މޫދަށް ފުންމާލި މުދިމު ހޯދުމުގެ އޮޕަރޭޝަން ކުރިޔަށް، އަދިވެސް ނުފެނޭ
މައުލޫމާތު ލިބިފައިވާ ގޮތުގައު އެމީހާއަކީ އިންޑިއާ މީހެއް
މުދިމު ހޯދުމުގެ މަސައްކަތުގައި އެމްއެންޑީއެފްގެ ޑައިވަރުން ހަރަކާތްތެރިވަނީ
މި މަހުގެ ހަވަނަ ދުވަހުގެރޭ ށ.އަތޮޅުގައި ހިނގަމުންގެންދާ ޖޭޑަބްލިޔު މެރިއޮޓް މޯލްޑިވްސް އެންޑް ސްޕާ ރިސޯޓުގައި މަސައްކަތްކުރާ ބިދޭސީ މުދިމަކު މޫދަށް ފުންމާލި ފަހުން ޚަބަރެއް ނުވެގެން އެމީހާ ހޯދުމަށް ކުރިޔަށް ގެންދާ އޮޕަރޭޝަންގައި މިހާތަނަށް ބޮޑު ސަރަހައްދެއް ހޯދިފައިވާ ކަމަށާއި، އަދިވެސް އޭނާ ނުފެންނަ ކަމަށް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން ބުނެފިއެވެ.
އެމްއެންޑީއެފްގެ މީޑިއާ އޮފިޝަލް އިބްރާހިމް އާޒިމް ރާއްޖެ.އެމްވީ އަށް ވިދާޅުވީ، ކޯސްޓް ގާޑްގެ ޑައިވަރުން ވަނީ އެ މީހާ ހޯދުމަށް ކަނޑުގެ ބޮޑު ސަރަހައްދެއް ބަލާފައި ކަމަށެވެ. އަދި ހުއްޓުމެއް ނެތި އޭނާ ހޯދުމަށް ކޮންމެ ދުވަހަކުވެސް މަސައްކަތް ކުރަމުން ގެންދާ ކަމަށް އޭނާ ވިދާޅުވިއެވެ.
މެރިއޮޓް ރިސޯޓުގެ ސީސީޓީވީ ވީޑިއޯ ފޫޓޭޖުން ފެންނަ ގޮތުގައި މި މީހާ މޫދަށް ފުންމާލާފައިވަނީ އެރިސޯޓުގެ ސަޕްލައި ޖެޓީ މަތިން، ފޯނެއްގައި ވާހަކަ ދައްކަން ހުރުމަށް ފަހުގައި ކަމަށް އެމްއެންޑީއެފުން ވަނީ ބުނެފައެވެ. މައުލޫމާތު ލިބިފައިވާ ގޮތަގުއި އެ މުދިމަކީ އިންޑިއާ އަށް ނިސްބަށްވާ މީހެކެވެ. ފުލުހުން ދަނީ އެ މައްސަލަ ތަހުގީގު ކުރަމުންނެވެ.
އެމްއެންޑީއެފުން ބުނީ، އެ މީހާ އެންމެ ފަހުން ލައިގެން ހުރީ ހުދު ކުލައިގެ ކުރުތާއަކާއި އަޅިކުލައިގެ ފަޓްލޫނެއްކަމަށެވެ. ގެއްލުނު މީހާއާ ބެހޭ އެއްވެސް ޚަބަރެއްވޭތޯ މިސަރަހައްދުން ދަތުރުކުރާ އުޅަނދުފަހަރުންނާއި އެހިސާބުގެ ރަށްތަކުގެ އެހީތެރިކަމަށް ކޯސްޓުގާޑުން ވަނީ އެދިފައެވެ.
