ކޮވިޑް-19 ގެ ރާއްޖޭގެ އެންމެ ފަހުގެ މައުލޫމާތުތައް އާންމުންނާ ހަމައަށް ކޮންމެ ދުވަހަކު ގެނެސްދެއްވަމުން އަންނަ ނޭޝަނަލް އިމަަޖެންސީ އޮޕަރޭޝަން ސެންޓަރުގެ ތަރުޖަމާނު މަބްރޫކް އަބްދުލްއަޒީޒް ފާއިތުވެގެންދިޔަ ނޫސްވެރިންގެ ދެ ބައްދަލުވުމުގައި ނުފެންނާތީ އާންމުންވަނީ ވީ ކީއްތޯ ބަލަން ބޭނުންވެފަ އެވެ.
ކޮވިޑް-19 އާއި ގުޅިގެން އާންމު ރައްޔިތުންގެ ހުރި ކަންބޮޑުވުންތަކަށް އަލިއަޅުވާލާ ބޭނުންވާ ހުރިހާ މައުލޫމާތުތަކެއް އާންމުންނާ ހަމައަށް އެއްވެސް ފޮރުވުމެއް ނުތަނަވަސްކަމެއް ނެތި މަބްރޫކް ފޯރުކޮށްދެއްވަމުން ގެންދަވާތީ މަދު ދުވަސްކޮޅެއްގެ ތެރޭގައި މަބްރޫކް ވަނީ ގިނަ ބައެއްގެ ހިތުން ޖާގަހޯއްދަވާފަ އެވެ. ނޫސްވެރިން ކުރާ ސުވާލުތަކަށް މަބްރޫކް ޖަވާބު ދެއްވާގޮތާއި ނޫސްވެރިންގެ ބައްދަލުވުންތައް ކުރިޔަށް ގެންދަވާގޮތަށް ގިނަ ބައެއްގެ ތައުރީފް މަބްރޫކަށް ވަނީ ލިބިގެންގޮސްފަ އެވެ. އެހެންކަމުން މަބްރޫކް ނުފެނި ދިޔުމާއެކު ގިނަ ބަޔަކު ވަނީ އެކަމުގެ ކަންބޮޑުވުން ސޯޝަލް މީޑިޔާގައި ފާޅުކޮށްފަ އެވެ.
އެންމެފަހުން މަބްރޫކް މިވަނީ ދިވެހި ރައްޔިތުންނަށް އެކަމުގެ ޖަވާބު ދެއްވާފައެވެ. ވެގެން އުޅޭގޮތުން އޮޅުންފިލުވައިދެއްވަމުން ރައީސް އޮފީހުގެ އަންޑަ ސެކެޓްރީ މަބްރޫކް ކުރެއްވި ޓްވީޓެއްގައި ވިދާޅުވީ ސިއްހީ ސަބަބަކާ ހެދި ދުވަސްކޮޅަކަށް ގޭގައި އަރާމު ކުރަން ޑޮކްޓަރުން ލަފާ ދެއްވާފައިވާ ކަމަށެވެ. އެކަމަކު ވަރަށް އަވަހަށް އަނެއްކާ ވެސް ނޫސްވެރިންގެ ބައްދަލުވުންތަކާ ގުޅިވަޑައިގަންނަވާނެ ކަމުގެ ޔަގީންކަން އޭނާ ދެއްވި އެވެ.
މަބްރޫކް މިޓްވީޓް ކުރެއްވުމުން ގިނަ ބަޔަކު އަންނަނީ މަބްރޫކަށް އަވަސް ޝިފާއެއް ދެއްވުމަށް އެދި ސޯޝަލް މީޑިޔާގައި ދުއާކޮށް ހެޔޮއެދޭ ބަސްތައް ޕޯސްޓުކުރަމުންނެވެ. އަދި މަބްރޫކް ނެތުމުން ނޫސްވެރިންގެ ބައްދަލުވުންތައް ފަޅުކަން ހާމަކޮށް މީހުން ވަނީ ވީ އެންމެ އަވަހަށް މަބްރޫކް ނޫސްވެރިންގެ ބައްދަލުވުންތަކުން ފެންނަން ބޭނުންވާކަން ސޯޝަލް މީޑިޔާގައި ހާމަކޮށްފަ އެވެ.
