ފްލޫ ކްލިނިކްގެ ޚިދުމަތް ދޭ ގަޑިތަކަށް ބަދަލު ގެނެސްފި
11 އެޕްރީލު 2020 | ހޮނިހިރު 16:28ހިދްމަތް ލިބޭނީ 10:00 އިން 18:00 އަށް
މާލެ ހިޔާ ސަރަހައްދުގައި ގާއިމްކޮށްފައިވާ ފްލޫކްލިނިކް
ފްލޫ ކްލިނިކްގެ ޚިދުމަތް ދޭ ގަޑިތަކަށް ބަދަލު ގެނެސްފިއެވެ.
މިކަމާއި ގުޅިގެން އައިޖީއެމްއެޗް އިން ނެރެފައިވާ ނޫސްބަޔާނެއްގައި ބުނެފައިވަނީ، ކޮވިޑް-19 އާއި ގުޅިގެން މާލޭ ހިޔާ 2 ގެ ފުރަގަހުގައި ކުރިއަށްގެންދާ ފްލޫ ކްލިނިކުގެ ޚިދުމަތް ދޭ ގަޑިތަކަށް ބަދަލު ގެނެސްފައިވާ ކަމަށެވެ.
އެގޮތުން 12 އޭޕްރީލް 2020 ވަނަ ދުވަހުން ފެށިގެން މި ކްލިނިކުގެ ޚިދުމަތްތައް ކުރިއަށް ދާނީ ކޮންމެ ދުވަހެއްގެ ވެސް ހެނދުނު 10:00 އަކުން 18:00 އަށް ކަމަށާއި ކްލިނިކަށް ދިވެހިންގެ އިތުރުން ބިދޭސީންވެސް ދެއްކޭނެ އިންތިޒާމް ވަނީ ހަމަޖެހިފައިވާ ކަމަށް އައިޖީއެމްއެޗް އިން ބުންޏެވެ. ކޮވިޑް-19 އާ ގުޅިގެން މާލޭ ހިޔާ 2ގެ ފުރަގަހުގައި ކުރިއަށްގެންދިޔަ ދަތުރުވެރިންގެ ކްލިނިކް، ފްލޫ ކްލިނިކަކަށް ބަދަލު ކޮށްފައިވަނީ އޭޕްރީލް 4 ވަނަ ދުވަހުން ފެށިގެންނެވެ.
ރާއްޖެއިން މި ބަލި ފެތުރިޔަނުދީ ކޮންޓްރޯލް ކުރުމަށްޓަކައި އެޅި ފިޔަވަޅުތަކުގެ ތެރޭގައި، ރާއްޖެއަށް ފަތުރުވެރިން އައުން މެދުކަނޑާލުމަށް ނިންމުމާއި، ރާއްޖެއިން ބޭރުން ދަތުރުކޮށްފައި އަންނަ ހުރިހާ ދިވެހިންވެސް ކަރަންޓީން މުއްދަތެއް ފުރިހަމަ ކުރުމަށް ނިންމާފައިވުމާއި ގުޅިގެން، ޓްރެވަލާސް ކްލިނިކުން ފަރުވާ ހޯދާ މީހުންގެ އަދަދުތައް އެއްކޮށް މަޑުޖެހުމަކަށް އައިސްފައިވެއެވެ. އެކަމާއި ގުޅިގެން އެ ކްލިނިކް ފްލޫ ކްލިނިކްއަކަށް ބަދަލުކޮށްފައިވާއިރު ކްލިނިކްގެ ޚިދުމަތްތައް ކުރިން ދެމުން އައީ ކޮންމެ ދުވަހެއްގެވެސް ހެނދުނު 10:00 ން ރޭގަނޑޫ 22:00 އަށެވެ. ނަމަވެސް މާދަމާއިން ފެށިގެން ހިދުމަތް ދޭ ވަގުތަށް ބަދަލު އަންނާނެއެވެ.
ހުން އައިސް ކެއްސާނަމަ ނުވަތަ ރޯގާގެ ޢަލާމާތެއް ހުރިނަމަ، ހޮސްޕިޓަލަށް ދިޔުމުގެ ބަދަލުގައި، އެ ކްލިނިކަށް ދުރުވެ ޑޮކްޓަރަށް ދެއްކުމަށް އައިޖީއެމްއެޗްއިން ވަނީ އިލްތިމާސްކޮށްފައެވެ.
