ހިއުމަން ރައިޓްސް ކޮމިޝަނުން ކަރަންޓީން ފެސިލިޓީތަކަށް ދާން ބޭނުންވެއްޖެ!
10 އެޕްރީލު 2020 | ހުކުރު 14:16އީނާސް އާއި ގުޅާލުމުން ވިދާޅުވީ އެކަމާއި ގުޅޭ މައުލޫމާތު ހާމަކުރައްވާނެ ކަމަށް
ފަރުކޮޅުފުށި (އައިސޮލޭޝަން ފެސިލިޓީއެއްގެ ގޮތުގައި ބޭނުން ކުރަމުންދާ ރަށެއް)
ކޮވިޑް-19 އާ ގުޅިގެން އެކި ރިސޯޓްތަކުގައި ކަރަންޓީން ކުރެވިފައިވާ ފަރާތްތަކާ ބައްދަލުކޮށް، އައިސޮލޭޝަން ފެސިލިޓީތަކަށް ޒިޔާރަތްކުރަން ހިއުމަން ރައިޓްސް ކޮމިޝަނުން ހުށަހަޅައިފިއެވެ.
ރާއްޖެ.އެމްވީ އަށް އިތުބާރު ހުރި ގޮތަކަށް އެނގިފައިވާ ގޮތުގައި ރާއްޖެއިން ބޭރުން އަންނަ ދިވެހިން 14 ދުވަހަށް ކަރަންޓީން ކުރަމުންދާ ރަށްތަކަށް ދިޔުމަށް ހިއުމަން ރައިޓްސް ކޮމިޝަނުން އެދުމުން، އެއީ ރައްކާތެރިކަމެއް ނޫންކަމަށް އެ ކޮމިޝަނަށް ވަނީ އަންގާފައެވެ. ސަބަބަކީ ކަރަންޓީން ފެސިލިޓީތަކުގައި ތިބި ބައެއް ފަރާތްތަކަކީ ހަލުވި މިނެއްގައި ކޮވިޑް-19 ފެތުރެމުންދާ ޤައުމުތަކުން ރާއްޖެއަށް އައިސްތިބި މީހުންނަށް ވެފައި، މިހާރުވެސް ރާއްޖެއިން ބޭރުން އައި ބައެއް ދިވެހިންގެ ގައިން ކޮރޯނާ ވައިރަސްގެ އަސަރު ފެނިފައިވުމެވެ. އަދި ސިއްހީ މާހިރުން ގެންދަވަނީ ޕްރޮޓެކްޓިވް އިކުއިޕްމަންޓް ނެތި ކަރަންޓީނުގައި ތިބޭ މީހުންނާ ބައްދަލުނުކުރުމަށް އިރުޝާދު ދެއްވަމުންނެވެ.
އެނގިފައިވާ ގޮތުގައި ހިއުމަން ރައިޓްސް ކޮމިޝަނުން މިހާރު މަސައްކަތްކުރަނީ ކޮވިޑް-19 އާ ދެކޮޅަށް މަސައްކަތްކުރާ ސިއްހީ އޮފިޝަލުން ލައިގެން އުޅޭ ޕްރޮޓެކްޓިވް ގިއަރގައި ކަރަންޓީން ފެސިލިޓީތަކަށް ދިޔުމަށެވެ. މިކަމާ ގުޅިގެން ސިއްހީ ދާއިރާގައި، ޚާއްސަކޮށް ކޮވިޑް-19 އާ ދެކޮޅަށް މަސައްކަތްކުރާ ޑޮކްޓަރުންނާ ނަރުހުން ގެންދަނީ ކަންބޮޑުވުން ފާޅުކުރަމުންނެވެ. ސަބަބަކީ މިހާރުވެސް ޕާރސަނަލް ޕްރޮޓެކްޓިވް އިކުއިޕްމަންޓް މަދުވެދާނެކަމުގެ ބިރު ހީވެފައިވަނިކޮށް، އެއްވެސް ސަބަބަކާ ނުލައި އެޗް.އާރް.ސީ.އެމްގެ ޓީމަށް އެތަކެތި ދޭން ޖެހުމެވެ.
ފާހަގަކޮށްލެވޭ ގޮތުގައި ރާއްޖޭގެ ކަރަންޓީން ފެސިލިޓީއެއްގައި އިންސާނީ ހައްޤެއް ގެއްލިގެން ނުވަތަ އެޒާތުގެ ކަމެއް ހިނގައިގެން މިހާތަނަށް ޝަކުވާއެއް އެއްވެސް ފަރާތަކުން ހުށަހަޅާފައިވާ ނެތެވެ. ސިއްހީ ދާއިރާގައި މަސައްކަތްކުރައްވާ ފަރާތަކުން ބުނީ ކޮވިޑް-19 އާ ދެކޮޅަށް ރާއްޖެއިން ކުރަމުންދާ މަސައްކަތަށް ޑަބްލިޔު،އެޗް.އޯ އިންވެސް ތައުރީފްކޮށްފައިވަނިކޮށް، އެއްވެސް މައްސަލައެއް ދިމާ ނުވަނީސް އެޗް.އާރް.ސީ.އެމް އިން ނޫސްތަކުގައި ފޮޓޯ ޖަހާލަން ކަރަންޓީން ފެސިލިޓީތަކަށް ގޮސް، ޑޮކްޓަރުންނާ ނަރުހުން ބޭނުންކުރަން ހުރި ޕްރޮޓެކްޓިވަ އިކުއިޕްމަންޓް ބޭނުންކުރުމަކީ ކަންބޮޑުވާ ކަމެއްކަމަށެވެ. އަދި ރާއްޖޭގައި ރައީސް ޔާމީންގެ ވެރިކަމުގައި ހިނގި ލާއިންސާނީ އެތައްކަމެއް ނުފެންނަކަމަށް އެޗް.އާރް.ސީ.އެމް އިން ހެދުމަށްފަހު، މިހާރު ކުއްލިއަކަށް ހޭލަމޭލަވެގެން އެކޮމިޝަން އުޅެނީ ކީއްވެތޯ ސުވާލު އުފެއްދިއެވެ.
މިކަމާ ގުޅިގެން އެޗް.އާރް.ސީ.އެމް ގެ ރައީސާ އައިމިނަތު އީނާސް އާއި ގުޅާލުމުން ވިދާޅުވީ އެކަމާއި ގުޅޭ މައުލޫމާތު ހާމަކުރައްވާނެ ކަމަށެވެ. އީނާސް އެ މައުލޫމާތުތައް ދޮގެއް ނުކުރައްވައެވެ.
