ސިއްހީ ކުއްލި ނުރައްކަލުގެ ހާލަތުގެ މުއްދަތު އިތުރުކޮށްފި
10 އެޕްރީލު 2020 | ހުކުރު 16:10ކުއްލި ނުރައްކަލުގެ ހާލަތު އިއުލާން ކުރީ މާޗް މަހުގެ 12 ވަނަ ދުވަހު
ހެލްތް މިނިސްޓަރު އަބްދުﷲ އަމީން
ރާއްޖޭގައި އިއުލާން ކޮށްފައިވާ ސިއްހީ ކުއްލި ނުރައްކަލުގެ ހާލަތުގެ މުއްދަތު އިތުރު ކޮށްފިއެވެ.
ހެލްްތް މިނިސްޓްރީން ނެރުނު ބަޔާނެއްގައި ބުނީ، ދިވެހިރާއްޖޭގައި ފުޅާ ދާއިރާއެއްގައި ކޮވިޑް-19 ފެތުރުމުގެ ނުރައްކާ އަދިވެސް އޮތުމާއެކު، މާޗް މަހުގެ 12 ވަނަ ދުވަހު އިޢުލާނުކޮށްފައިވާ އާންމު ސިއްހަތުގެ ކުއްލި ނުރައްކަލުގެ ހާލަތު ދެމި އޮންނާނެ ކަމަށެވެ.
އަދި އެ ނުރައްކާ ކުޑަކޮށް، އާންމު ރައްޔިތުންގެ ސިއްހަތާއި ރައްކާތެރިކަން ކަށަވަރު ކުރުމަށް ޓަކައި ހާއްސަ ފިޔަވަޅުތަކެއް އަޅަން ޖެހޭ ކަމަށް ޑިރެކްޓަރ ޖެނެރަލް އޮފް ޕަބްލިކް ހެލްތް ލަފާދީފައި ވާތީ މާޗް މަހުގެ 12 ވަނަ ދުވަހުން ފެށިގެން އާންމު ސިއްހަތުގެ ކުއްލި ނުރައްކަލުގެ ހާލަތުގެ މުއްދަތު، މި މަހުގެ 30 ވަނަ ދުވަހާ ހަމަޔަށް ގެ ނިޔަލަށް ދެމިއޮންނާނެ ކަމަށް ހެލްތް މިނިސްޓަރު އަބްދުﷲ އަމީން ސޮއިކުރައްވާ ނެރުއްވި ބަޔާނުގައި ވެއެވެ.
ރާއްޖޭގައި ފުރަތަމަ ފަހަރަށް ސިއްހީ ކުއްލި ނުރައްކަލުގެ ހާލަތު އިއުލާން ކޮށްފައިވަނީ، ކޮވިޑް-19 ގެ ކޭސްތަކެއް ރާއްޖެއިން ފެނުމާއި ގުޅިގެންނެވެ. ރާއްޖެއިން މިހާތަނަށް އެ ބައްޔަށް 19 މީހަކު ވަނީ ޕޮޒިޓިވްވެފައެވެ. އޭގެ ތެރެއިން 13 މީހަކު ބަލިން ފަސޭހަވެ މިހާރު ފަރުވާދެމުންދަނީ ހަތަރު މީހަކަށެވެ. އެ ހަތަރު މީހުންނަކީ އިނގިރޭސިވިލާތުން އައި ދިވެހިންނެވެ. އެ އެންމެންގެވެސް ހާލު ރަނގަޅެވެ.
