ނޫސްވެރިންގެ މަސައްކަތަށް ހުރަސް އެޅޭފަދަ ކަމެއް އެއްވެސް ފަރާތަކުން ނުކުރުމަށް މީޑިއާ ކައުންސިލުން ގޮވާލައިފި
ނޫސްވެރިންނަކީ ގައުމުގައި ހިނގާ ކަންކަން ރައްޔިތުންނާއި ހަމައަށް ފޯރުކޮށްދިނުމުގެ މުހިއްމު ޒިންމާ އަދާކުރާ ފަރާތެއް
މީޑިއާ ކައުންސިލްގެ މިރޭގެ ބައްދަލުވުން
ނޫސްވެރިންގެ މަސައްކަތަށް ހުރަސް އެޅޭ ފަދަ ކަމެއް އެއްވެސް ފަރާތަކުން ނުކުރުމަށް މީޑިއާ ކައުންސިލުން ގޮވާލައިފިއެވެ.
މޯލްޑިވްސް މީޑިއާ ކައުންސިލުން އާދިއްދަ ދުވަހުގެ ރޭ ނެރެފައިވާ ނޫސް ބަޔާނެއްގައި ބުނެފައި ވަނީ، މި ފަހަކަށް އައިސް ނޫސްވެރިންގެ މަސައްކަތަށް ތަފާތު ގޮންޖެހުންތައް ކުރިމަތި ކުރުވަމުންދާކަން އެ ކައުންސިލަށް ފާހަގަކުރެވިފައިވާ ކަމަށެވެ.
އެގޮތުން އެކި އެކި ނިއުސް އިވެންޓްތައް ކަވަރ ކުރުމުގައްޔާއި، އެކި އެކި ހާދިސާތައް ކަވަރު ކުރުމުގައި މީޑއާތަކަށް އެކި ހުރަސްތައް ކުރިމަތި ކުރުވާ، މަސްއޫލިއްޔަތު އަދާކުރުމަށް ހުރަސްއަޅާ، މީޑިއާތަކުގެ މެދުގައި ތަފާތުކުރުންތައް ގެންގުޅޭކަން ފާހަގަކުރެވޭ ކަމަށް މީޑިއާ ކައުންސިލުން ނެރުނު ބަޔާނުގައި ވެއެވެ.
އެމްއެމްސީން ބުނީ، ނޫސްވެރިންނަކީ ގައުމުގައި ހިނގާ ކަންކަން ރައްޔިތުންނާ ހަމައަށް ފޯރުކޮށްދިނުމުގެ މުހިއްމު ޒިންމާ އަދާކުރާ ފަރާތައް ވާއިރުގައި، އެ މައުލޫމާތު ގެނެސް ދިނުމަށް ހުރަސްއެޅޭ ފަދަ އެއްވެސް ކަމެއް އެއްވެސް ފަރާތަކުން ކުރުމަކީ ގަބޫލުކުރެވޭނޭ ކަމެއް ނޫން ކަމަށެވެ.
"މީޑިއާގެ މިނިވަންކަން ދެމެހެއްޓުމާއި، އެ މިނިވަންކަމަށް އުނިކަން އަންނަ ކަންކަން ބަލައި ފިޔަވަޅު އެޅުމަކީ، މި ކައުންސިލްގެ ޒިންމާއެއް ކަމަށް ވާތީ، އެ މަސައްކަތް ކުރަމުންދާ ވާހަކަ މި ފުރުސަތުގައި ދަންނަވަމެވެ."
ނޫސްވެރިކަމަށް ފަހި މާހައުލެއް ގާއިމްކޮށްދީ، ނޫސްވެރިންގެ މަސްއޫލިއްޔަތު އަދާކުރުމަށް ގާނޫނާއި ގަވާއިދު ތަންދޭ އެންމެ ފުޅާ ދާއިރާއެއްގައި އެ ފުރުސަތު ތަނަވަސްކޮށްދިނުމަށް ކަމާގުޅޭ އެންމެހާ ފަރާތްތަކަށް މީޑިއާ ކައުންސިލުން ވަނީ އިލްތިމާސްކޮށްފައެވެ.
މީޑިއާ ކައުންސިލުން މިފަދައިން ބަޔާން ނެރެފައި މި ވަނީ ޣައިރު ގާނޫނީ އެއްވުންތައް ލައިވްކުރާ ފަރާތްތަކާ ދެކޮޅަށް ފިޔަވަޅުއަޅާނެ ކަމުގެ އިންޒާރު މޯލްޑިވްސް ބްރޯޑްކާސްޓިން ކޮމިޝަނުން ދީފައި ވަނިކޮށެވެ. މީގެ އިތުރުން ހުކުމެއް ތަންފީޒުކުރަމުންދާ މީހުން ދޭ މައުލޫމާތުތައް ނޫސް މީޑިއާތަކުން ނުގެނެސްދިނުމަށް މޯލްޑިވްސް ކަރެކްޝަނަލް ސާވިސް އިން ވަނީ ގޮވާލާފައެވެ.
