މޯލްޑިވްސް ޕޮލިސް ސާވިސްގައި މަސައްކަތް ކުރާ އިސް ފުލުހެއްގެ ފަރާތުން ސަރުކާރަށާއި ސަރުކާރުގެ ވެރިންނަށް އަމާޒުކޮށް ފުރައްސާރަ ކުރަމުންދާ މައްސަލަ ފެންމަތިވެއްޖެއެވެ.

ސަރުކާރުން ނިންމާ ކަންކަމާއި އަދި ސަރުކާރާ ގުޅޭ ގޮތުން، ނޫސްތަކުގައި ޖަހާ ޚަބަރުތަކަށް ވަރަށް ފާޅުގައި ފުރައްސާރަ ކުރުމުގެ ގޮތުން އޭނާ ކޮށްފައިވާ ކޮމެންޓް ތަކުގެ ސްކްރީން އިމޭޖްތަކެއް ރާއްޖެއެމްވީ އާ އާއްމު ފަރާތަކުން ވަނީ ހިއްސާ ކޮށްފައެވެ.

ރާއްޖެއެމްވީ އަށް މައުލޫމާތު ހިއްސާކުރި ފަރާތުން ބުނެފައިވަނީ، ސަރުކާރަށް މަލާމާތާއި ފުރައްސާރަކޮށްފައިވާ ފަރާތަކީ ފުލުހުންގެ ޚިދުމަތުގައި ހުރި މީހަކަށް ވެފައި، ފުލުހުންނަކީ އެމީހުންނާއި އެމީހުންގެ އާއިލާތަކަށް ގިނަގުނަ އިނާޔާތްތަކާއި، ގާނޫނީ ބާރުތައް ލިބިފައިވާ ބަޔަކަށް ވުމާއެކު، މިފަދަ މަގާމުތަކުގައި ތިބޭ މީހުން ހިފަހައްޓަންޖެހޭ އަޚްލާގީ މިންގަނޑުތަކާއި، ތަބާވާންޖެހޭ ގާނޫނީ އިންތަކަށް ބޯލެނބުމެއް ނެތި ހިތުހުރި ގޮތަކަށް ފާޅުގައި ކުރަމުން ދިއުމަކީ ވަރަށް ކަންބޮޑުވާ ކަމެއް ކަމުގައެވެ.

ރާއްޖެއެމްވީ އިން އިތުރަށް ބެލި ބެލުމުން، ސަރުކާރަށް ނިސްބަތްވާ ގޮތައް މަލާމާތުގެ ކޮމެންޓްތައް ކޮށްފައިވާ ފަރާތަކީ މޯލްޑިވްސް ޕޮލިސް ސާވިސްގައި ސްޓޭޝަން އިންސްޕެކްޓަރގެ މަގާމް އަދާކުރަމުން ގެންދާ އަހްމަދު އިސްމާއީލް އެވެ. ޚަބަރުގައި ހާމަ ނުކުރި ނަމަވެސް، އޭނާގެ ޚިދުމަތުގެ ރެކޯޑް ނަންބަރުވެސް ރާއްޖެއެމްވީ އަށް ވަނީ ލިބިފައެވެ.

ފުލުހުންގެ އިސް މަގާމެއްގެ ގޮތުގައި ބެލެވޭ ސްޓޭޝަން އިންސްޕެކްޓަރގެ މަގާމުގައި ހުރި އަހްމަދު އިސްމާއީލް ފޭސްބުކް މެދުވެރިކޮށް ސަރުކާރާއި ސަރުކާރުގެ ވެރިންނަށް ނިސްބަތްކޮށް،ލިޔެފައިވާ ކޮމެންޓްތަކަކީ އެ ފަދަ ޒިންމާދާރު މަގާމެއްގައި ހުރި މީހެއްގެ ފަރާތުން ފެނުން އެކަށީގެން ނުވާފަދަ ދަށު ދަރަޖައިގެ ވާހަކަތަކަށް ވުމުގެ އިތުރުން އެ ކޮމެންޓްތަކަކީ ރައްޔިތުންގެ ހިތުގައި ސަރުކާރާ މެދު ނަފްރަތާއި ރުޅިވެރިކަން އުފެއްދުމަށް ލިޔެފައިވާ ކޮމެންޓްތަކެއް ކަމަށްވެސް ގަބޫލު ކުރެވެއެވެ.

