މިސްރުގައި އިއުލާންކޮށްގައިވާ ކުއްލި ނުރައްކަލުގެ ޙާލަތުގެ އަނެއްކާވެސް އިތުރު 3 މަސްދުވަހަށް އިތުރުކޮށްފިއެވެ.

ރައީސް އަބްދުލްފައްތާޙް އަލް ސީސީގެ އަމުރުފުޅަށް ކުއްލި ނުރައްކަލުގެ ޙާލަތުގެ މުއްދަތު އިތުރު 3 މަސް ދުވަހަށް އިތުރު ކުރީ ޖެނުއަރީ 13 ވަނަ ދުވަހުން ފެށިގެންނެވެ. 2017ވަނަ އަހަރުގެ އެޕްރީލް މަހު ސީސީ މިސްރުގައި ކުއްލި ނުރައްކަލުގެ ޙާލަތު އިއުލާންކުރެއްވުމަށްފަހު 3 މަހުން 3 މަހުން އެ އަމުރުގެ މުއްދަތު ގެންދަވަނީ އިތުރު ކުރައްވަމުންނެވެ.

މިފަހަރުވެސް މުއްދަތު އިތުރުކުރެއްވީ ސަލާމަތީ ސަބަބުތަކަށްޓަކައި ކަމަށް ބުނެއެވެ. އަދި މިފަހަރު ކުއްލި ނުރައްކަލުގެ އަމުރުގެ މުއްދަތު އިތުރުކޮށްފައި މިވަނީ މިސްރުގެ ވެރިރަށް ޤާހިރާގެ ހެލްވާން ޑިސްޓްރިކްޓްގައި ގިބްޠީންނައި ދެކޮޅަށް ނުރައްކާތެރި 2 ޙަމަލާއެއް ހުކުރު ދީފައި ވަނިކޮށެވެ.

މިސްރުގެ ރަސްމީ ޚަބަރު ފަތުރާ ވަޞީލަތްތަކުން ބުނާ ގޮތުގައި ރައީސް އަބްދުލް ފައްތާޙް އަލް ސީސީ އެޤައުމުގައި އިއުލާންކޮށްފައިވާ ކުއްލި ނުރައްކަލުގެ ޙާލަތުގެ އަމުރުގެ މުއްދަތު އިތުރުކުރެއްވީ "ޤައުމުގައި އަމަން ޤާއިމްކުރެއްވުމަށާއި، ޓެރަރިޒަމް ހުއްޓުވުމަށް ކުރަމުންދާ މަސައްކަތުގެ ދަށުން"ކަމަށެވެ.

މި އަމުރުގެ މުއްދަތުގައި ޤާއިމްކުރެވޭ ޚާއްސަ ކޯޓުތަކަށް، ޚާއްސަ އަމުރެއްގެ ދަށުން މީހުން ހާޒިރުކޮށް މައްސަލަ ބެލުމުގެ ބާރު ރައީސް ސީސީއަށް ލިބިވަޑައިގަނެއެވެ. ސްޓޭޓް ސެކިއުރިޓީ އިމަރޖަންސީ ކޯޓުތަކުން ކުރާ ހުކުމްތައް އިސްތިއުނާފެއް ނުކުރެވޭނެއެވެ.

ހަމައެއާއިއެކު، ކުއްލި ނުރައްކަލުގެ ޙާލަތުގައި އާއްމުންގެ މުވާޞަލާތީ މުއާމަލާތްތައް އަޑު އެހުމާއި، ނޫސްވެރިކަމާއި ޚިޔާލު ފާޅުކުރުމުގެ މިނިވަންކަން ހިފެހެއްޓުމުގެ ބާރި ރައީސް ސީސީއަށް ލިބިވަޑައިގަންނަވައެވެ. އަދި ވިޔަފާރިތައް ބަންދުކުރުމާއި، ކާފިއު އިއުލާންކުރުމާއި، އާއްމުންގެ މުދާ ހިފެހެއްޓުމާއި، ސަރަހައްދުތަކުން މީހުން ހުސްކުރުންފަދަ ބޮޑެތި ބާރުތައްވެސް ލިބިވަޑައިގަންނަވައެވެ.

މުއްދަތެއް ނެތް ގޮތަށް، ބޭނުން އިރަކު، ބޭނުން ހުއްޖަތެއް ދެއްކުމަށްފަހު މީހުން ހައްޔަރުކުރުމުގެ ބާރު މި މުއްދަތުގައި ސަލާމަތީ ބާރުތަކަށް ލިބިގެންވެއެވެ.

ސީސީގެ މި ފިޔަވަޅުތަކަށް ބައިނަލްއަޤްވާމީ މުޖްތަމައުން ގެންދަނީ ފާޑުކިޔަމުންނެވެ. އިންސާނީ ހައްޤުތަކަށް މަސައްކަތްކުރާ ޖަމާޢަތްތަކުން ބުނާ ގޮތުގައި 2013ވަނަ އަހަރު ސީސީ ވެރިކަމަށް ވަޑައިގަތްފަހުން މިސްރުގެ އިންސާނީ ހައްޤުތަކުގެ ޙާލަތު ވަނީ ވަރަށް ބޮޑަށް ދަށަށް ގޮސްފައެވެ.

2013ވަނަ އަހަރު ސީސީ ވެރިކަމަށް ވަޑައިގެންފައިވަނީ މިސްރުގެ ރައީސްކަމަށް އިންތިޚާބުވެވަޑައިގެން ހުންނެވި އިޚްވާނުލް މުސްލިމީންގެ މުޙައްމަދުގެ މުރްސީގެ ވެރިކަން ވައްޓާލެއްވުމަށްފަހުއެވެ. ސީސީއަކީ އޭރުގެ އަސްކަރިއްޔާގެ ވެރިޔާއެވެ.

މިއަހަރުގެ ފަހުކޮޅު މިސްރުގައި ރިޔާސީ އިންތިޚާބު އޮންނާނެއެވެ. މި އިންތިޚާބުގައި ސީސީ ދެވަނަ ދައުރަކަށް ކުރިމަތިލައްވާނެއެވެ.