ކޮވިޑް-19: އިންޑިއާގައި ލޮކްޑައުންގެ މުއްދަތު އިތުރުކޮށްފި
11 އެޕްރީލު 2020 | ހޮނިހިރު 12:30މުއްދަތު އިތުރުކުރީ ކިހާ ދުވަހަކަށް ކަމެއް ހާމައެއް ނުކުރޭ
ދިއްލީ އިންޓަނޭޝަނަލް އެއަރޕޯޓުގައި ބަޔަކު ފުރަން ގޮސް
ކޮވިޑް-19 އާ ގުޅިގެން އިންޑިއާގައި އިއުލާންކުރި ލޮކްޑައުންގެ މުއްދަތު އިތުރު ކުރުމަށް ނިންމައިފިއެވެ.
ހޮނިހިރު ދުވަހު، އެ ޤައުމުގެ ވެރިރަށް ދިއްލީގެ ޗީފް މިނިސްޓަރު އަރްވިންދް ކޭޖްރިވާލް ކުރެއްވި ޓްވީޓެއްގައި ވިދާޅުވީ، އިންޑިއާގެ ލޮކްޑައުންގެ މުއްދަތު އިތުރުކުރުމަށް ބޮޑު ވަޒީރު ނަރެންދްރަ މޯދީ ނިންމަވާފައިވާ ކަމަށެވެ. އެކަމަކު ލޮކްޑައުންގެ މުއްދަތު އިތުރުކުރާނީ ކިހާ ދުވަހަކަށް ކަމެއް ކޭޖްރްވާލް ހާމައެއް ނުކުރައްވައެވެ. ޗީފް މިނިސްޓަރުގެ ޓްވީޓްގައި ވިދާޅުވީ، ދުނިޔޭގައި ތަރައްޤީވެެފައިވާ ގިނަ ގައުމުތަކާއި އަޅާބަލާއިރު އިންޑިއާ ހާލަތު ރަނގަޅު ކަމަށެވެ. ސަބަބެއް ކަމަށް އޭނާ ވިދާޅުވީ، ކުރިޔާލާ އިންޑިއާ ލޮކްޑައުން ކުރުމެވެ.
މާރޗް މަހުގެ 24 ވަނަ ދުވަހުން ފެށިގެން އިންޑިއާގައި އިއުލާންކުރި 24 ދުވަހުގެ ލޮކްޑައުންގެ މުއްދަތު ހަމަވާނީ އަންގާރަ ދުވަހުއެވެ. ލޮކްޑައުން އިއުލާން ކުރައްވަމުން މޯދީ ވިދާޅުވެފައިވަނީ، ލޮކްޑައުންގެ ސަބަބުން ޤައުމުގެ އިގްތިސާދަށް އޭގެ އަސަރުކުރާނެ ކަމަށާއި، އެހެން ނަމަވެސް އިންސާނުން ސަލާމަތްކުރުން މުހިއްމު ކަމަށެވެ.
އިންޑިއާގައި ކޮވިޑް-19 ޖެހުނު މީހުންގެ އަދަދު ހޮނިހިރު ދުވަހާ ހަމައަށް ވަނީ 7،000 އަށް އަރާފައެވެ. އެއީ އަލަށް ރިޕޯޓް ކުރެވުނު 1000 ކޭސްއާ އެކުގައެވެ. ހެލްތް މިނިސްޓްރީން ބުނީ، ބަލި ޖެހިގެން 200 އަށް ވުރެ ގިނަ މީހުން މަރުވެފައިވާ ކަމަށެވެ. މި ބަލިން ރަނގަޅުވެފައިވަނީ، 643 މީހުންނެވެ.
