140 ފަޅު ރަށެއް ކައުންސިލްތަކާއި ހަވާލުކުރުމުގެ މަސައްކަތް އެބަކުރެވޭ: މިނިސްޓަރ
12 އެޕްރީލު 2020 | އާދީއްތަ 06:45އިތުރަށް ބޭނުންވާ ދަނޑުބިންތައް ހޯދުމަށްޓަކައި ފަޅުރަށްރަށް ކަނޑައެޅުމުގެ މަސައްކަތް ވެސް ދަނީ ކުރަމުން
ނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު
އެކި ކައުންސިލްތަކުގެ އިހުތިސާސްގެ ތެރެއަށް ވަންނަ 140 ފަޅު ރަށެއް ކައުންސިލްތަކާއި ޙަވާލުކުރުމުގެ މަސައްކަތް ކުރަމުންދާ ކަމަށް މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ޒަހާ ވަހީދު ވިދާޅުވެއްޖެއެވެ.
އާދީއްތަ ދުވަހު އޮންލައިންކޮށް ބޭއްވި ރައްޔިތުންގެ މަޖިލީހުގެ އިޤުތިޞާދީ ކޮމިޓީގައި ވާހަކަދައްކަވަމުން މިނިސްޓަރ ވިދާޅުވީ ބައެއް ކައުންސިލްތަކުގެ އިހުތިސާސްގެ ތެރެއަށް ވަންނަ ފަޅުރަށްތައް ޙަވާލު ކުރުމުގެ މަސައްކަތް ކުރަމުންދާކަމަށެވެ. އަދި ހުޅުވާލަނީ ބިން ބޮޑު ރަށްތަކެއް ކަން ފާހަގަކުރައްވާ މިނިސްޓަރ ވިދާޅުވީ އެ އުޞޫލު އަދި ކަނޑަނޭޅޭކަމަށެވެ.
މިނިސްޓަރ ވިދާޅުވީ 140 ރަށެއް ކައުންސިލްތަކާއި ޙަވާލު ކުުރުމުގެ މަސައްކަތް ކުރަމުން އަންނަ ކަމަށެެވެ. މީގެ އިތުރުން ޒަހާ ވިދާޅުވީ އިތުރަށް ބޭނުންވާ ދަނޑުބިންތައް ހޯދުމަށްޓަކައި ފަޅުރަށްރަށް ކަނޑައެޅުމުގެ މަސައްކަތް ވެސް ކުރަމުންދާ ކަމަށެވެ.
ކޮވިޑް-19 އާއި ގުޅިގެން ރާއްޖޭގެ އުފެއްދުންތެރިކަން އިތުރު ކުރުމަށް ގިނަ މަސައްކަތް ކުރެވެމުންދާއިރު އެކަމަށް އަލިއަޅުއްވާލައްވާ މިނިސްޓަރ ވިދާޅުވެފައިވަނީ ބިން އޮތް ރަށްރަށުން އެ ރަށުގެ ކައުންސިލްތަކާއި ގުޅިގެން 3 އަހަރު ދުވަހުގެ މުއްދަތައް ބިން ދޫކުރުމަށް ނިންމާފައިވާކަމަށެވެ. އަދި އެ ބިންތައް ދޫކުރެވެނީ އެއްވެސް ކުއްޔަކާނުލައި ކަމަށެވެ.
ހޮނިހިރު ދުވަހުގެރޭގެ ނޫސްވެރިންގެ ބައްދަލުވުމުގައި ވާހަކަދައްކަވަމުން، އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވީ ދަނޑުވެރިކަމުގެ އިޤުތިޞާދަށް 44 ރަށެއް ސަރުކާރުން ފާހަގަކޮށްފައިވާ ކަމަށާއި، ދަނޑުވެރިކަމުގެ އުފެއްދުންތައް ސަރުކާރުން ގަންނާނެ ކަމަށެވެ.
