ކޮވިޑް-19 ގެ ސަބަބުން ސަލްމާން ޚާންގެ ފިލްމު "ރާދޭ: ޔުއަރ މޯސްޓް ވޯންޓެޑް ބާއީ" ރިލީޒްކުރާ ތާރިހު ފަސްކުރުން އެކަށީގެންވާ ކަމަށް ރިޕޯޓްތައް ބުނެފިއެވެ.

ސަލްމާން އާއި ދީޝާ ޕަޓާނީ ފެނިގެންދާ ފިލްމު ރިލީޒްކުރަން ހަމަޖެހިފައި އޮތީ މި އަހަރުގެ އީދުގައެވެ. ނަމަވެސް ކޮވިޑް-19 އާ ގުޅިގެން ފިލްމުތަކުގެ މަސައްކަތް މަޑުޖައްސާލާފައިވާތީ ރާދޭ ފިލްމު ރިލީޒްކުރާ ތާރިހު ފަސްކުރާނެ ކަމަށް ބެލެވޭ ކަމަށް ރިޕޯޓްތައް ބުނެއެވެ.

އެ ފިލްމުގެ ބައެއް މަންޒަރުތައް ނެގުމަށް ދުބާއީގައި ޝެޑިއުލް ކޮށްފައި އޮތް ޝޫޓިން ވަނީ ކޮވިޑް-19ގެ ސަބަބުން ދާދި ފަހުން ކެންސަލް ކޮށްފައެވެ.

ރާދޭ ޑައިރެކްޓް ކުރާނީ ސަލްމާންގެ ދަބަންގް ވެސް ޑައިރެކްޓް ކޮށްފައިވާ ޕްރަބޫ ދޭވާއެވެ. ފިލްމުގައި ރަންދީޕް ހޫދާ، ޖެކީ ޝްރޯފްގެ އިތުރުން ދީޝާ ޕަޓާނީ ފެނިގެންދާނެއެވެ. ސުހައިލް ޚާން ޕްރޮޑަކްޝަނާއި ރީލް ލައިފް ޕްރޮޑަކްޝަން ގުޅިގެން ޕްރޮޑިއުސްކުރާ މި ފިލްމަކީ ސަލްމާން ޚާން ފިލްމްސްގެ ބެނަރގެ ދަށުން އުފައްދާ ފިލްމެކެވެ.

ބައެއް މީޑިއާ ރިޕޯޓުތައް ބުނާ ގޮތުން، އެ ފިލްމަކީ ކޮރެޔާ ފިލްމެއްގެ ކޮޕީއެކެވެ. އެހެން ނަމަވެސް ފިލްމު އުފެއްދި ފަރާތުން ބޭނުންވަނީ ފިލްމުގެ އަސްލު ނަން ސިއްރު ކުރާށެވެ. ކޮރެއާ ފިލްމުގެ ރައިޓްސް މިހާރު ވަނީ ގަނެފައެވެ.