ކޮވިޑް-19: ވައިރަސް ފެތުރޭތޯ ބެލުމަށް ހަދާ ސަރވޭގައި 500 ސާމްޕަލް ނަގާނެ
ސާމްޕަލްތައް ނަގާނީ ރާއްޖޭގެ އާބާދީ އެކި ކެޓަގަރީތަކަށް ބަހާލައިގެން މާލެ އާއި އަތޮޅުތަކުން
އެޗްޕީއޭގެ މެޑިކަލް އޮފިސަރު ޑރ. ނަޒްލާ ރަފީގު
ކޮވިޑް-19 ރާއްޖޭގައި އާއްމުންގެ ތެރެއަށް ފެތުރިފައި ވޭތޯ ނުވަތަ ނޫންތޯ ބެލުމަށް ކުރާ ސަރވޭގައި ރާއްޖޭގެ އާބާދީގެ ތެރެއިން 500 ސާމްޕަލް ނަގާނެކަމަށް ނެޝަނަލަ އިމަޖެންސީ އޮޕަރޭޝަންސް ސެންޓަރު (އެންއީއޯސީ) އިން ބުނެފި އެވެ.
ކޮވިޑް-19 ގެ ރާއްޖޭގެ އެންމެ ފަހުގެ މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރެއްވި ސުވާލަށް ޖަވާބު ދެއްވަމުން އެޗްޕީއޭގެ މެޑިކަލް އޮފިސަރު ޑރ. ނަޒްލާ ރަފީގު ވިދާޅުވީ މި ސާމްޕަލްތައް ނަގާނީ ރާއްޖޭގެ އާބާދީ އެކި ކެޓަގަރީތަކަށް ބަހާލައިގެން މާލެ އާއި އަތޮޅުތަކުން ކަމަށެވެ. ދެތިން ދުވަސްތެރޭގައި މިސަރވޭ ފެށޭތޯ މަސައްކަތްކުރައްވަމުން ގެންދަވާ ކަަމަށް ޑރ.ނަޒްލާ ވިދާޅުވި އެވެ.
ކޮވިޑް-19 ރާއްޖޭގައި އާއްމުންގެ ތެރޭގައި ފެތުރިފައި ވޭތޯ ބެލުމަށް ސަރވޭއެއް ކުރުމަށް ހަމަޖެހިފައިވާކަމަށް މީގެކުރިން ބޭއްވި ނޫސްވެރިންގެ ބައްދަލުވުމެއްގައި ޑރ ނަޒްލާ ވަނީ ވިދާޅުވެފަ އެވެ. ޑރ ނަޒްލާ އިތުރަށް ވިދާޅުވީ މިސަރވޭގެ ކަންކަން ދެ ހަފްތާގެ ތެރޭގައި ނިންމާލެވޭތޯ މަސައްކަތްކުރައްވާ ކަަމަށެވެ.
މީގެއިތުރުން ޑރ ނަޒްލާ ވިދާޅުވީ ކޮމިޔުނިޓީ ސްޕްރެޑް އެޅޭތޯ އިތުރަށް ބައްލަވަމުން ގެންދަވާކަމަށާއި މިހާރު އަޅާފައި ހުރި ފިޔަވަޅުތަކަށް ލުޔެއް ގެންނާނީ ބަލަންޖެހޭ ބެލުންތައް ބެލުމަށްފަހު ކަމަށެވެ. ރާއްޖޭގައި އިއުލާންކޮށްފައިވާ ސިއްހީ ކުއްލި ނުރައްކަލުގެ ހާލަތުވެސް ވަނީ މިމަހުގެ 30 ވަނަ ދުވަހާ ހަމައަށް ދިގު ދައްމާލާފަ އެވެ.
މިހާތަނަށް ރާއްޖެއިން ކޮވިޑް-19 19 މީހަކަށް ޖެހިފައިވާއިރު 13 މީހަކު ވަނީ ރަނގަޅުކުރެވިފަ އެވެ. އަދި 4 މީހަކަށް އަންނަނީ ރާއްޖޭގައި ފަރުވާދެމުންނެވެ.