މި ގޮތުން، ކޮރޯނާވައިރަސްގެ ނުރައްކަލުން ރައްޔިތުން ސަލާމަތް ކުރެއްވުމަށް ސަރުކާރުން އަޅުއްވަމުން ގެންދަވާ ފިޔަވަޅު ތަކުގެ ތެރެއިން، މީހުން ކަރަންޓީން ކުރުމަށް މާލޭ ސަރަހައްދުގައި ހުރި ކަރަންޓީން ފެސިލިޓީތައް ބައްލަވާލެއްވުމަށް ރައީސް ކުރެއްވި ޒިޔާރަތުގެ ޚަބަރަކަށް ރައްދު ދެމުން "އާނ ތީ ހަމަ އަތް ޖަހަން ޖެހޭވަރުގެ ބޮޑު މަޝްރޫއެއް" ކަމަށް އޭނާ ބުނެފައިވެއެވެ.

"މިއީ މުއްސަނދިން ދީލަތި ކަން ދައްކަންވީ ވަގުތު" ކަމަށް ބުނެ ނޫހުގައި އެ ދުވަހުގެ ހުކުރު ޚުތުބާ އާ ހަވާލާދީ ލިޔެފައިވާ ޚަބަރަށް ކޮމެންޓު ކުރަމުން، "އެޖެންޑާ 19 އަނެއް ދިވެހި ރާއްޖެ، ކޮބާ އަތްޖަހާ ކޮނޑުހުޅުން ނެއްޓެންދެން" މިހެން ބުނެ ކޮމެންޓް ކޮށްފައިވެއެވެ.

"އީ.ޔޫ. އިން ރާއްޖެއަށް 51 މިލިއަން ރުފިޔާ ހިލޭ އެހީ ދީފި" ކަމަށް ބުނެ ލިޔެފައިވާ ޚަބަރާ ގުޅިގެން އޭނާ ލިޔެފައިވަނީ "އަނެއްކާ ބައި އަޅާނެ ލާރިގަނޑެއް ލިބުނީ" ކަމަށެވެ.

"ހުކުރު ނަމާދާއި ޖަމާއަތުގައި ނަމާދު ކުރުން ހުއްޓާލަން ނިންމައިފި" މި ސުރުޚީގެ ދަށުން ލިޔެފައިވާ ޚަބަރާ ގުޅިގެން އޭނާ ކޮމެންޓް ކުރަމުން ބުނެފައިވަނީ، "މިހެންވީމަ އުފާކުރާނެ ބަޔަކު އުޅޭނެ، އަތްޖަހާ ކުދިން އުފަލުން ނަށާނެ" ކަމަށެވެ.

އިސް ފުލުހެއްގެ ފަރާތުން މިފަދަ ދަށުދަރަޖައިގެ ކަމެއް އާއްމުންނާ ހަމައަށް ތިލަވީ، ފުލުހުންގެ ތެރޭގައި ސިޔާސީ ހަރަކާތްތެރިން އުޅޭ ކަމާއި، ވަރަށް ފާޅުގައި ސަރުކާރަށާއި، ސަރުކާރުގެ ވެރިންނަށް އެއްޗެހި ކިޔާ ފުލުހުން އުޅޭ އިރުވެސް އެމީހުންނާއި މެދު ފިޔަވަޅު ނޭޅިދާ ކަމުގެ ފާޑު ކިޔުންތައް އިތުރު ވެފައިވާ ދަނޑިވަޅެއްގައިކަން ފާހަގަ ކުރެވެއެވެ.

މިކަން މިހެން އޮތް އިރު، މުޖުތަމައުގެ އާއްމު މަސްލަހަތު ދެމެހެއްޓުމަކީ ފުލުހުންގެ ޚިދުމަތުގެ މަގްސަދުތަކުގެ ތެރޭގައި ފުލުހުންގެ ގާނޫނުގައި ބަޔާން ކޮށްފައިވާ ކަމެއް ކަމުގައި ވުމުގެ އިތުރުން، ފުލުހުންގެ ގާނޫނުގައި ބުނެފައިވަނީ، ވަކި ފަރާތަކަށް ނުޖެހި އޭނާގެ ވާޖިބު އަދާ ކުރުމަށް ހުރަސްއަޅާނެ ކަމާ މެދު އާއްމު ރައްޔިތުންގެ ހިތުގައި ޝައްކެއް އުފެދިދާނެ އެއްވެސް އަމަލެއް ކުރުމަކީ ގާނޫނީ ގޮތުން މަނާ ކަމެއް ކަމުގައެވެ.