ނިއު ޔޯކް ގައި މަރުވަމުންދާ މީހުންގެ ހަށިގަނޑުތަކާއި ހަވާލުވާނެ މީހެއްނެތް!
11 އެޕްރީލު 2020 | ހޮނިހިރު 03:40އެމެރިކާގައި އެންމެ ގިނަ އަދަދަކަށް މީހުން މަރުވަމުން އަންނަނީ ނިއުޔޯކުން
ހަރޓް އައިލެންޑްގައި މީހުން ވަޅުލުމުގެ ކަންކަން ކުރަމުންދަނީ
ކޮވިޑް-19 ޖެހިގެން އެންމެ ގިނަ އަދަދަކަށް މީހުން މަރުވަމުން އަންނަ އެމެރިކާގެ ނިއު ޔޯކް ގައި މަރުވަމުން އަންނަ މީހުންގެ ހަށިގަނޑު ތަކާއި ހަވާލުވާނެ މީހަކު ނެތް މީހުން ހަރޓް އައިލެންޑް ގައި ވަޅުލާން ފަށައިފި އެވެ.
މިހާތަނަށް އައިއިރު އެމެރިކާއިން 18،000 ށް ވުރެ ގިނަ މީހުން ވައިރަސް ޖެހިގެން މަރުވެފައިވާއިރު 5000 ށް ވުރެ ގިނަ މީހުން މަރުވެފައި ވަނީ ނިއު ޔޯކުންނެވެ.
ކޮވިޑް-19 ނޫން ބަލިތައް ޖެހިގެން މަރުވާ މީހުންގެ ހަށިގަނޑު ތަކާއި ހަވާލު ވާނެ މީހުން ނެތްއިރު، އެ މީހުން ވަޅުލާނެ މީހުން ނެތުމުގެ ދަތިކަން ވެސް އެސިޓީގެ އޮފިޝަލުންނަށް ވަނީ ކުރިމަތިވެފަ އެވެ. އެ ސްޓޭޓު ގެ އޮފިޝަލުން ވަނީ ލޭބަރުންނާއި މަރުވާ މީހުންގެ ހަށިތައް ވަޅުލުމުގެ ކަންކަން ކުރިޔަށް ގެންދިޔުމަށް ހަވާލުކޮށްފަ އެވެ.
މީގެ ކުރިންވެސް ހަވާލުނުވާ މީހުންގެ ހަށިތައް ވަޅުލަމުން އަންނަނީ ހަރޓް އައިލެންޑްގައެވެ. މީހުންގެ ހަށިތައް ވަޅުލަނީ ސަންދޯކު ގައި ނަން ޖެހުމަށް ފަހުގަ އެވެ. އެއީ ފަހުން އޭގެ ތެރެއިން މީހަކު ހޯދުމަށް އާއިލާގެ މީހަކު ނުވަތަ އެމީހުންނާއި ގުޅުންހުރި މީހަކު އައިސްފިނަމަ ހޯދަން ފަސޭހައަކަށެވެ.
ނިއު ޔޯކް ސްޓޭޓުން މީޑިއާ ތަކަށް މައުލޫމާތު ދެއްވި އޮފިޝަލަކު ވިދާޅުވެފައިވަނީ، ވަޅުލަމުންދާ މީހުންގެ ހަށިގަނޑު ބަލާ ފަހުން އަންނަ މީހުންނާ ހަށިގަނޑު ހަވާލުކުރާނެ ކަމަށެވެ. މަރުވަމުންދާ މީހުންގެ ހަށިތައް ވަޅުލަމުންދަނީ މެޝިނަކުން ފަސްގަނޑު ކޮނެގެންނެވެ.
ކުރިން މި މަސައްކަތް ކުރަމުން އައީ ޖަލުގައި ތިބި މީހުންނެވެ. ނަމަވެސް ކޮވިޑް-19 ފެތުރޭތީ ސޯޝަލް ޑިސްޓެންސިން ގެންގުޅުމަށާއި ވައިރަސް ފެތުރުން ކޮންޓްރޯލް ކުރުމުގެ ގޮތުން އެމީހުންގެ ބޭނުމެއް މިކަމުގައި ނުކުރެ އެވެ. ބަރޖެއް ގައި މީހުން ގެ ހަށިގަނޑުތައް ގެންނަނީ ރެފްރިޖަރޭޓް ކޮށްފައި ހުންނަ ޓްރަކްތަކެއްގަ އެވެ.
