ޝެފީލްޑް ޔުނައިޓެޑްގެ ބައެއް މުވައްޒަފުންނަށް މުސާރައާ އެކު ޗުއްޓީ

އިނގިރޭސި ޕްރިމިއާ ލީގުގައި ވާދަކުރަމުން އަންނަ ޝެފީލް ޔުނައިޓެޑުން މުސާރައާ އެކު ބައެއް މުވައްޒަފުންނަށް ޗުއްޓީ ދޭން ނިންމައިފި އެވެ.

އެ ކްލަބުން މިގޮތަށް ނިންމާފައި މި ވަނީ ކޮރޯނާވައިރަސް (ކޮވިޑް-19) ގެ ސަބަބުން ދިމާވާ މާލީ ގޮންޖެހުންތަކުން އަރައިގަތުމަށް ބައެއް ކްލަބުތަކުގެ މުވައްޒަފުން ނޯޕޭ ލީވްއަށް ފޮނުވާލުމާއި މުސާރައިން ބައެއް އުނިކުރަން ނިންމާފައިވާ ދަނޑިވަޅެއްގަ އެވެ.

އެކަމަކު ޝެފީލްޑް ޔުނައިޓެޑުން ވަނީ ކޮވިޑް-19 އާ ގުޅިގެން ވަޒީފާއަށް ދިޔުމަށް އުނދަގޫވާ މުވައްޒަފުންނަށް މުސާރައާ އެކު ޗުއްޓީ ދިނުމަށް ނިންމާފައެވެ.

ޝެފީލްޑް ޔުނައިޓެޑްގެ މުވައްޒަފުންނަށް ބަރާބަރަށް މުސާރަ ދޭނެ ކަމަށް އެ ކްލަބުން ބުނިއިރު، މީގެ ކުރިން އިނގިރޭސި ޕްރިމިއާ ލީގުގައި ވާދަކުރަމުން އަންނަ ޓޮޓެންހަމް ހޮޓްސްޕާ އާއި، ނިއުކާސަލް ޔުނައިޓެޑާއި، ބޯންމަތު އަދި ނޯވިޗް ސިޓީގެ ބައެއް މުވައްޒަފުން ވަނީ ނޯޕޭއަށް ފޮނުވާލާފައެވެ.

އިނގިރޭސިވިލާތުގައި ނޯޕޭއަށް ފޮނުވާލާ މުވައްޒަފުންނަށް ސަރުކާރުން ކަނޑައަޅާފައިވާ ސްކީމްގެ ދަށުން އެމީހެއްގެ މުސާރައިގެ 80 އިންސައްތަ ލިބެއެވެ.

މުވައްޒަފުން ނޯޕޭއަށް ފޮނުވުމަށް ލީގުގެ އެއްވަނައިގައި އޮތް ލިވަޕޫލުން އެންމެ ފުރަތަމަ ނިންމި ނަމަވެސް، ފަހުން ވަނީ ސަޕޯޓަރުންގެ ކިބައިން މާފަށް އެދުމަށްފަހު އެ ނިންމުން ބަދަލުކޮށްފައެވެ. މުވައްޒަފުންނަށް ބަރާބަރަށް މުސާރަދޭނެކަން މިހާތަނަށް ހާމަކޮށްފައިވަނީ ލިވަޕޫލްގެ އިތުރުން އެންމެ ފަހުގެ ޗެމްޕިއަން މެންޗެސްޓާ ސިޓީންނެވެ.

ކޮވިޑް-19 ގެ ސަބަބުން ދިމާވާ މާލީ ގޮންޖެހުންތަކުން އަރައިގަތުމަށް ޕްރިމިއާ ލީގުގެ ބައެއް ކްލަބުތަކުގެ މުވައްޒަފުން ނޯޕޭއަށް ފަނޮވާލަމުން އަންނައިރު، ޕްރިމިއާ ލީގު ކްލަބުތަކުގެ ކުޅުންތެރިންގެ މުސާރައިން 30 އިންސައްތަ އުނިކުރުމަށް އަންނަނީ މަޝްވަރާ ކުރަމުންނެވެ. މިހާތަނަށް ކުޅުންތެރިންގެ މުސާރަ ކުޑަކޮށްފައިވަނީ ސައުތެމްޓާނާއި ވެސްޓް ހޭމް ޔުނައިޓެޑުންނެވެ.