގޮތަށް ފަސްކޮށްފައެވެ.

ދާދި ފަހުން ޕޮގްބާ ބުނީ އޭނާ މިހާރު ވެސް އަންނަނީ ތަމްރީންތައް ހަދައި، ބޯޅައާ އެކު ފަރިތަކުރަމުން ކަމަށެވެ. އަދި ކުޅުމާ ދުރުގައި ހުންނަން ޖެހުމުން ފޫހިވާ ކަމަށާއި މިހާރު އޭނާ ހުރީ ގާތްގަނޑަކަށް އެނބުރި އައުމާ ގާތުގައި ކަމަށްވެސް ޕޮގްބާ ވަނީ ބުނެފައެވެ.

މިދިޔަ އަހަރުގެ ޑިސެމްބަރުގައި އެންމެ ފަހުން މެޗެއް ކުޅުނު ޕޮގްބާ ބުނީ ކޮވިޑް-19 އާ ގުޅިގެން ފުޓްބޯޅަ ހުއްޓާލަން ޖެހިފައި އޮތް އޮތުން އޭނާ ނަގަނީ ޕޮޒިޓިވްކޮށް ކަމަށާއި، މީގެ ސަބަބުން އޭނާ ފުޓްބޯޅަ ދެކެ ލޯބިވާ ވަރު ވެސް އެނގިއްޖެ ކަމަށެވެ.

އަނިޔާއާ ގުޅިގެން ޕޮގްބާ ކުޅުމައި ދުރުގައި ހުރިއިރު، މީޑިއާ ރިޕޯޓުތައް ބުނާގޮތުން ހޫނު މޫސުމުގެ ޓްރާންސްފާ ބާޒާރުގައި ޕޮގްބާ ހޯދުމަށް ޔޫރަޕްގެ ބޮޑެތި ކްލަބުތަކުން އަންނަނީ މަސައްކަތް ކުރަމުންނެވެ. އޭގެތެރޭގައި އޭނާގެ ކުރީގެ ކްލަބު އިޓަލީގެ ޔުވެންޓަސް އާއި ސްޕެއިންގެ ގަދަ ބާރު ރެއާލް މެޑްރިޑާއި ފްރާންސްގެ ޕީއެސްޖީ ހިމެނެއެވެ.

ޔުނައިޓެޑުން 2010 ވަނަ އަހަރު ކެރިޔަރު ފެށި އުމުރުން 26 އަހަރުގެ ޕޮގްބާ ހިލޭ ޓްރާންސްފާއެއްގެ ދަށުން ޔުވެންޓަސްއަށް ބަދަލުވީ 2012 ވަނަ އަހަރު އެވެ. އެޓީމުގައި ހޭދަކުރި ހަތަރު ސީޒަނުގައި ޕޮގްބާ ވަނީ 178 މެޗުން 34 ލަނޑު ޖަހާފައެވެ. އޭގެ ފަހުން އަނެއްކާވެސް ޕޮގްބާ އަނބުރާ ޔުނައިޓެޑަށް ބަދަލުވީ 2016 ވަނަ އަހަރު 105 މިލިއަން ޔޫރޯ އަށެވެ. އެކަމަކު ޔުނައިޓެޑަށް ބަދަލުވުމަށްފަހު އެޓީމުގައި އޭނާއަށް އެންމެ އެދެވޭ ކުޅުމެއް ދެއްކިފައެއް ނުވެއެވެ.